ចិន សង្ស័យថាកូរ៉េខាងជើង មានក្បាលនុយក្លេអ៊ែរ ២០គ្រាប់
អ្នកជំនាញការផ្នែកនុយក្លេអ៊ែររបស់ចិន បានអះអាងថា បើតាមការស្រាវជ្រាវ កូរ៉េខាងជើង ប្រហែលជាផលិតបាន ក្បាលគ្រាប់បែកនុយក្លេអ៊ែរចំនួន ២០គ្រាប់ហើយ ហើយសកម្មភាពផលិត កំពុងតែបន្តទៅមុខ យ៉ាងសកម្ម។ នេះជាតួលេខ ដែលខ្ពស់បំផុតមិនធ្លាប់មាន ដែលផ្តល់ឲ្យដោយអ្នកជំនាញការចិន។ ក្នុងន័យនេះ នយោបាយរបស់ប្រទេសមហាអំណាច ដែលព្យាយាមបញ្ចុះបញ្ចូលកូរ៉េខាងជើង ថាឲ្យឈប់ ចំរាញ់ជាតិអ៊ុយរ៉ានីញ៉ូម គឺគ្មានបាលលទ្ធផលអ្វីទាំងអស់។ គ្មានអ្វីអាចបញ្ឈប់មហិច្ឆិតានុយក្លេអ៊ែរ របស់កូរ៉េខាងជើងបានទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
អ្នកជំនាញការផ្នែក ថាមពលបរមាណូ រឺនុយក្លេអ៊ែរ របស់ចិន បានជួបប្រជុំគ្នា កាលពីខែកុម្ភៈ ជាមួយក្រុមអ្នកជំនាញនុយក្លេអ៊ែរអាមេរិក។ បើយោងតាម សារព័ត៌មាន Wall Street Journal បានចុះផ្សាយថា អ្នកជំនាញការចិន បានផ្តល់តួលេខថ្មីថា កូរ៉េខាងជើងបច្ចុប្បន្ន បានផលិតក្បាលគ្រាប់បរមាណូ ចំនួន ២០គ្រាប់ ហើយមិនត្រឹមតែប៉ុណ្ណោះ សកម្មភាពផលិត កំពុងតែដំណើរការទៅ យ៉ាងសកម្ម។ កន្លងមក ក្រុមជំនាញការអាមេរិក បានធ្វើការប៉ាន់ស្មានថា កូរ៉េខាងជើង អាចផលិតក្បាលគ្រាប់បែកនុយក្លេអ៊ែរ ចំនួន ពី១០ ទៅ១៦ គ្រាប់។
លោក Siegfried Hecker អ្នកជំនាញជាន់ខ្ពស់ក្នុងកម្មវិធីនុយក្លេអ៊ែរ ដែលបានតាមដានយ៉ាងជាប់ស្អិត ទៅលើសកម្មភាពផលិតជាតិអ៊ុយរ៉ានីញ៉ូម របស់កូរ៉េខាងជើង បានថ្លែងថា តួលេខនេះ សរបញ្ជាក់ថា នយោបាយបញ្ចុះបញ្ចូលរបស់ប្រទេសមហាអំណាច ទៅលើកូរ៉េខាងជើង ឲ្យបោះបង់ការចំរាញ់ជាតិអ៊ុយរ៉ានីញ៉ូម គ្មានបានលទ្ធផលទេ គឺមានតែធ្ងន់ធ្ងរទៅ ព្រោះថារបបផ្តាច់ការព្យុងយ៉ាង មានគ្រាប់បែកបរមាណូកាន់តែច្រើន។ លោកបន្ថែមថា កាលណា កូរ៉េខាងជើង មានអាវុធនុយក្លេអ៊ែរធំៗ វារិតតែធ្វើឲ្យប្រទេសនេះ កាន់តែក្អេងក្អាងនឹងអំណាចរបស់ខ្លួន ហើយពេលនោះ គ្មាននរណា និយាយជាមួយកូរ៉េខាងជើង បានទៀតឡើយ។
ចិនដែលធ្លាប់ជាមិត្ត ជួយការពារកូរ៉េខាងជើង ពេលនេះ កំពុងតែមានការព្រួយបារម្ភ ពីសន្តិសុខរបស់ខ្លួន ព្រោះថា កូរ៉េខាងជើងកំពុងតែឈ្លក់វក់វី ជាមួយមហិច្ឆិតានុយក្លេអ៊ែរ លែងស្តាប់នរណាទាំងអស់ ហើយកម្មវិធីនុយក្លេអ៊ែរកូរ៉េងជើង កំពុងដើរទៅយ៉ាងលឿន ហួសពីការស្មាន។
យ៉ាងណាមិញ អ្នកជំនាញការរបស់អាមេរិក បានធ្វើការសន្និដ្ឋានថា កូរ៉េខាងជើង អាចផលិតបានអាវុធនុយក្លេអ៊ែរ បានដល់១០០គ្រាប់ នៅឆ្នាំ ២០២០។ សូមរំលឹកផងដែរថា កូរ៉េខាងជើង ធ្លាប់បានធ្វើការសាកល្បង បាញ់គ្រាប់នុយក្លេអ៊ែរ ចំនួន៣លើក កាលពីឆ្នាំ ២០០៦ ២០០៩ និង ២០១៣។ ក្រៅពីអាវុធនុយក្លេអ៊ែរ កូរ៉េខាងជើង ក៏មានកម្មវិធីផលិត គ្រាប់កាំជ្រួចបាលីស្ទីក (Missile balistique) យ៉ាងសកម្មទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ