ចិន៖កំណើនសេដ្ឋកិច្ចនៅក្រោយឆ្នាំ ២០១៦ នឹងមិនអាចមានលើសពី ៦,៥%
នៅក្នុងប្រទេសចិន ស្ថានភាពទីផ្សារភាគហ៊ុននៅបន្តផុសស្រួយក្នុងថ្ងៃទី១ នៃសប្តាហ៍ថ្មី។ នៅថ្ងៃចន្ទនេះ តម្លៃភាគហ៊ុននៅផ្សារភាគហ៊ុនក្នុងទីក្រុងសៀងហៃបានបន្តធ្លាក់ចុះ នោះបើទោះបីជាមានអន្តរាគមន៍របស់រដ្ឋាភិបាលលើតម្លៃប្រាក់យ័នកាលពីថ្ងៃសុក្រសប្តាហ៍កន្លងទៅក៏ដោយ។ ទន្ទឹមគ្នានេះ ទីប្រឹក្សាជាន់ខ្ពស់រដ្ឋាភិបាលម្នាក់បាននិយាយប្រាប់សារព័ត៌មានក្នុងថ្ងៃនេះថា កំណើនសេដ្ឋកិច្ចរបស់ចិននៅក្រោយឆ្នាំ ២០១៦ ក៏មិនអាចមានលើសពី ៦,៥% ដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
បន្ទាប់ពីបានបាត់បង់តម្លៃអស់ ១០% នាសប្តាហ៍កន្លងទៅ និងក្រោយពីបានងើបឡើងវិញបន្តិចក្នុងថ្ងៃសុក្រ ទី៨ មករាដោយសារតែមានអន្តរាគមន៍របស់រដ្ឋាភិបាលមក តម្លៃភាគហ៊ុននៅផ្សារភាគហ៊ុនចិនធ្លាក់ថ្លៃជាថ្មីនាថ្ងៃទី១ សប្តាហ៍នេះ។ តែយ៉ាងណាក៏ដោយ ការធ្លាក់ថ្លៃនៅមានកម្រិតទាបដែលមិនបានឈានដល់ការផ្អាកទិញ លក់ ឬការបិទផ្សារភាគហ៊ុនដូចសប្តាហ៍កន្លងទៅទេ។ គួរជម្រាបជូនថា មានវិធានការសំខាន់ចំនួនពីរដែលរដ្ឋអំណាចចិនបានអនុម័តតាំងពីថ្ងៃចន្ទ ទី៤ មករាដើមសប្តាហ៍ ទី១ ផ្អាកការទិញ ដូររយៈពេល ១៥នាទី ប្រសិនបើតម្លៃភាគហ៊ុនធ្លាក់ថ្លៃត្រឹម ៥% និងទី២ បិទទ្វារផ្សារភាគហ៊ុនពេញមួយថ្ងៃតែម្តង ប្រសិនបើតម្លៃភាគហ៊ុនធ្លាក់ថ្លៃដល់ទៅ ៧%។
ក្នុងសប្តាហ៍កន្លងទៅ ធនាគារកណ្តាលចិនបានសម្រេចអន្តរាគមន៍លើតម្លៃប្រាក់យ័នដើម្បីកាត់បន្ថយភាពរំជើបរំជួលនៅលើទីផ្សារភាគហ៊ុន តែក្រុមអអ្នកវិនិយោគដែលកំពុងបារម្ភពីស្ថានភាពសុខភាពសេដ្ឋកិច្ចចិនបានចោទសួរពីវិធានការនយោបាយរូបិយវត្ថុរបស់ទីក្រុងប៉េកាំងសម្រាប់រយៈពេលវែង។ ទន្ទឹមគ្នានេះ ក្រុមអ្នកវិនិយោគក៏បានបារម្ភពីអត្រាអតិផរណានៅមានកម្រិតទាបខ្លាំងដែលរដ្ឋាភិបាលទើបបានប្រកាសឲ្យដឹងនាចុងសប្តាហ៍កន្លងទៅ ព្រមទាំងចោទសួរពីសមត្ថភាពរបស់ចិនក្នុងទប់ស្កាត់។
នៅក្នុងបរិបទនេះ កាសែតចិនមួយចេញផ្សាយថ្ងៃនេះបានស្រង់សម្តីរបស់លោកលី វ៉េ ទីប្រឹក្សាជាន់ខ្ពស់រដ្ឋាភិបាលម្នាក់ដែលបានសារភាពថា កំណើនសេដ្ឋកិច្ចចិនពីឆ្នាំ ២០១៦ ដល់ឆ្នាំ ២០២០ នឹងមិនអាចមានលើសពី ៦,៥% បានឡើយ។ យោងតាមលោកលី វ៉េ មានកត្តាសំខាន់ចំនួន ៣ដែលពន្យឺតកំណើនសេដ្ឋកិច្ចរបស់ចិន ទី១ ដំណើរធ្លាក់ចុះនៃសេដ្ឋកិច្ចពិភពលោក ទី២ កំណើនតម្លៃពលកម្មដែលធ្វើឲ្យរោងចក្រ សហគ្រាសចិនបាត់បង់ភាពប្រកួតប្រជែង និងទី៣ គឺបញ្ហាបរិស្ថានផ្សេងៗដែលបានពន្យឺតដំណើរការឧស្សាហូបនីយកម្ម។
យ៉ាងណាក៏ដោយនៅថ្ងៃទី១៩ មករាខាងមុខ ចិននឹងផ្សព្វផ្សាយតួលេខកំណើនសេដ្ឋកិច្ចរបស់ខ្លួនប្រចាំឆ្នាំ ២០១៥។ ក្រុមអ្នកសេដ្ឋកិច្ចបានប្រមើលមើលទុកជាមុនថា គឺមានក្នុងរង្វង់ ៧% ដែលជាអត្រាមួយដ៏ទាបដែលចិនមិនធ្លាប់មានទេគិតក្នុងរយៈពេល ២៥ឆ្នាំកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ