កូរ៉េខាងជើងដោះលែងគ្រូគង្វាលគ្រឹស្តសាសនាសញ្ជាតិកាណាដាមួយរូបដោយយោងទៅលើមូលហេតុសុខភាព
កូរ៉េខាងជើង ទើបដោះលែងអ្នកទោសមួយរូបដែលជាគ្រូគង្វាលគ្រឹស្តសាសនានិងមានសញ្ជាតិកាណាដានៅថ្ងៃពុធម្សិលមិញដោយមូលហេតុសុខភាព។ គ្រូគង្វាលគ្រឹស្តសាសនារូបនេះ ត្រូវបានរបបកុម្មុយនិស្ត ចាប់ខ្លួននិងដាក់ឃុំឃាំងក្នុងពន្ធនាគារតាំងពីឆ្នាំ២០១៥ ដោយចាប់បង្ខំឲ្យធ្វើការងារជាទម្ងន់អស់មួយជីវិត ពីបទធ្វើវិទ្ធង្សនាប្រឆាំងនឹងរបបព្យុងយ៉ាងនិងសំអុយកេរ្តិ៍ឈ្មោះប្រមុខដឹកនាំកូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
លោក ហេអ៊ុន សូអូ លីម(Hyeon Soo Lim )អាយុ៦១ឆ្នាំ បន្ទាប់ពីត្រូវបានរបបព្យុងយ៉ាងចាប់ខ្លួននិងដាក់ឃុំឃាំងក្នុងពន្ធនាគារតាំងពីឆ្នាំ២០១៥មក ទើបត្រូវបានអាជ្ញាធរកូរ៉េខាងជើង ដោះលែងឲ្យមានសេរីភាពឡើងវិញនៅថ្ងៃពុធម្សិលមិញដោយមួលហេតុសុខភាព-នេះបើយោងតាមទីភ្នាក់ងារព័ត៌មានផ្លូវការកូរ៉េខាងជើងKCNA។ ជាការជូនដំណឹងមួយដែលធ្វើឡើងនៅចំពេលដែលគណៈប្រតិភូរដ្ឋាភិបាលកាណាដា កំពុងស្ថិតនៅក្នុងទីក្រុងព្យុងយ៉ាងដើម្បីលើកឡើងពីករណីរបស់គ្រូគង្វាលសញ្ជាតិកាណាដានេះ។
របបព្យុងយ៉ាងបានចាប់ខ្លួនលោក លីម ពីបទចោទប្រកាន់ធ្វើសកម្មភាពវិទ្ធង្សនាប្រឆាំងនឹងរបបកូរ៉េខាងជើងតែអាជ្ញាធរកាណាដា បដិសេធយ៉ាងដាច់អហង្កា។
រីឯរបបព្យុងយ៉ាងវិញ នៅតែអះអាងថាលោកគ្រូគង្វាលនេះ បានទទួលស្គាល់រាល់ការចោទប្រកាន់ប្រឆាំងនឹងរូបគាត់ រួមទាំងការបង្ខូចសំអុយកេរ្តិ៍ឈ្មោះយ៉ាងអាសោចដល់ប្រព័ន្ធកូរ៉េខាងជើងនិងរូបលោកប្រមុខដឹកនាំកូរ៉េខាងជើងផង។
លោកគ្រូគង្វាលសញ្ជាតិកាណាដានេះ ត្រូវបានគេចាត់ទុកជាគ្រូផ្សព្វផ្សាយសាសនាគ្រឹស្តមួយដ៏មានឥទ្ធិពលយ៉ាងខ្លាំងក្លាជាងគេនៅកូរ៉េខាងជើងនិងធ្លាប់ធ្វើដំណើរមកទស្សនានៅកូរ៉េខាងជើងនេះ រាប់សិបដងមកហើយដើម្បីការងារគាត់ផងនៅមជ្ឈមណ្ឌលកុមារកំព្រានិងមន្ទីរពេទ្យ។ ក៏ប៉ុន្តែ គម្រោងការណ៍មួយចំនួន ដែលលោកបានចូលរូមនោះ ជាអាទិ៍រោងចក្រធ្វើម្សៅនិងត្បាល់កិន មានជាប់ពាក់ព័ន្ធជាមួយនឹងក្រុមសមាជិករបស់លោក Jang Song-Thaek ដែលត្រូវជាឪពុកមារបស់លោកគឺម ជុងអ៊ុននិងដែលត្រូវបានរបបព្យុងយ៉ាងចាប់ខ្លួននិងប្រហារជីវិតនៅខែធ្នូឆ្នាំ២០១៣ពីបទក្បថជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ