រដ្ឋមន្ត្រីការបរទេសចិននិងកូរ៉េខាងជើង ពិភាក្សាគ្នា នៅហ្វីលីពីន
ក្រោយអង្គការសហប្រជាជាតិបានអនុម័តសេចក្តីសម្រេចបន្ថែមទណ្ឌកម្មលើកូរ៉េខាងជើង ថ្ងៃអាទិត្យនេះ រដ្ឋមន្ត្រីការបរទេសចិន វ៉ាង យី បានជួបជជែកគ្នាជាមួយរដ្ឋមន្ត្រីការបរទេសកូរ៉េខាងជើង រី យ៉ុងហូ នៅទីក្រុងម៉ានីល។ លោកវ៉ាងបានស្នើអោយកូរ៉េខាងជើងធ្វើការសម្រេចចិត្តប្រកបដោយភាពឆ្លាតវៃ។
ចុះផ្សាយនៅថ្ងៃ៖ កែប្រែថ្ងៃទី៖
ម្សិលមិញ គ្រប់សមាជិកនៃក្រុមប្រឹក្សាសន្តិសុខអង្គការសហប្រជាជាតិ ដែលមាន ទាំងចិន និងរុស្ស៊ីដែរនោះ បានមូលមតិគ្នាបោះឆ្នោតអនុម័តតាមសំណើអាមរិក បន្ថែមទណ្ឌកម្មលើកូរ៉េខាងជើង កាត់ផ្តាច់ចំណូល១ពាន់លានដុល្លារ ដែលក្រុងព្យុងយ៉ាងបានពីការនាំចេញ។ ថ្ងៃអាទិត្យនេះ នៅទីក្រុងម៉ានីល ប្រទេសហ្វីលីពីន ក្នុងឱកាសវេទិកាតំបន់អាស៊ាន រដ្ឋមន្ត្រីការបរទេសចិន លោកវ៉ាង យី បានជួបរដ្ឋមន្ត្រីការបរទេស កូរ៉េខាងជើង គឺ លោក រី យ៉ុងហូ ពិភាក្សាគ្នាពីទណ្ឌកម្មអង្គការសហប្រជាជាតិ។ ចិនបានស្នើអោយកូរ៉េខាងជើងធ្វើការសម្រេចចិត្តប្រកបដោយភាពឆ្លាតវៃ។
រដ្ឋមន្ត្រីការបរទេសចិនគូសបញ្ជាក់ឡើងវិញថា ទណ្ឌកម្មអង្គការសហប្រជាជាតិដាក់បន្ថែមលើកូរ៉េខាងជើង មិនមែនជាទិសដៅដែលគេចង់បានទេ ការចរចាពិភាក្សាគ្នា ទើបជាដំណោះស្រាយពិតប្រាកដ។ គួររំលឹកដែរថា ទណ្ឌកម្មថ្មីៗ ដែលអង្គការសហប្រជាជាតិអនុម័តប្រឆាំងកូរ៉េខាងជើងម្សិលមិញនេះ ក៏ដើម្បីជំរុញអោយកូរ៉េខាងជើងចូលតុចរចាដែរ។ ចិនបានអំពាវនាវអោយមានការចរចា៦ប្រទេសឡើងវិញ ស្តីពីបញ្ហានុយក្លេអ៊ែរកូរ៉េខាងជើងនេះ។ ជាការចរចាដែលមានភាគីកូរ៉េខាងជើង និងកូរ៉េខាងត្បូង ចិន អាមេរិក រុស្ស៊ី និងជប៉ុន។ ការចរចា៦ប្រទេសនេះ ជាប់គាំងច្រើនឆ្នាំមកហើយ។
វេទិកាតំបន់អាស៊ាននៅទីក្រុងម៉ានីល ដែលមានវត្តមានរដ្ឋមន្ត្រីការបរទេស២៧ប្រទេស ក៏មានវត្តមានរបស់ភាគីចរចាទាំង៦ប្រទេសនេះដែរ។ ហើយវេទិកាអាស៊ានក៏និយាយពីបញ្ហាកូរ៉េខាងជើងដែរ។ រដ្ឋមន្ត្រីការបរទេសចិនសង្ឃឹមថា គ្រប់ភាគីដែលជាប់ពាក់ព័ន្ធ នឹងពិនិត្យអោយហ្មត់ចត់នូវសំណើរបស់ចិន ជាសំណើតំរូវអោយកូរ៉េខាងជើងព្យួរការសាកល្បងនុយក្លេអ៊ែរនិងមីស៊ីល ហើយជាថ្នូរមកវិញ កូរ៉េខាងត្បូងនិងអាមេរិក ត្រូវផ្អាកសមយុទ្ធយោធារួមគ្នាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ