លោកលី ខឺជាំង៖ចិនការពារជាថ្មីលើការដោះដូរពាណិជ្ជកម្ម និងការប្រកួតប្រជែងដោយសេរី
នៅក្នុងប្រទេសចិន លោកនាយករដ្ឋមន្រ្តីលី ខឺជាំងបានអះអាងជាថ្មីថា ប្រឈមមុខនឹងស្ថានភាពសេដ្ឋកិច្ចផុយស្រួចក្នុងលោក ការដោះដូរពាណិជ្ជកម្មដោយសេរីជាយន្តការ ឬថាជាមូលដ្ឋានចាំបាច់មួយមិនអាចខ្វះបាន និងថា ចិនសន្យានឹងបើកចំហទីផ្សារបន្ថែមឲ្យដល់ក្រុមហ៊ុនបរទេសដោយបង្កើតឲ្យបរិយាកាសនៃការប្រកួតប្រជែងស្មើភាព។ លោកលី ខឺជាំងបានបញ្ជាក់យ៉ាងដូច្នេះនៅក្នុងកិច្ចប្រជុំជាមួយថ្នាក់ដឹកនាំស្ថាប័នហិរញ្ញវត្ថុអន្តរជាតិចំនួន ៦ ក្នុងទីក្រុងប៉េកាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
នេះជាឆ្នាំទី ២ ដែលចិនបានធ្វើជាម្ចាស់ផ្ទះរៀបចំកិច្ចប្រជុំថ្នាក់ដឹកនាំស្ថាប័នសេដ្ឋកិច្ច និងហិរញ្ញវត្ថុអន្តរជាតិចំនួន ៦ ដែលក្នុងនោះមានមូលនិធិរូបិយវត្ថុអន្តរជាតិ ធនាគារពិភពលោក ឬមួយក៏អង្គការពាណិជ្ជកម្មពិភពលោក។ កម្មវត្ថុនៃកិច្ចប្រជុំ គឺដើម្បីជជែកពីនយោបាយសេដ្ឋកិច្ចរបស់ចិនក្នុងនាមជាមហាអំណាចសេដ្ឋកិច្ចទី២ ក្នុងលោក។ នៅចំពោះមុខថ្នាក់ដឹកនាំស្ថាប័នសេដ្ឋកិច្ច និងហិរញ្ញវត្ថុអន្តរជាតិទាំង ៦ លោកនាយករដ្ឋមន្រ្តីចិនលី ខឺជាំងបានចេញមុខការពារជាថ្មីនូវនយោបាយដោះដូរពាណិជ្ជកម្មសេរី និងកំណែទម្រង់រចនាសម្ព័ន្ធដូចដែលលោកប្រធានាធិបតីចិនស៊ី ជីនពីងបានថ្លែងនៅក្នុងវេទិកាសេដ្ឋកិច្ចពិភពលោកក្នុងទីក្រុងដាវ៉ូស ប្រទេសស្វ៊ីសនាដើមឆ្នាំ ២០១៧។
លោកលី ខឺជាំងបានទទួលស្គាល់ពីស្ថានភាពសេដ្ឋកិច្ចពិភពលោកងើបឡើងវិញ តែនៅមានលក្ខណៈផុយស្រួច។ សម្រាប់លោកប្រមុខរដ្ឋាភិបាលចិន ការដោះដូរសេរីជាយន្តការចាំបាច់មួយមិនអាចខ្វះបានដើម្បីជំនះលើគ្រប់ការលំបាកទាំងឡាយ និងចូលរួមជួយជ្រោមជ្រែងលើកស្ទួយក្រុមហ៊ុន រោងចក្រសហគ្រាសចិនឲ្យផ្តល់ជម្រើសកាន់តែច្រើនសម្រាប់អតិជន។ ប្រតិកម្មរបស់លោកលី ខឺជាំងយ៉ាងដូចនេះបានធ្វើឡើង បន្ទាប់ពីចិនបានទទួលរងការរិះគន់ ទិតៀនយ៉ាងខ្លាំងពីអាមេរិក និងអឺរ៉ុបក្នុងបទអនុវត្តនយោបាយពាណិជ្ជកម្មមិនស្មើភាពជាមួយក្រុមហ៊ុនបរទេស ឬមួយក៏លូកដៃនៅក្នុងនយោបាយរូបិយវត្ថុក្នុងគោលដៅជួយលើកស្ទួយវិស័យនាំចេញ។
ឆ្លើយនឹងការចោទប្រកាន់នេះ លោកលី ខឺជាំងបានសន្យាបន្តបើកទ្វារទទួលអ្នកវិនិយោគបរទេសដោយបង្កើតឲ្យមានបរិយាកាសនៃការដោះដូរ និងការប្រកួតប្រជែងដោយសេរី និងថា ចិនគ្មានបំណងលូកដៃចូលអន្តរាគមន៍លើប្រាក់យ័នដើម្បីជួយជំរុញលើវិស័យនាំចេញនោះទេ។ ចំណែកលោកស្រីគ្រីស្ទីន ឡាហ្កាដ អគ្គនាយកមូលនិធិរូបិយវត្ថុអន្តរជាតិបានព្រមានពីកំណើនហានិភ័យក្នុងរយៈពេលខ្លីកើតចេញពីកំណើនប្រាក់បំណុលរដ្ឋ និងឯកជននៅចិនដែលមានជាង ២៦០% នៃផលិផលសរុបក្នុងស្រុក។
តែលោកលី ខឺជាំងបានចេញមុខអះអាងថា ចិនបានទទួលស្គាល់ពីហានិភ័យជាយថាហេតុ តែរដ្ឋាភិបាលបានត្រៀមខ្លួនរួចជាស្រេចដើម្បីទប់ទល់ និងថា ចិននឹងបន្តអនុវត្តនយោបាយកំណែទម្រង់មួយដើម្បីប្តូរពីគំរូសេដ្ឋកិច្ចដែលពឹងលើការនាំចេញទៅជាគំរូសេដ្ឋកិច្ចដែលពឹងលើសេវា និងការចំណាយរបស់ពលរដ្ឋចិន។ សូមជម្រាបជូនថានៅក្នុងនយោបាយកំណែទម្រង់ថ្មីនេះ ចិនបានផ្តល់ប្រាក់កម្ចីយ៉ាងច្រើនឲ្យក្រុមហ៊ុនរដ្ឋ និងឯកជនដើម្បីជួយផ្តល់សន្ទុះកំណើនសេដ្ឋកិច្ចឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ