ASEAN សម្តែងការព្រួយបារម្ភខ្លាំង ជុំវិញជម្លោះក្នុងដែនសមុទ្រចិនខាងត្បូង
រដ្ឋមន្ត្រីការបរទេសទាំង១០ នៃសហគមអាស៊ាន បានផ្ញើរលិខិតមួយទៅកាន់រដ្ឋាភិបាលចិន ដើម្បីសម្តែងការព្រួយបារម្ភ ពីស្ថានការជម្លោះនៅក្នុងដែនសមុទ្រចិនខាងត្បូង។ សមាជិកនៃសហគមអាស៊ាន បានទទូចឲ្យមានការរក្សាជំហរ មិនប្រើហិង្សា រងចាំគោរពទៅតាមការសម្រេចរបស់ស្ថាប័នអន្តរជាតិ មានសមត្ថកិច្ចជុំវិញការដោះស្រាយជម្លោះដែនទឹក រវាងប្រទេសចិន និងប្រទេសសមាជិកអាស៊ាន មួយចំនួន។
ចុះផ្សាយនៅថ្ងៃ៖
ស្តាប់ - ០១:៤៨
ឆ្លៀតក្នុងឱកាសជំនួបវិសាមញ្ញ រវាងរដ្ឋមន្ត្រីការបរទេសអាស៊ានទាំង១០ ជាមួយរដ្ឋមន្ត្រីការបរទេសចិន នៅទីក្រុងគុនមីង ប្រទេសសមាជិកសហគមអាស៊ាន បានរួមគ្នា ធ្វើលិខិត ប្រគល់ជូនរដ្ឋាភិបាលចិន។ នៅក្នុងលិខិតនោះ បានបញ្ជាក់អំពីការព្រួយបារម្ភកាន់តែខ្លាំងឡើងៗ របស់សមាជិកអាស៊ាន ជុំវិញការឡើងកំដៅ នៅតំបន់ឈូងសមុទ្រចិនខាងត្បូង។
ខ្លឹមសារលិខិតបញ្ជាក់ថា សហគមអាស៊ាន កំពុងព្រួយបារម្ភ អំពីជម្លោះនៅក្នុងដែនទឹកសមុទ្រចិនខាងត្បូង ក្រោយមានចំណាត់ការអត្តនោម័តរបស់អាជ្ញាធរចិន។ ចំណាត់ការទាំងនោះ អាចនឹងប៉ះពាល់ ដល់ស្ថិរភាព សន្តិភាព ក្នុងតំបន់ទាំងមូល។ ដោយមិនបានបញ្ជាក់ឲ្យបានច្បាស់អំពីចំណាត់ការរបស់ចិន លិខិតរបស់សហគមអាស៊ាន គ្រាន់តែបានលើកឡើងថា សហគមអាស៊ាន មានឆន្ទៈការពារសន្តិសុខ ស្ថិរភាព សេរីភាពនៃការធ្វើចរាចរណ៍ មិនថាចរាចរណ៍ហោះហើរផ្លូវអាកាស រឺចរាចរណ៍ផ្លូវទឹក នៅក្នុងលំហរនៃសមុទ្រចិនខាងត្បូង ដោយគោរពទៅតាមបទដ្ឋានបញ្ញតិ្តអន្តរជាតិ ជាធរមាន រួមទាំងសន្ធិសញ្ញារបស់អង្គការសហប្រជាជាតិ ស្តីពីនីតិសមុទ្រ ក្នុងឆ្នាំ១៩៨២ផងដែរ។
លិខិតរបស់សហគមអាស៊ាន ក៏បានលើកឡើងផងដែរ ពីសារៈសំខាន់ ក្នុងការទទួលស្គាល់នូវសេចក្តីសម្រេចរបស់អាជ្ញាធរអន្តរជាតិមានសមត្ថកិច្ច ចៀសវាងការធ្វើសកម្មភាពហិង្សាដោយអត្តនោម័ត។ សូមបញ្ជាក់ថា តុលារការអាជ្ញារកណ្តាលអចិន្ត្រៃយ៍ ប្រចាំការនៅទីក្រុងឡាអេ បានទទួលពាក្យបណ្តឹងរបស់ហ្វីលីពីន ទាក់ទិនទៅនឹងជម្លោះដណ្តើមដែនកោះ និងដែនទឹកជាមួយចិន។
ដោយឡែក នៅថ្ងៃអង្គារទី ១៤មិថុនា យន្តហោះចម្បាំងរបស់វៀតណាមមួយគ្រឿង ដែលមានអ្នកបើកបរ២នាក់ បានបាត់ចេញពីរ៉ាដា នៅភាគកណ្តាលប្រទេស។ បើតាមការចុះផ្សាយរបស់ សារព័ត៌មានវៀតណាម បានអះអាងថា យន្តហោះចម្បាំងបានធ្លាក់នៅក្នុងសមុទ្រ ភាគខាងកើតកោះ ហុងម៉ាត។ ទោះយ៉ាងណា អាជ្ញាធរវៀតណាម នៅមិនទាន់អះអាងថា យន្តហោះពិតជាបានធ្លាក់ពិតមែន រឺយ៉ាងណាទេ ហើយមួយវិញទៀត គេក៏មិនទាន់ដឹងថា យន្តហោះចម្បាំងវៀតណាមនេះ ធ្លាក់ដោយសារមានបញ្ហាបច្ចេកទេស រឺមួយក៏ត្រូវកងទ័ពចិនបាញ់ទម្លាក់នោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ