ឥណ្ឌូណេស៊ី ៖ តុល្យការនៃជនរងគ្រោះកាន់តែធ្ងន់ធ្ងរឡើងៗ
គិតមកត្រឹមព្រឹកថ្ងៃអាទិត្យនេះ ចំនួនមនុស្សស្លាប់បានឡើងដល់យ៉ាងហោចណាស់ ៨៣២នាក់ នេះបើតាមភ្នាក់ងារគ្រប់គ្រងគ្រោះមហន្តរាយ ដែលបញ្ជាក់ថាតុល្យការនៃជនរងគ្រោះនឹងបន្តកើនឡើងថែមទៀត ដល់ចំនួនរាប់ពាន់នាក់។ ព្រោះការសង្គ្រោះទើបចាប់ផ្តើម ហើយម្យ៉ាងទៀតអាជ្ញាធរ គ្មានដំណឹងសោះពីក្រុង Dongala ភាគខាងជើងបំផុតនៃកោះ ដែលមានប្រជាជនរស់នៅជាងបីសែននាក់។ នៅក្នុងចំណោមជនបាត់ខ្លួនជាច្រើន មានបីនាក់ជាជនជាតិបារាំង កូរ៉េខាងត្បូងម្នាក់ និងម៉ាឡេស៊ីម្នាក់!
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ក្រុមសង្គ្រោះរាប់ពាន់នាក់ ជាប៉ូលិល ជាយោធា ជាអ្នកពន្លត់អគ្គិភ័យ បានចាប់ផ្តើមប្រតិបត្តិការសង្គ្រោះ។ លោកប្រធានាធិបតីឥណ្ឌូណេស៊ី យ៉ូកូ វីដូដូ Joko Widodo ក៏បានអញ្ជើញទៅដល់ក្រុងមាត់សមុទ្ទ Palu ដែលទើបរងគ្រោះមហន្តរាយរញ្ជួយដី និងរលកស៊ូណាមីហើយដែរ ដើម្បីចុះសង្កេតការណ៍មើលការដាក់ពង្រាយកងកម្លាំងទ័ព ជួយសង្គ្រោះប្រជាជនដោយផ្ទាល់។
ប្រទេសបារាំង បានប្រកាសត្រៀមផ្តល់ជំនួយដល់ឥណ្ឌូណេស៊ី។ នៅក្នុងសេចក្តីថ្លែងការណ៍ ប្រធានាធិបតីម៉ាក្រុង បានចូលរួមចែករំលែកក្តីទុក្ខក្រៀមក្រំនិងសាមគ្គីភាពជាមួយរដ្ឋាភិបាលឥណ្ឌូណេស៊ី និងជនរងគ្រោះ។ កាលពីខែសីហា ក្នុងពេលឥណ្ឌូណេស៊ីជួបមហន្តរាយរញ្ជួយដីនៅកោះឡំបុក បារាំងបានផ្តល់ជំនួយមនុស្សធម៌មួយយន្តហោះ។
មុនគ្រោះមហន្តរាយ ប៉ាឡូ ជាក្រុងដ៏ទំនើបនិងជឿនលឿន ល្បីល្បាញផ្នែកទេសចរណ៍ថ្មើរជើង និងលំហែមាត់សមុទ្ទ។ ប៉ុន្តែថ្ងៃនេះ គ្មានអ្វីនៅសល់ទៀតទេ ! ស្ពានលឿនជាតំណាងក្រុងបានបាក់លិច ចំណែកផ្លូវជាយុទ្ធសាស្ត្ររបស់ក្រុង ត្រូវដាច់ដោយការហូរបាក់ដី ... វិហារសាសនា មជ្ឈមណ្ឌលពាណិជ្ជកម្ម មន្ទីរពេទ្យជាច្រើន ត្រូវលង់លិច និងជាទីដែលត្រូវផ្តុំការរុករកក្រែងអាចមានអ្នករួចពីស្លាប់ជាប់កុនក្រោមបំណែកបាក់បែក។
ក្នុងពេលដែលប្រតិបត្តិការសង្គ្រោះកំពុងចាប់ផ្តើម ពលរដ្ឋមួយចំនួនដែលមិនអាចជម្លៀសចេញទាន់រស់នៅហាលវាលហាលថ្ងៃ ខ្វះសព្វខ្វះគ្រប់ គ្មានទាំងទឹកស្អាតបរិភោគ មានចំណួរជាច្រើនបានចោទឡើង ថាតើការរងគ្រោះធ្ងន់ធ្ងរខ្លាំងនេះ បណ្តាលមកពីឆាប់លើកអាសន្នស៊ូណាមីពេកទេដឹង ?! ក្រោយគ្រោះរញ្ជូយដី ដែលបានកើតឡើងនៅចម្ងាយប្រមាណ៧៨គីឡូម៉ែត្រពីក្រុងប៉ាឡូ មានការប្រកាសអាសន្នជាស្វ័យប្រវត្តិរលកស៊ូណាមីភ្លាម ប៉ុន្តែភាពអាសន្ននេះត្រូវបានលើកទៅវិញនៅប្រមាណតែ៣៤នាទីក្រោយ ... ឯរលកយក្សស៊ូណាមី បានចាប់វាយលើក្រុងនៅពីរបីម៉ោង ក្រោយការរញ្ជួយដី។ ប៉ុន្តែអាជ្ញាធរឥណ្ឌូណេស៊ីបានធានាអះអាងថារលកយក្សបានមកដល់មុនទេ !
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ