អ.ស.ប ជម្រុញឲ្យអាជ្ញាធរវៀតណាម ដោះលែងស្ត្រីអ្នកសរសេរអត្ថបទរិះគន់រដ្ឋវៀតណាមតាមបណ្តាញអ៊ីនធឺនែត
កាលពីថ្ងៃសុក្រម្សិលមិញ អ.ស.ប បានជម្រុញឲ្យអាជ្ញាធរវៀតណាម ដោះលែងស្រ្តីអ្នកសរសេរអត្ថបទរិះគន់រដ្ឋាភិបាលតាមបណ្តាញអ៊ីនធឺនែតឈ្មោះ (Tran Thi Nga )ត្រាន់ ធីង៉ា ដែលទើបត្រូវបានតុលាការវៀតណាមកាត់ទោសឲ្យជាប់គុកចំនួន៩ឆ្នាំពីបទផ្សព្វផ្សាយឃោសនាប្រឆាំងនឹងរដ្ឋ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
អ្នកនាំពាក្យរបស់ អ.ស.ប ទទួលបន្ទុកសិទ្ធមនុស្ស លោក Liz Throssell បានថ្លែងថាភាពធ្ងន់ធ្ងរនៃការកាត់ទោសនិងដំណើរការការកាត់ទោសនៅក្នុងប្រទេសវៀតណាម មិនបានបំពេញស្របទៅតាមបទដ្ឋាននៃនីតិវិធីត្រឹមត្រូវនោះឡើយ និងបានបង្កជាប្រភពព្រួយបារម្ភដ៏ពន់ពេក។
ពីព្រោះកន្លងទៅ ស្រ្តីអ្នកសរសេរអត្ថបទរិះគន់រដ្ឋាភិបាលតាមប្រព័ន្ធអឺនធឺនែតឈ្មោះ ត្រាន់ ធីង៉ា ដែលមានអាយុ៣៩ឆ្នាំ ត្រូវបានតុលាការវៀតណាមផ្តន្ទាទោសបន្ទាប់ពីការកាត់ទោសរយៈពេលតែមួយថ្ងៃប៉ុណ្ណោះ នៅក្នុងភាគខាងជើងនៃខេត្ត Ha Nam ៦ខែក្រោយពីត្រូវបានអាជ្ញាធរចាប់ខ្លួនពីបទធ្វើសកម្មភាពឃោសនាប្រឆាំងនឹងរដ្ឋាភិបាល -នេះជាការគូសបញ្ជាក់របស់លោក Ha Huy Son មេធាវីរបស់ស្ត្រីជាប់ចោទ ដែលនិយាយថាជាសាលក្រមមួយដ៏អយុត្តិធម៌បំផុត។
គួរបញ្ជាក់ថា សាលក្រមប្រឆាំងនឹងអ្នកស្រី ត្រាន់ធី ង៉ានិងការ ចាប់ខ្លួនលោក Dinh Luong ដែលជាប់ចោទពីបទធ្វើសកម្មភាពចង់ផ្តួលរំលំរដ្ឋាភិបាលវៀតណាម ត្រូវបានប្រព្រឹត្តទៅ ១ខែបន្ទាប់ពីការផ្តន្ទាទោសស្ត្រីវៀតណាមម្នាក់ទៀតឈ្មោះNguyen Ngoc Nhu Quynh ឲ្យជាប់គុក១០ឆ្នាំពីបទឃោសនាផ្សព្វផ្សាយប្រឆាំងនឹងរដ្ឋវៀតណាមតាមបណ្តាញសង្គម។
នៅក្នុងហេតុផលដូច្នេះហើយ ទើបអ្នកនាំពាក្យរបស់ អ.ស.ប ទទួលបន្ទុកសិទ្ធមនុស្ស បានថ្លែងអះអាងថា”យើងជម្រុញអោយអាជ្ញាធរវៀតណាម ធ្វើការដោះលែងជាបន្ទាន់ រាល់បណ្តាអ្នកដែលត្រូវបានជាប់ឃុំឃាំង ដោយហេតុតែ ពួកគេ បានប្រើសិទ្ធនិងសេរីភាពរបស់ខ្លួននៅក្នុងការបញ្ចេញមតិតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ