ឥណ្ឌា៖មានស្លាប់ចំនួន ១១នាក់នៅក្នុងការប្រឈមមុខដាក់គ្នានៅតំបន់កាស្មៀរឥណ្ឌា
នៅក្នុងតំបន់កាស្មៀរឥណ្ឌា មានមនុស្សស្លាប់ចំនួន ១១នាក់ ក្នុងនោះមានជនស៊ីវិល ៧នាក់ ពួកឧទ្ទាម ៣នាក់ និងទាហានម្នាក់នាថ្ងៃសៅរ៍ ទី១៥ ធ្នូ។ កងទ័ពបានបើកការបាញ់រះលើហ្វូងបាតុករ បន្ទាប់ពីមានការបាញ់ប្រហារត តាំងគ្នារវាងកងទ័ព និងពួកឧទ្ទាមអ្នកទាមទារផ្តាច់ទឹកដី នេះបើយោងតាមប្រភពពីកម្លាំងសមត្ថកិច្ច និងអ្នកទទួលខុសត្រូវមន្ទីរពេទ្យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ការបាញ់ប្រហារបានកើតមានឡើងនៅក្នុងតំបន់ពូលវ៉ាម៉ាក្នុងពេលដែលកម្លាំងទ័ពកំពុងឡោមព័ទ្ធផ្ទះមួយដែលពួកឧទ្ទាមកំពុងលាក់ខ្លួន។ នៅក្នុងការបាញ់ប្រហារនោះ មានស្លាប់មនុស្ស ៥នាក់ គឺឧទ្ទាមអ្នកទាមទារផ្តាច់ទឹកដីនិយមចំនួន ៣នាក់ អតីតទាហានម្នាក់ដែលបានចូលរួមជាមួយពួកឧទ្ទាម និងទាហានរដ្ឋាភិបាលម្នាក់។ តែក្នុងពេលកើតមានការបាញ់ប្រហារ គេឃើញមានពលរដ្ឋប្រមាណជា ១០០នាក់បាននាំគ្នាដើរតាមផ្លូវឆ្ពោះទៅកាន់ផ្ទះដែលពួកឧទ្ទាមលាក់ខ្លួនជាមួយនឹងសម្រែកគាំទ្រពួកអ្នកទាមទារផ្តាច់ទឹកដី។ គឺពេលនោះហើយដែលការប្រឈមមុខដាក់គ្នារវាងពលរដ្ឋទាំងនោះ និងកម្លាំងទ័ពបានផ្ទុះឡើងយ៉ាងហិង្សា។
ប៉ូលិសម្នាក់មិនព្រមបញ្ចេញឈ្មោះឲ្យដឹងថា កងទ័ពបានបើកការបាញ់រះសំដៅត្រង់លើពលរដ្ឋទាំងនោះដោយបណ្តាលឲ្យស្លាប់ចំនួន ៧នាក់ គឺ ៦នាក់ស្លាប់ភ្លាមនៅនឹងកន្លែងកើតហេតុ និងម្នាក់ទៀតបានស្លាប់នៅក្នុងមន្ទីរពេទ្យ ក្រោយពីបានរងរបួសធ្ងន់។ អំពើហិង្សាថ្មីនៅតំបន់កាស្មៀរឥណ្ឌានេះបានធ្លាក់មក ចំពេលដែលឆ្នាំ ២០១៨ ជិតបិទបញ្ចប់ជាមួយនឹងចំនួនមនុស្សស្លាប់ជិត ៥៥០នាក់ ក្នុងនោះមានជនស៊ីវិលប្រមាណជា ១៥០នាក់។ គឺជាតួលេខមួយខ្ពស់គិតតាំងពីឆ្នាំ ២០០៩។ យោងតាមអ្នកទទួលខុសត្រូវសន្តិសុខនៃតំបន់កាស្មៀឥណ្ឌា មានស្លាប់ពួកឧទ្ទាមចំនួន ២៣០នាក់គិតតាំងពីដើមឆ្នាំ ២០១៨ ហើយពួកគេជាភាគច្រើនជាអ្នករស់នៅក្នុងតំបន់កាស្មៀរ។
គួររម្លឹកថាតាំងពីក្រោយការបិទបញ្ចប់អាណានិគមនិយមអង់គ្លេសក្នុងឆ្នាំ ១៩៤៧ តំបន់កាស្មៀត្រូវបានពុះចែកជាពីរ គឺម្ខាងជារបស់ប្រទេសឥណ្ឌា និងម្ខាងទៀតជារបស់ប្រទេសប៉ាគីស្ថាន។ តែរហូតមកដល់សព្វថ្ងៃ តំបន់មួយនេះកំពុងបន្តទាមទារផ្តាច់មុខពីទីក្រុងញូដែលី និងពីទីក្រុងអ៊ីស្លាម៉ាបាត។ ឥណ្ឌាដែលតែងប្រឈមនឹងអំពើហិង្សាបង្កដោយពួកឧទ្ទាមផ្តាច់ទឹកដីនិយមក្នុងតំបន់កាស្មៀរឥណ្ឌាតែងចង្អុលមុខប៉ាគីស្ថានពីបទគាំទ្រ និងបំពាក់អាវុធឲ្យពួកឧទ្ទាមផ្តាច់ទឹកដីនិយមនោះ។ សព្វថ្ងៃ ឥណ្ឌាបានដាក់ពង្រាយកម្លាំងទ័ពប្រមាណជា ៥០០ ០០០នាក់នៅក្នុងតំបន់កាស្មៀដែលខ្លួនកំពុងកាន់កាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ