ប្រទេសឥណ្ឌារម្លឹកថា បញ្ហាកាស្មៀរជាកិច្ចការផ្ទៃក្នុងរបស់ឥណ្ឌា
ក្រោយពីរដ្ឋាភិបាលឥណ្ឌាបានសម្រេចដកស្វ័យភាពពីតំបន់កាស្មៀរមក ទំនាក់ទំនងរវាងប្រទេសឥណ្ឌា និងប្រទេសប៉ាគីស្ថានកំពុងឡើងតានតឹងដល់កំពូល។ នៅថ្ងៃសុក្រ ទី៩ សីហាដែលចំថ្ងៃសូត្រធម៌របស់អ្នកកាន់សាសនាអ៊ីស្លាម ឥណ្ឌាបានប្រកាសដាក់កងទ័ពក្នុងកម្រិតអាសន្នខ្ពស់បំផុតដើម្បីប្រឈមទប់នឹងក្បួនបាតុកម្មជាយថាហេតុ។ ចំណែកប្រទេសប៉ាគីស្ថានដែលកំពុងបន្តទាមទារតំបន់កាស្មៀរជាទឹកដីរបស់ខ្លួនកំពុងបន្តចេញមុខតវ៉ា និងរៀបចំប្តឹងស្ថាប័នអន្តរជាតិប្រឆាំងនឹងការសម្រេចចិត្តជាអន្តោម័តរបស់ឥណ្ឌា។ អ្វីដែលសហគមន៍អន្តរជាតិកំពុងបារម្ភពេលនេះ គឺការផ្ទុះសង្រ្គាមជាថ្មីរវាងឥណ្ឌា និងប៉ាគីស្ថានដែលអាចបង្កផលវិបាកនៅក្នុងតំបន់ និងអន្តរជាតិ។ គួររម្លឹកថា ប្រទេសទាំងពីរធ្លាប់ធ្វើសង្រ្គាមនឹងគ្នាចំនួន ៣ដងទាក់ទងនឹងតំបន់កាស្មៀរ។ យ៉ាងណាក៏ដោយ ឥណ្ឌាតាមរយៈឯកអគ្គរដ្ឋទូតរបស់ខ្លួនប្រចាំក្រុងប៉ារីស ប្រទេសបារាំងលោកវីនេ ម៉ូហាន ក្វាត្រាបានរម្លឹកថា បញ្ហាកាស្មៀរជាកិច្ចការផ្ទៃក្នុងរបស់ឥណ្ឌា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
« វិធានការមួយនេះរបស់រដ្ឋាភិបាលឥណ្ឌា គឺជាកិច្ចការផ្ទៃក្នុងរបស់ឥណ្ឌាដែលគ្មានជាប់ពាក់ព័ន្ធនឹងស្ថានភាពនៅក្នុងទមបន់ឡើយ។ ប្រសិនបើអស់ លោកក្រឡេកមើលប្រវត្តិនៃតំបន់ អស់លោកនឹងយល់ភ្លាមអំពីមូលហេតុពិតដែលនាំឲ្យមានការផ្ទុះសង្រ្គាមចំនួន ៣ដងរវាងឥណ្ឌា និងប៉ាគីស្ថាន។ សង្រ្គាមទាំង ៣ បានបង្កចេញ និងមានមូលដ្ឋានចេញពីសកម្មភាពភេរវនិយមនៅតាមព្រំដែន។ ការសម្រេចចិត្តរបស់រដ្ឋាភិបាលឥណ្ឌាក្នុងការដកស្វ័យភាពចេញពីតំបន់កាស្មៀរពេលនេះនឹងមិនធ្វើឲ្យប៉ះពាល់ដល់បញ្ហាព្រំដែនដែលបានកំណត់នៅក្នុងកិច្ចព្រមព្រៀងឆ្នាំ ១៩៧២ រវាងឥណ្ឌា និងប៉ាគីស្ថានឡើយ។
ដូច្នេះ ព្រំដែនផ្នែកខាងក្រៅនៅលើខ្សែបន្ទាត់ត្រួតពិនិត្យមិនត្រូវបានប៉ះពាល់ទេ ពោលគឺនៅដដែលគ្មានប្រែប្រួល។ អ្នកជិតខាងរបស់យើងនៅម្ខាងទៀតនៃព្រំដែនហាក់មានទំនោរបង្ហាញចេញនូវទស្សនៈភ័យរន្ធត់អំពីអង្គហេតុ និងចាត់វិធានការជាលក្ខណៈឯកតោភាគី។ យើងមានការសោកស្តាយលើការយល់ឃើញ និងចំណាត់ការរបៀបនេះរបស់អ្នកជិតខាងរបស់យើង។ យើងមិនបានគិតថាវានឹងមានស្ថានការណ៍អស្ថិរភាពដូចដែលអ្នកខ្លះបានរៀបរាប់នោះទេ។
តែទោះជាយ៉ាងនេះក្តីខ្ញុំចង់គូសបញ្ជាក់ថា យើងនឹងបន្តមានការប្រុងប្រយ័ត្នខ្ពស់ និងយកចិត្តទុកដាក់ចំពោះស្ថានភាពសន្តិសុខ។ ដូចខ្ញុំបាននិយាយរួចហើយថា ភាពវឹកវរអាចកើតចេញពីសកម្មភាពភេរវនិយមតាមព្រំដែន។ យើងនឹងមិនធ្វេសប្រហែស លេងសើចជាមួយនឹងសន្តិសុខឡើយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ