អតីតនាយករដ្ឋមន្ត្រីប៉ាគីស្ថានត្រូវបានតុលាការ ផ្តន្ទាទោសដាក់ពន្ធនាគារចំនួន១០ឆ្នាំពីបទពុករលួយ
នៅប៉ាគីស្ថាន តុលាការប្រឆាំង អំពើពុករលួយមួយនៅទីក្រុង អ៊ីស្លាម៉ាបាត ទើបបានផ្តន្ទាទោសអតីតនាយករដ្ឋមន្ត្រីប៉ាគីស្ថានលោកណាវ៉ាហ្ស ស្សារីហ្វ ( Nawaz Sharif ) កាលពីថ្ងៃសុក្រទី ៦កក្កដា ឲ្យជាប់ពន្ធនាគារចំនួន១០ឆ្នាំ ពីបទពុករលួយ-នេះបើយោងតាមប្រភពតុលាការ។ ការផ្តន្ទាទោសលើអតីតនាយករដ្ឋមន្ត្រីប៉ាគីស្ថាន រូបនេះ កាន់តែជះផល វិបាកថែមទៀតទៅលើគណបក្សរបស់លោកណាវ៉ាស្សារីហ្វនៅមុនពេលនៃការបោះឆ្នោតសភាដែលគ្រោងទុកនៅថ្ងៃទី២៥ កក្កដាខាងមុននេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
លោកណាវ៉ាហ្ស ស្សារីហ្វ ដោយអវត្តមាននៅក្នុងពេលសវនាការកាត់ទោសនៅទីក្រុងអ៊ីស្លាម៉ាបាត ត្រូវបានតុលាការប៉ាគីស្ថាន ផ្តន្ទាទោស ដាក់ក្នុងពន្ធនាគារចំនួន ១០ឆ្នាំ និងត្រូវបង់ពិន័យជាទឹកប្រាក់ចំនួន ៨លាន livres ឬស្មើ នឹង១០ លានដុល្លារ នៅក្នុងសំណុំរឿងពុករលួយមួយ ពាក់ព័ន្ធ នឹងការទិញផ្ទះល្វែងដ៏ប្រណិតជាច្រើនកន្លែងនៅក្នុងទីក្រុងឡុងដ្រ៍-នេះជាការបញ្ជាក់របស់មេធាវីម្នាក់របស់លោក Sharif ប្រាប់ដល់ទីភ្នាក់ងារព័ត៌មានបារាំង AFP។
យោងតាមរដ្ឋអាជ្ញាប៉ាគីស្ថាន តុលាការប្រឆាំងនឹងអំពើពុករលួយ ថែមទាំងបានបញ្ជាអោយ រដ្ឋាភិបាលសហព័ន្ធប៉ាគីស្ថាន ធ្វើការរិបអូសទាំងអស់នូវផ្ទះល្វែងដែលជាប់ពាក់ព័ន្ធទាំងនោះ។
លើសពីនេះ កូនៗ ៣នាក់របស់លោក Sharif នៅក្នុងចំណោមកូនទាំង៤នាក់នោះ ក៏ត្រូវបានជាប់ពាក់ព័ន្ធនៅ ក្នុងករណីផ្ទះល្វែងទាំងនោះដែរ ។ ហើយក្នុងចំណោមកូនទាំង៣នាក់នោះ ក៏មានកូនស្រីម្នាក់ របស់លោកសារីហ្វ ឈ្មោះ Maryam Sharif ដែលគេសន្មតទុក ថា ជា អ្នក បន្តស្នង ជីវិតនយោបាយ ពីឪពុករបស់ខ្លួនដែរ។ កូនស្រីរបស់លោក Sharif នេះ ត្រូវបានតុលាការប៉ាគីស្ថាន កាត់ទោស នៅថ្ងៃសុក្រម្សិលមិញ ដាក់ក្នុងពន្ធនាគារចំនួន៧ ឆ្នាំ។
សូមបញ្ជាក់ថា អតីតនាយករដ្ឋមន្ត្រីប៉ាគីស្ថានលោក Sharif នាបច្ចុប្បន្ននេះ កំពុងតែរស់នៅក្នុងទីក្រុងឡុងដ្រ៏ ប្រទេសអង់គ្លេស ដើម្បីនៅជួយថែរក្សា ភរិយារបស់លោក ដែលកំពុងទទួលការព្យាបាលជម្ងឺ មហារីក នៅ ក្នុង មន្ទីរពេទ្យ។
គួររំលឹកថា កាលពីខែកក្កដាឆ្នាំ ២០១៧ កន្លងទៅនេះ តុលាកំពូល ប៉ាគីស្ថាន បានសម្រេចបញ្ចប់អណត្តិនាយករដ្ឋមន្ត្រីលើកទី៣ របស់លោក Sharif នៅមុនពេលកំណត់ បន្ទាប់ពីការបែកធ្លាយ នៅលើសំណុំរឿង អចលនទ្រព្រដ៏ប្រណិតជាច្រើនកន្លែងរបស់ក្រុមគ្រួសារលោកនៅទីក្រុងឡុងដ្រ៍ ដែលគេសង្ស័យថា ជាទ្រព្យសម្បត្តិលាក់លៀមរបស់គ្រួសារអតីតនាយករដ្ឋមន្ត្រីប៉ាគីស្ថាននេះ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ