ហ្វីលីពីន៖លោកឌុយទែរតេសម្រេចជាស្ថាពរមិនឲ្យពលករហ្វីលីពីនចេញទៅធ្វើការនៅកូវ៉ែត
នៅថ្ងៃអាទិត្យ ទី២៩ មេសានេះ លោកប្រធានាធិបតីហ្វីលីពីនឌុយទែរតេបានបញ្ជាក់ពីការហាមជាស្ថាពរមិនឲ្យពលរដ្ឋហ្វីលីពីនចេញទៅធ្វើការនៅក្នុងប្រទេសកូវ៉េតទៀតឡើយ។ វិធានការជាស្ថាពរនេះបានធ្វើឡើង បន្ទាប់ពីមានវិធានការព្យួរជាបណ្តោះអាសន្នប្រកាសដោយលោកឌុយទែរតេកាលពីខែកុម្ភៈកន្លងទៅ។ អ្វីជាការកត់សម្គាល់ ចំណាត់ការរបស់លោកឌុយទែរតេពេលនេះនឹងបង្កឲ្យមានភាពតានតឹងកាន់តែខ្លាំងរវាងហ្វីលីពីន និងកូវ៉ែតនៅក្នុងសំណុំរឿងពលករបរទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
កំហឹងរបស់លោកប្រធានាធិបតីហ្វីលីពីនឌុយទែរតេប្រឆាំងប្រទេសកូវ៉ែតបានកើតមានឡើង បន្ទាប់ពីមានឃាតកម្មសម្លាប់ស្រ្តីអ្នកបម្រើជនជាតិហ្វីលីពីនម្នាក់នៅក្នុងគ្រួសារកូវ៉ែតមួយ និងដែលសាកសពស្រ្តីនោះត្រូវបានគេរកឃើញនៅក្នុងទូរទឹកកកសម្រាប់កក។ បន្ទាប់មក រឿងអាស្រូវមួយនេះក៏បានបង្កឲ្យមានវិបត្តិការទូតធ្ងន់ធ្ងររវាងទីក្រុងកូវ៉ែត និងម៉ានីលក្នុងសប្តាហ៍នេះ ក្រោយពីរដ្ឋាភិបាលកូវ៉ែតបានបណ្តេញចេញឯកអគ្គរដ្ឋទូតហ្វីពីលីនពីកូវ៉ែត និងបានកោះហៅឯកអគ្គរាជទូតកូវ៉ែតនៅហ្វីលីពីនឲ្យត្រឡប់ចូលស្រុកវិញ។
វិធានការចាស់ដៃរបស់កូវ៉ែតដូចនេះបានធ្វើឡើង បន្ទាប់ពីមានការផ្សព្វផ្សាយខ្សែអាត់វីដេអូមួយដែលបង្ហាញពីបេសកកម្មរបស់ក្រុមមន្រ្តីការទូតហ្វីលីពីននៅកូវ៉ែតក្នុងការរៀបចំជម្លៀសអ្នកបម្រើជនជាតិហ្វីលីពីនចេញពីក្រុមគ្រួសារកូវ៉ែតណាដែលបានវាយធ្វើបាបលើអ្នកបម្រើជនជាតិហ្វីលីពីន។ ទីក្រុងម៉ានីលបានសម្តែងការសុំទោសចំពោះការបែកធ្លាយខ្សែអាត់វីដេអូនោះ តែអ្វីៗហាក់យឺតពេលក្នុងការអនុញ្ញាតឲ្យភាគីទាំងពីរអាចសម្រុះសម្រួលគ្នាឡើងវិញ។
ទីបំផុតនៅថ្ងៃអាទិត្យ ទី២៩ មេសានេះ លោកឌុយទែរតេបានប្រកាសនៅចំពោះមុខហ្វូងអ្នកកាសែតក្នុងទីក្រុងដាវ៉ាវថា ការហាមមិនឲ្យពលករហ្វីលីពីនចេញទៅធ្វើការនៅកូវ៉ែតលែងជាបណ្តោះអាន្នទៀតឡើយ តែជាអចិន្ត្រៃយ៍ចាប់ពីពេលនេះតទៅ ពិសេសចំពោះស្រ្តីបម្រើការតាមផ្ទះ។ គួរជម្រាបជូនថាបច្ចុប្បន្ន មានពលរដ្ឋហ្វីលីពីនប្រមាណ ២៦២ ០០០នាក់កំពុងធ្វើការនៅក្នុងប្រទេសកូវ៉ែត ក្នុងនោះមានជិត ៦០% ជាអ្នកបម្រើការតាមផ្ទះ។ លោកឌុយទែរតែថែមទាំងបានចាត់ទុកស្ថានការណ៍នៅកូវ៉ែតជាអន្តរាយ និងបានអំពាវនាវពលករហ្វីលីពីនដែលកំពុងធ្វើការនៅកូវ៉ែតឲ្យត្រឡប់ចូលស្រុកវិញ។
« យើងក្រមែន តែយើងនឹងអាចរស់បាន » នេះជាការថ្លែងរបស់លោកឌុយទែរតេដោយបន្ថែមថា សេដ្ឋកិច្ចហ្វីលីពីនកំពុងមានសន្ទុះ ហើយហ្វីលីពីនកំពុងខ្វះកម្លាំងពលកម្ម។ បច្ចុបន្ន មានជនជាតិហ្វីលីពីនប្រមាណជា ១០លាននាក់កំពុងធ្វើការនៅបរទេស ក្នុងនោះ មានជាង ២លាននាក់នៅក្នុងតំបន់ឈូងសមុទ្រពែក្ស។ តាមធនាគារកណ្តាលហ្វីលីពីន ប្រាក់បៀវត្សរបស់ពលករហ្វីលីពីននៅបរទេសជាប្រភពចំណូលយ៉ាងសំខាន់សម្រាប់ជួយទ្រទ្រង់សេដ្ឋកិច្ចហ្វីលីពីន។ ជាក់ស្តែងក្នុងឆ្នាំ ២០១៧ មានទឹកប្រាក់ជាង ២៨ ០០០លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ