កូរ៉េខាងជើងអះអាងពីការសាកល្បងជោគជ័យនូវម៉ាស៊ីនថ្មីសម្រាប់គ្រាប់មីស៊ីលអន្តរទ្វីប
កូរ៉េខាងជើងបន្តផ្គើនសហគមន៍អន្តរជាតិដោយបានប្រកាសឲ្យដឹងនៅថ្ងៃសៅរ៍ ទី៩ មេសានេះថា ខ្លួនបានធ្វើការសាកល្បងប្រកបដោយជោគជ័យនូវម៉ាស៊ីនថ្មីមួយសម្រាប់បំពាក់ឲ្យគ្រាប់មីស៊ីលអន្តរទ្វីប។ ក៏ដូចនៅក្នុងការបាញ់សាកល្បងគ្រាប់មីស៊ីលអន្តរទ្វីបចុងក្រោយដែរ ការសាកល្បងម៉ាស៊ីនថ្មីនេះត្រូវបានធ្វើឡើងក្រោមការចូលរួមត្រួតពិនិត្យផ្ទាល់របស់មនុស្សខ្លាំងកូរ៉េខាងជើងគីម ជុនអ៊ុន។ ម្យ៉ាងទៀត ការសាកល្បងម៉ាស៊ីនថ្មីថ្ងៃនេះត្រូវបានធ្វើឡើង ១ខែមុនការបើកសមាជរបស់គណបក្សកុម្មុនិស្តក្រុងព្យុងយ៉ាង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
តាំងពីដើមឆ្នាំ ២០១៦ នេះមក កូរ៉េខាងជើងបានធ្វើផ្គរធ្វើភ្លៀងដាក់សហគមន៍អន្តរជាតិច្រើនណាស់។ បន្ទាប់ពីបានប្រកាសពីការសាកល្បងនុយក្លេអ៊ែរ និងបាញ់សាកល្បងគ្រាប់មីស៊ីលចម្ងាយជិត និងមធ្យមប្រកបដោយជោគជ័យមក ឥឡូវនេះ របបក្រុងព្យុងយ៉ាងបានប្រកាសឲ្យដឹងពីការសាកល្បងប្រកបដោយជោគជ័យនូវម៉ាស៊ីនថ្មីមួយសម្រាប់បំពាក់ឲ្យគ្រាប់មីស៊ីលអន្តរទ្វីប។ មនុស្សខ្លាំងកូរ៉េខាងជើងគីម ជុនអ៊ុនដែលបានចូលរួមត្រួតពិនិត្យការសាកល្បងផ្ទាល់បានថ្លែងថា ម៉ាស៊ីនថ្មីនោះនឹងអាចបាញ់បញ្ជូនគ្រាប់មីស៊ីលអន្តរទ្វីបបំពាក់ដោយក្បាលនុយក្លេអ៊ែររហូតដល់ទឹកដីអាមរិកាំង និងទឹកដីរបស់បច្ចាមិត្តផ្សេងទៀត។
ទង្វើថ្មីរបស់ក្រុងព្យុងយ៉ាងពេលនេះនឹងរឹតតែធ្វើឲ្យស្ថានការណ៍នៅក្នុងឧបទ្វីបកូរ៉េដែលកំពុងតានតឹងស្រាប់កាន់តែឡើងកម្តៅមួយកម្រិតថែមទៀត។ គ្រាន់តែនៅប៉ុន្មានខែដើមឆ្នាំ ២០១៦ នេះ របបក្រុងព្យុងយ៉ាងបានធ្វើការសាកល្បងនុយក្លេអ៊ែរ និងបាញ់គ្រាប់មីស៊ីលជាច្រើនដង ហើយជាទូទៅ គឺតែងតែទទួលបានការថ្កោលទោស និងដាក់ទ័ណ្ឌកម្មពីប្រទេសបស្ចិមលោកក៏ដូចពីសហគមន៍អន្តរជាតិ។ ថ្មីៗនេះទៀត ចិនដែលជាសម្ព័ន្ធមិត្តចាក់ទឹកមិនលេចរបស់កូរ៉េខាងជើងក៏បានចាត់វិធានការទ័ណ្ឌកម្មពាណិជ្ជកម្មលើក្រុងព្យុងយ៉ាងដែរ។ តែបញ្ហានៅត្រង់ថា កូរ៉េខាងជើងហាក់មិនឈឺក្បាលសោះឡើយ។
យ៉ាងណាក៏ដោយ ក្រុមអ្នកជំនាញអន្តរជាតិមិនសូវជាមានជំនឿប៉ុន្មានទេលើការប្រកាសរបស់កូរ៉េខាងជើងនាពេលកន្លងមក ទាំងនៅក្នុងបញ្ហានុយក្លេអ៊ែរ គ្រាប់មីស៊ីល ឬមួយក៏សមត្ថភាពយោធា។ ក្រុមអ្នកជំនាញអន្តរជាតិយល់ឃើញថា អ្វីដែលរបបក្រុងព្យុងយ៉ាងបាន និងកំពុងធ្វើនារយៈពេលប៉ុន្មានខែចុងក្រោយនេះ គឺដើម្បីលើកដំកើនតម្លៃរបស់គណបក្សកម្មុយនិស្ត ក៏ដូចជាបង្ហាញពីស្នាដៃរបស់មនុស្សខ្លាំងគីម ជុនអ៊ុននៅមុនថ្ងៃបើកសមាជដែលគ្រោងរៀបចំនាថ្ងៃទី៧ ឧសភាខាងមុខ។ គឺជាសមាជលើកទី១ បើគិតតាំងពី ៣៦ឆ្នាំកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ