របាយការណ៍របស់អ-ស-ប៖ ភូមាកំពុងបើកយុទ្ធនាការប្រឆាំងអ្នកកាសែត
អស់ពីរងការរិះគន់ថា បានធ្វើយុទ្ធនាការបោសសម្អាតជនជាតិភាគតិច ភូមា នៅដើមសប្តាហ៍នេះបានរងការចោទប្រកាន់មួយទៀត ថា កំពុងធ្វើយុទ្ធនាការប្រឆាំងនឹងអ្នកកាសែត។ នៅក្នុងរបាយការណ៍របស់ខ្លួនចេញផ្សាយកាលពីថ្ងៃអង្គារ ការិយាល័យសិទ្ធិមនុស្សរបស់អង្គការសហប្រជាជាតិ បានចោទប្រកាន់កងទ័ព និងរដ្ឋាភិបាលភូមាថា កំពុងយកច្បាប់ និងតុលាការ ធ្វើជាឧបករណ៍ប្រើប្រាស់ក្នុងយុទ្ធនាការបង្រ្កាប ក្រុមអ្នកកាសែតឯករាជ្យ។
ចុះផ្សាយនៅថ្ងៃ៖
ស្តាប់ - ០២:៣៨
នៅភូមា គ្មានទេ អ្នកកាសែតដែលធ្វើការងាររបស់ខ្លួន ដោយគ្មានការភ័យខ្លាច ឬដោយគ្មានជំនួយពីរដ្ឋាភិបាលនោះ។ នេះជាការវាយតម្លៃរបស់ការិយាល័យសិទ្ធិមនុស្សរបស់អង្គការសហប្រជាជាតិ នៅក្នុងរបាយការណ៍ចុងក្រោយរបស់ខ្លួន ដែលផ្តោតទៅលើសេរីភាពសារព័ត៌មាននៅប្រទេសភូមា។ របាយការណ៍របស់អង្គការសហប្រជាជាតិត្រូវបានចងក្រោយឡើង នៅក្រោយ អ្នកកាសែតជាតិភូមា ពីររូបដែល បម្រើការឲ្យទីភ្នាក់ងារព័ត៌មានអង់គ្លេស Reuters ត្រូវបានតុលាការភូមា ប្រកាសផ្តន្ទាទោសឲ្យជាប់ពន្ធនាគារ ៧ឆ្នាំ ក្នុងបទចោទប្រកាន់ រំលោភកិច្ចការសម្ងាត់រដ្ឋ នៅពេលពួកគេសរសេរ ស៊ើបអង្កេតលើវិបត្តិជនជាតិរ៉ូហ៊ីងយ៉ា នៅរដ្ឋរ៉ាឃីន។
សម្រាប់ការិយាល័យសិទ្ធិមនុស្សរបស់អង្គការសហប្រជាជាតិ ការផ្តន្ទាទោសលើអ្នកកាសែតភូមា ដោយសារតែពួកគេស៊ើបអង្កេតលើការសម្លាប់រង្គាលលើជនជាតិរ៉ូហ៊ីងយ៉ា គឺជាករណីចុងក្រោយមួយទៀត ដែលបង្ហាញថា ទាំងរដ្ឋាភិបាល និងយោធាភូមា បានប្រើគ្រប់មធ្យោបាយច្បាប់ និងរាល់យន្តការរបស់តុលាការ ដើម្បីចាប់ដាក់ទោសអ្នកកាសែតឯករាជ្យ ហើយនិងប្រភពអ្នកផ្តល់ព័ត៌មានឲ្យអ្នកកាសែត។ ជាក់ស្តែង ច្បាប់ស្តីពីសារទូរគមនាគមន៍ កិច្ចការសម្ងាត់រដ្ឋ សមាគមមិនត្រឹមត្រូវតាមច្បាប់ ឬ ច្បាប់ស្តីពីការនាំចូល ឬនាំចេញជាដើម ត្រូវបានអាជ្ញាធរភូមា ប្រើធ្វើជាហេតុផល សម្រាប់ប្រឆាំងនឹងអ្នកកាសែត។ របាយការណ៍របស់អង្គការសហប្រជាជាតិបានលើកឡើងពីឧទាហរណ៍ចាប់អ្នកកាសែត ដែលបានចុះទៅយកព័ត៌មានលើការដុតគ្រឿងញៀន នៅរដ្ឋស្ហាន ដែលគ្រប់គ្រងដោយកងទ័ពភាគតិច រំដោះជាតិ តា អាង (Ta’ang National Liberation Army)។ ទោះបីជាអ្នកកាសែត មិនបានសរសេររៀបរាប់ពីជម្លោះប្រដាប់អាវុធរវាង កងទ័ពភូមា និងកងទ័ពភាគតិច នៅរដ្ឋស្ហាន ប៉ុន្តែគ្រាន់តែសរសេរផ្សារភ្ជាប់ ពិធីដុតគ្រឿងញៀន របស់កងទ័ពភាគតិច ទៅ នឹងទិវាអន្តរជាតិស្តីពីការប្រយុទ្ធប្រឆាំងនឹងការប្រើប្រាស់ និងជួញដូរថ្នាំញៀន ក៏ធ្វើឲ្យអាជ្ញាធរភូមាចាប់ឃុំខ្លួនអ្នកកាសែត ក្នុងបទចោទប្រកាន់ផ្សំគំនិតជាមួយក្រុមខុសច្បាប់ដែរ។
នៅក្នុងសេចក្តីថ្លែងការណ៍ កាលពីថ្ងៃអង្គារ ប្រធានថ្មីរបស់ឧត្តមស្នងការសិទ្ធិមនុស្សរបស់អង្គការសហប្រជាជាតិ លោកស្រី Michelle Bachelet បានព្រមានថា ស្ថានភាព ចាប់ចងអ្នកកាសែត នៅភូមា នឹងធ្វើឲ្យលទ្ធិប្រជាធិបតេយ្យពិបាកនឹងកើតឡើង នៅភូមា។ លោកស្រី Bachelet បានអំពាវនាវឲ្យអាជ្ញាធរភូមា សើរើ កែប្រែច្បាប់ ដែលងាយនឹងប៉ះពាល់ដល់សិទ្ធិសេរីភាពបញ្ចេញមតិ ជាជាងប្រើច្បាប់ចាស់គំរិល និងប្រព័ន្ធតុលាការ ដើម្បីធ្វើបាបអ្នកកាសែត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ