រញ្ជួយដីនៅនេប៉ាល់ អ្នកស្លាប់កើនជិត១០០០នាក់
គ្រោះរញ្ជួយដី ក្នុងកម្រិត ៧,៨ រីឆទ័រ ដែលបានកើតឡើងក្នុងប្រទេសនេប៉ាល់ បានធ្វើឲ្យមានអ្នកស្លាប់កាន់តែច្រើន។ ចំនួនអ្នកស្លាប់ ជាបណ្តោះអាសន្ន បានកើនឡើងដល់ ៨៧៦នាក់ នៅទូទាំងប្រទេស ហើយក្រុមសង្គ្រោះ កំពុងធ្វើការយ៉ាងញាប់ដៃដើម្បីស្វែងរកអ្នកនៅរស់ ដែលកប់ជាប់ក្នុងគំនរបាក់បែក។ ដោយឡែក រដ្ឋាភិបាលបារាំង និង ឥណ្ឌា បានបញ្ជាក់ថា និងត្រៀមផ្តល់ជាជំនួយ ដល់នេប៉ាល់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ការរុករកសាកសព នៅមិនទាន់បញ្ចប់នៅឡើយ ចំណែកប្រព័ន្ធទំនាក់ទំនង ត្រូវបានកាត់ផ្តាច់ស្ទើរតែទាំងស្រុង ដែលជាហេតុធ្វើឲ្យ មានការលំបាក ក្នុងការស្រង់ចំនួនអ្នកស្លាប់។ ក្រសួងមហាផ្ទៃ នេប៉ាល់ បានប្រកាសថា ចំនួនអ្នកស្លាប់ ជាបណ្តោះអាសន្ននាពេលនេះ បានកើនឡើងដល់ ៨៧៦នាក់ ហើយ នៅទូទាំងប្រទេស។
ទីក្រុង កាតម៉ាន់ឌូ ដែលមានប្រជាជនរស់នៅជិត ៣លាននាក់ បានរងការខូចខាតជាដំណំ ដោយសារតែនៅចំងាយប្រមាណតែ ៨០គីឡូមែត្រ ពីចំណុចរញ្ជួយកណ្តាល។ សំណង់អាគារបូរាណ នៅទីលាន ដាកបារ ក្នុងទីក្រុងកាតម៉ាន់ឌូ ដែលត្រូវបានចាត់បញ្ចូលជាបិតិកភណ្ឌពិភពលោក ត្រូវបានដួលរលំស្ទើរតែរាបដល់ដី។ ចំណែកអាគារបង្គោលខ្ពស់ ដារាហារា ដែលជានិមិត្តរូប ទីក្រុងកាតម៉ាន់ឌូ ក៏រលំដួលទាំងស្រុងដែរ។ គេបានទាញសាកសពមនុស្ស ជាង១០នាក់ ដែលត្រូវអាគារនេះបាក់សង្កត់។ ដោយឡែក អាកាសយានដ្ឋានអន្តរជាតិក្រុងកាតម៉ាន់ឌូ ត្រូវបានបិទជាបណ្តោះអាសន្ន។
មន្រ្តីទូតនេប៉ាល់ម្នាក់ ដែលប្រចាំការនៅក្រុងញូដេលី បានបញ្ជាក់ថា អ្នកយកព័ត៌មានបារាំងថា មិនមែនមានតែក្រុងកាតម៉ាន់ឌូមួយទេ ដែលរងការខូចខាត ប៉ុន្តែ ប្រទេសនេប៉ាល់ស្ទើរតែទាំងមូល បានរងការខូចខាត ដោយសារគ្រោះរញ្ជួយដីនេះ។ សំណង់អាគារនៅនេប៉ាល់ ដែលមិនត្រូវបានសាងសង់ ឲ្យរឹងមាំតាមបច្ចេកទេសមានច្រើនណាស់ ហើយដែលងាយបាក់រលំជាទីបំផុត។
សូមបញ្ជាក់ថា គ្រោះរញ្ជួយដីដែលមានកំរិត ៧,៨ រីឆទ័រនេះ ជារញ្ជួយដីកម្រិតធ្ងន់បំផុតមិនធ្លាប់មាន នៅក្នុងប្រទេសនេប៉ាល់ ចាប់តាំងពីឆ្នាំ ១៩៣៤មក ដែលកាលនោះ គ្រោះរញ្ជួយដី មានកំរិត ៨រីឆទ័រ ហើយបានសម្លាប់ជីវិតមនុស្ស ទាំងអស់ ជិត ២ម៉ឺននាក់។ ដូចសពដងដែរ គ្រោះរញ្ជួយដី ដែលមានចំណុចស្នូលកណ្តាល នៅប្រទេសនេប៉ាល់នេះ ក៏បានបង្កការខូចខាត នៅប្រទេសជិតខាងផងដែរ។
បើតាមតួលេខបណ្តោះអាសន្ននាពេលនេះ មានមនុស្សយ៉ាងហោចណាស់ ជាង២៦នាក់ នៅប្រទេសឥណ្ឌា និង២នាក់ នៅតំបន់ទីបេប្រទេសចិន បានស្លាប់បាត់បង់ជីវិត។ ជាមួយគ្នានេះ ការរញ្ជួយដីនេះ ក៏បានបង្កជាការរលំ បាក់ផ្ទាំងទឹកកក នៅលើភ្នំអេវើរ៉េស ហើយបានសម្លាប់មនុស្សយ៉ាងហោចណាស់ ១០នាក់ផងដែរ។
យ៉ាងណាមិញ លោកនាយករដ្ឋមន្រ្តីឥណ្ឌា បានថ្លែងថា ឥណ្ឌា ត្រៀមខ្លួនជួយប្រទេសនេប៉ាល់ ដែលកំពុងតែត្រូវការជំនួយបន្ទាន់។ ដូចគ្នាដែរ លោកប្រធានាធិបតីបារាំង ហ្រ្វង់ស្វ័រ ហូឡង់ បានថ្លែងនៅរសៀលថ្ងៃ សុក្រម្សិលមិញថា បារាំង ត្រៀមបញ្ជូនក្រុមសង្រ្គោះ និងសម្ភារៈ ទៅជួយជនរងគ្រោះ នៅប្រទេសនេប៉ាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ