ផ្ទុះគ្រាប់បែកនៅភាគខាងត្បូងប្រទេសថៃបន្ទាប់ពីការប្រកាសចរចារកសន្តិភាព
អំពើភេរវកម្មមួយបានកើតឡើងនៅភាគខាងត្បូងប្រទេសថៃ នៅថ្ងៃសុក្រនេះ បណ្តាលអោយមនុស្ស៦នាក់រងរបួស។ អំពើហិង្សានេះ ធ្វើឡើងតែមួយថ្ងៃប៉ុណ្ណោះ បន្ទាប់ពីរដ្ឋាភិបាលថៃ និងក្រុមឧទ្ទាមមួយក្រុម ដែលតែងតែបង្កនូវអំពើបះបោរនៅ ក្នុងតំបន់ភាគខាងត្បូង តាំងពីឆ្នាំ ២០០៤មក បានប្រកាសថា នឹងចរចាគ្នាស្វែងរកកិច្ចព្រមព្រៀងបញ្ចប់ហិង្សាក្នុងតំបន់ នៅពេលពីរសប្តាហ៍ខាងមុខទៀតនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
គ្រាប់បែកបានផ្ទុះឡើង កាលពីព្រឹកមិញ នៅភាគខាងត្បូងប្រទេសថៃ នៅពីមុខផ្សារមួយកន្លែង ក្នុងខេត្ត ណារ៉ាធីវ៉ាត បណ្តាលអោយមនុស្ស៦នាក់ រងរបួស ក្នុងនោះបុរសអាយុ៦៦ ឆ្នាំម្នាក់ រងគ្រោះជាទំងន់។ អ្វីដែលគួរអោយកត់សំគាល់នោះ គឺអំពើភេរវកម្មនេះ បែរជាអាចកើតឡើង នៅទីកន្លែងដែលរដ្ឋអំណាចថៃ ដាក់អោយក្លាយជាតំបន់ប្រកាសអាសន្នទៅវិញ ព្រោះថាជាធម្មតា តំបន់ប្រកាសអាសន្ន គឺជាតំបន់ដែលប៉ូលិសធ្វើការការពារខ្ពស់។
អំពើភេរវកម្មនេះ កើតឡើងតែមួយថ្ងៃប៉ុណ្ណោះ បន្ទាប់ពីរដ្ឋអំណាចថៃ និងក្រុមឧទ្ទាមមួយក្រុម ដែលមានឈ្មោះថា “រណសិរ្សបដិវត្តន៍ជាតិ” បានប្រកាសកាលពីថ្ងៃព្រហស្បតិ៍ម្សិលមិញ នៅប្រទេសម៉ាឡេស៊ីថា នឹងធ្វើការចរចាគ្នានៅក្នុងពីរសប្តាហ៍ទៀត ដើម្បីសំរេចអោយបាននូវកិច្ចព្រមព្រៀងមួយ បញ្ចប់អំពើហិង្សាក្នុងតំបន់។
យោងតាមក្រុមប៉ូលិស អំពើភេរវកម្មនៅថ្ងៃសុក្រនេះ ប្រហែលជាស្នាដៃរបស់សកម្មជននានា ដែលចង់បង្ហាញអំពីការមិនពេញចិត្តរបស់ខ្លួន ចំពោះកិច្ចចរចានេះ។
ប៉ុន្តែ នាយករដ្ឋមន្ត្រីថៃ លោកស្រី យីងឡាក់ ស៊ីណាវ៉ាត្រា មិនបានយល់ឃើញដូចជាការគិតទុក របស់ប៉ូលិសនោះទេ។ យោងតាមនាយករដ្ឋមន្ត្រីថៃ អំពើភេរវកម្មទាំងនេះ មិនមែនជាការសងសឹកមកលើរដ្ឋាភិបាលថៃនោះទេ។ វាជាអំពើហិង្សា ដែលតែងតែកើតឡើងជាប្រចាំទៅហើយនៅក្នុងតំបន់។ ហើយបើទោះជាកិច្ចព្រមព្រៀងចុះហត្ថលេខាហើយក្តី ក៏មិនប្រាកដថា អំពើហិង្សានឹងបញ្ចប់ទៅភ្លាមៗនោះដែរ។
ក្រុមឧទ្ទាមឈ្មោះ “រណសិរ្សបដិវត្តន៍ជាតិ” ដែលនឹងចរចាជាមួយរដ្ឋអំណាចថៃ នៅក្រុងKuala Lumpur នៅពេលខាងមុខនេះ ជាក្រុមមួយតែងតែបង្កការបះបោរក្នុងតំបន់ តាំងពីឆ្នាំ ២០០៤មកម្ល៉េះ។
អំពើហិង្សានៅភាគខាងត្បូងប្រទេសថៃ ក្នុងរយៈពេល៩ឆ្នាំ កន្លងមកនេះ បានបង្កអោយមានមនុស្សស្លាប់ ៥ ៥០០នាក់។ ជនបះបោរ ប្រយុទ្ធប្រឆាំងនឹងការរើសអើងរបស់ជនជាតិថៃ ទៅលើជនជាតិភាគតិចម៉ាឡេស៊ី និងអ្នកកាន់សាសនាអ៊ីស្លាម។
គួររំលឹកថា តំបន់ភាគខាងត្បូងប្រទេសថៃ កាលដើមឡើយស្ថិតក្នុងទឹកដីប្រទេសម៉ាឡេស៊ី មុននឹងក្លាយជាកម្មសិទ្ធិរបស់ថៃ នៅដើមសតវត្សរ៍ទី ២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ