នៅថៃ ដើម្បីទិញកាតទូរស័ព្ទដៃ គេត្រូវបន្សល់ទុកស្នាមម្រាមដៃ
អាជ្ញាធរថៃ នៅថ្ងៃអង្គារនេះ បានប្រកាសពីវិធានការចុះស្នាមម្រាមដៃ ឬការថតមុខរបស់អតិថិជន ដែលចង់ទិញកាតទូរស័ព្ទប្រើប្រាស់ក្នុងទឹកដីថៃ។ តាមការប្រកាសជាផ្លូវការ វិធានការនេះធ្វើឡើងដើម្បី ប្រយុទ្ធប្រឆាំងនឹងលួចបន្លំ តាមរយៈការប្រើទូរស័ព្ទដៃ។ ប៉ុន្តែ ប្រព័ន្ធចុះឈ្មោះបែបថ្មីនេះ បានបង្កឲ្យមានការរិះគន់រួចហើយក្នុងចំណោមអ្នកប្រើអ៊ីនធ័រនែត ដែលកំពុងបារម្ភពីការត្រួតពិនិត្យរឹតបន្តឹង របស់របបសឹកថៃ ទៅលើសេរីភាពបញ្ចេញមតិ ក្នុងប្រទេសថៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
ចាប់ពីថ្ងៃទី ១៥ធ្នូ ខែក្រោយ រាល់អ្នកដែលទិញទូរស័ព្ទដៃនៅប្រទេសថៃ ត្រូវបន្សល់ទុក ស្នាមម្រាមដៃ ឬរូបថតមុខមាត់ ដើម្បីឲ្យអាជ្ញាធរថៃ អាចស្គាល់ពីអត្តសញ្ញាណរបស់អ្នកទិញ ប្រើប្រាស់ ទូរស័ព្ទ ក្នុងប្រទេស។ នេះបើតាមការប្រកាសរបស់អគ្គលេខាធិការនៃគណៈកម្មការជាតិ ទូរគមនាគមន៍ថៃ លោក តាកន តានតាស៊ីដ។
តាមការប្រកាសជាផ្លូវការ ការតម្រូវឲ្យអតិថិជន ចុះស្នាមក្រយៅដៃ ឬរូបថតមុខ គឺដើម្បី ធានាសុវត្ថិភាព ការចាយវាយ តាមរយៈទូរស័ព្ទដៃ ដែល កាន់តែរីកដុះដាល ខ្លាំងក្នុងប្រទេសថៃ។ វិធានការថ្មីនេះ មានទិសដៅបង្កើនជំនឿទុកចិត្ត ទៅលើសេវាចាយប្រាក់តាមអ៊ីនធ័រនែត របស់ធនាគារ។ សម្រាប់អគ្គលេខាធិការគណៈកម្មការជាតិទូរគមនាគមន៍ថៃ មនុស្សមួយចំនួនបានបន្លំ ចុះឈ្មោះក្លែងក្លាយ នៅក្នុងពេលទិញកាតទូរស័ព្ទ។ ដូច្នេះ នៅពេលមានបញ្ហាកើតឡើង គេមិនអាចរកមុខ កំណត់អត្តសញ្ញាណរបស់ជនខិលខូចបាននោះទេ
ប្រព័ន្ធសំគាល់អត្តសញ្ញាណរបស់អ្នកទិញកាតទូរស័ព្ទ ត្រូវបានគេអនុវត្ត ធ្វើរួចហើយ នៅប្រទេសបង់ក្លាដែស អារ៉ាប៊ី សាអូឌីត ឬនៅ ប៉ាគីស្ថាន ជាដើម ប៉ុន្តែ គ្មានទេ នៅក្នុងប្រទេសចិន។ ទៅតាមការរៀបចំថ្មីរបស់អាជ្ញាធរថៃ ប្រជាជនក្នុងស្រុក មានជម្រើសពីរ។ គេអាចបន្សល់ស្នាមម្រាមដៃ ឬឲ្យគេថតមុខ ដែលអាចគេនឹងអាចយកទៅផ្ទៀងផ្ទាត់បន្តទៀត ជាមួយអត្តសញ្ញាណប័ណ្ណសំគាល់ខ្លួនរបស់ពួកគេ។ ការថតមុខនេះអនុវត្តផងដែរ ទៅលើអ្នកទេសចរបរទេស ដែលប្រាថ្នា ចង់ទិញ កាតទូរស័ព្ទ នៅប្រទេសថៃ។
នៅខែមិថុនា រដ្ឋាភិបាលថៃបានប្រកាស ចង់រៀបចំ ឡើងវិញ ទីផ្សារកាតទូរស័ព្ទដៃ បន្ទាប់ពីប៉ូលិសថៃ បានចាប់ខ្លួន ជនជាតិចិន បីរូប ដែលអាចមានសមត្ថភាពទិញ កាតទូរស័ព្ទ ដៃ ដល់ទៅ៤សែន កាត។ ជនជាតិចិនទាំងនោះ បានសារភាពប្រាប់ប៉ូលិសថា ពួកគេប្រើកាតទូរស័ព្ទផ្សេងៗគ្នា ដើម្បីចុចលើអក្សរចូលចិត្ត Like របស់ផលិតផលក្រុមហ៊ុននៅប្រទេសចិន។ ក្រៅតែពីចង់បោសសម្អាតបណ្តាញ ទុច្ចរិត វិធានការចុះឈ្មោះ អត្តសញ្ញាណ របស់អ្នកទិញកាតទូរស័ព្ទដៃ នឹងអាចជួយទប់ស្កាត់ផងដែរ អំពើភេរវកម្ម នៅភាគខាងត្បូងប្រទេសថៃ។ រហូតមក ក្រុមឧទ្ទាម អ៊ីស្លាមឧស្សាហ៍ប្រើទូរស័ព្ទដៃ ជាមធ្យោបាយ សម្រាប់បំផ្ទុះគ្រាប់បែក សំដៅ មន្រ្តីទាហាន និងប៉ូលិសថៃ នៅភាគខាងត្បូងប្រទេសថៃ។
យ៉ាងណាក៏ដោយ សម្រាប់អ្នកប្រើប្រាស់អ៊ីនធ័រនែតនៅប្រទេសថៃ ការតម្រូវឲ្យចុះស្នាមក្រយៅដៃអាចជាវិធានការក្តៅមួយទៀត របស់របបសឹក ដែលកំពុងបើកយុទ្ធនាការរឹតបន្តឹង គ្រប់គ្រង សេរីភាពបញ្ចេញមតិ នៅក្រោយ ធ្វើរដ្ឋប្រហារ ទម្លាក់រដ្ឋាភិបាលស៊ីវិល ថៃ នៅឆ្នាំ ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ