អាស៊ានសន្យារួមគ្នាប្រឆាំងនឹងការបំពុលសមុទ្ទ តែគ្មានវិធានការច្បាស់
ក្រុមប្រទេសជាសមាជិកសមាគមអាស៊ីអាគ្នេយ៍ ដែលស្ថិតក្នុងចំណោមក្រុមប្រទេសបំពុលបរិស្ថានផែនដីដ៏ធំជាងគេ ត្រូវចុះកិច្ចព្រមព្រៀងនៅថ្ងៃអាទិត្យ ក្នុងឱកាសបិទជំនួបប្រជុំអាស៊ាននៅទីក្រុងបាងកក លើកិច្ចសន្យាប្រយុទ្ធប្រឆាំងនឹងការបំពុលសមុទ្ទ។ ជាកិច្ចសន្យាដែលពុំធ្លាប់មានពីមុនមកទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
បើតាមគម្រោងសេចក្តីថ្លែងការណ៍ “សេចក្តីថ្លែងការណ៍បាងកក” ដែលភ្នាក់ងារព័ត៌មានបារាំងទទួលបានតាំងពីល្ងាចថ្ងៃសៅរ៍មក ក្រុមប្រទេសសមាជិកអាស៊ានទាំង១០ បានព្រមព្រៀងគ្នាសន្យាកាត់បន្ថយសំរាមក្នុងផ្ទៃសមុទ្ទរបស់ខ្លួនរៀងៗខ្លួន ឱ្យបានគួរជាទីកត់សម្គាល់។ ប៉ុន្តែជាញឹកញយ សេចក្តីថ្លែងការណ៍អាស៊ាននេះ ក៏ដូចជាសេចក្តីថ្លែងការណ៍មុនៗ គ្មានបញ្ជាក់អំពីវិធានការជាក់ស្តែងសម្រាប់អនុវត្ត ឬប្រព័ន្ធដាក់ពិន័យប្រឆាំងនឹងប្រទេសបំពុលបរិស្ថានខ្លាំងទេ។
សកម្មជនគាំទ្របរិស្ថាន សម្តែងការខកចិត្តនិងសង្ស័យចំពោះប្រសិទ្ធភាពអនុវត្តយ៉ាងខ្លាំង។ អ្នកបរិស្ថានធ្លាប់បរិហារ តាំងពីជាច្រើនមកហើយអសកម្មភាពរបស់រដ្ឋាភិបាលអាស៊ាននីមួយៗ ដូចជាគ្មាននយោបាយថែរក្សាបរិស្ថាន និងគ្មានកិច្ចសន្យាប្រយុទ្ធប្រឆាំងនឹងការប្រើប្រាស់ថង់ប្លាស្ទិកទេ។ ប្រសិនបើគ្មានការកាត់បន្ថយការប្រើប្រាក់ថង់ប្លាស្ទិកទេ « សេចក្តីថ្លែងការណ៍បាងកក” ពិតជាគ្មានប្រយោជន៍ឡើយ ! នេះជាប្រតិកម្មរបស់តំណាងអង្គការGreenpeace ថៃ។ ថៃគឺជាគំរូអាក្រក់ជាងមួយ ក្នុងយុទ្ធនាការប្រយុទ្ធប្រឆាំងនឹងថង់ប្លាស្ទិក ដោយនៅតែបន្តផ្តល់ស្បោងប្លាស្ទិកនៅគ្រប់ហាង។
រូបភាពអណ្តើកស្លាប់នៅឆ្នេរថៃ ប្រលាយគដោយសំរាមប្លាស្ទិកនៅហ្វីលីពីន ឆ្នេរគ្របដោយសំរាមនៅវៀតណាមនិងកម្ពុជា មានផ្សព្វផ្សាយពេញពិភពលោក ដាស់សតិសាធារណជន តែរដ្ឋាភិបាលប្រទេសក្នុងតំបន់នេះគ្មានចំណាត់ការច្បាស់លាស់សោះ។
អាស៊ាន ដែលមានសមាជិក១០ប្រទេស គឺម៉ាឡេស៊ី ឥណ្ឌូណេស៊ិ សិង្ហបុរី ថៃ ហ្វីលីពីន ព្រុយណេ វៀតណាម ឡាវ ភូមា និងកម្ពុជា ជាតំណាងប្លុកសេដ្ឋកិច្ចលំដាប់ទី៥នៅលើពិភពលោក បន្ទាប់ពីសហភាពអឺរ៉ុប សហរដ្ឋអាមេរិក ចិននិងជប៉ុន។ អាស៊ានតំណាងឱ្យ៩%នៃជប្រជាជនពិភពលោក (៦៥០លាននាក់) ប៉ុន្តែអាស៊ានតែបួនប្រទេសបូកនឹងចិនមួយទៀត គឺជាអ្នកបញ្ចេញសំរាមដ៏ច្រើនជាងគេ ដល់ទៅជាងពាក់កណ្តាលនៃសំរាម ក្នុងសមុទ្ទលើភពផែនដី ទាំងមូល។ ពោលគឺ ក្នុងមួយឆ្នាំៗ ចិន ឥណ្ឌូណេស៊ី ហ្វីលីពីន វៀតណាម និងថៃ តែប្រាំប្រទេសនេះ ជាអ្នកចោលសំរាមប្លាស្ទិក ជាងបួនលានតោនទៅក្នុងសមុទ្ទក្នុងមួយឆ្នាំៗ ក្នុងចំណោមសំរាម សរុបប្រមាណជាង៨លានតោន។ នេះបើតាមរបាយការណ៍ឆ្នាំ២០១៧ របស់អង្គការក្រៅរដ្ឋាភិបាល Ocean Conservancy។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ