លោកបាន គីមូន ទាមទារអោយបញ្ឈប់ការឃុំឃាំងជនភៀសខ្លួនជាបន្ទាន់
ក្នុងដំណើរទស្សនកិច្ចប្រទេសក្រិក ថ្ងៃសៅរ៍១៨មិថុនាម្សិលមិញ ប្រធានអង្គការសហប្រជាជាតិ បាន គីមូន បានអំពាវនាវអោយបញ្ឈប់បន្ទាន់ ឈប់ឃុំឃាំងជនភៀសខ្លួន ដែលធ្វើដំណើរមកដល់ក្រិក គិតតាំងពីការចូលធរមាននៃកិច្ចព្រមព្រៀងអឺរ៉ុប-តួកគី។ លោកបាន់ គីមូន លើកឡើងថា ការឃុំខ្លួនមិនមែនជាដំណោះស្រាយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
ម្សិលមិញ លោកបាន គីមូន បានធ្វើដំណើរទៅកោះ Lesbos ជាច្រកធំដែលជនភៀសខ្លួនប្រើប្រាស់ ដើម្បីចូលមកកាន់ទឹកដីក្រិក។ លោកបាន គីមូន បានទស្សនកិច្ចជំរុំជនភៀសខ្លួន២កន្លែង។ នៅទីនោះ មានជនភៀសខ្លួន៣៤០០នាក់ ភាគច្រើនអាចនឹងត្រូវបញ្ជូនទៅតួកគីវិញ ស្របតាមកិច្ចព្រមព្រៀងអឺរ៉ុប-តួកគី។
ប្រធានអង្គការសហប្រជាជាតិទាមទារអោយបញ្ឈប់ជាបន្ទាន់នូវការឃុំខ្លួនជនភៀសខ្លួន ដែលធ្វើដំណើរមកដល់ក្រិក គិតចាប់ពីកិច្ចព្រមព្រៀងអឺរ៉ុប-តួកគី ចូលជាធរមាន។ លោកបាន គីមូន បានរំលឹកអឺរ៉ុប ពីគុណធម៌នៃសិទ្ធិមនុស្ស។ លោកទាមទារអោយអឺរ៉ុបដោះស្រាយបញ្ហាជនភៀសខ្លួន ដោយមិនភ្លេចពីគោលការណ៍សិទ្ធិមនុស្ស។
គួររំលឹកថា កិច្ចព្រមព្រៀងអឺរ៉ុប-តួកគី ថ្ងៃ២០មិនា ឆ្នាំ២០១៦ ចែងថា ជនភៀសខ្លួន ដែលជាន់ទឹកដីក្រិក ក្រោយថ្ងៃ២០មិនានេះ នឹងត្រូវបញ្ជូនត្រលប់ទៅតួកគីវិញ។ ក្នុងនោះ ក៏បូកបញ្ចូលទាំងជនជាតិស៊ីរីដែលសុំសិទ្ធិជ្រកកោនផងដែរ។ កិច្ចព្រមព្រៀងនេះ មានទិសដៅរារាំងមិនអោយជនភៀសខ្លួនឆ្លងទូក ពីកោះតួកគី ចូលមកកោះក្រិក។ ជាថ្នូរនៃការខំប្រឹងប្រែងរបស់តួកគី អឺរ៉ុបឧបត្ថម្ភតួកគី៦០០០លានអឺរ៉ូ។
ព្រឹកម្សិលមិញ ប្រធានអង្គការសហប្រជាជាតិបានជួបនាយករដ្ឋមន្ត្រីក្រិក អាឡិចស៊ិស ស៊ីប្រាស។ លោកស៊ីប្រាស បានជូនអាវពោងការពារកុំអោយលង់ទឹកមួយសម្រាប់ ដល់លោកគីមូន ជាអំណោយនិមិត្តរូប។ អាវពោងប្រភេទនេះច្រើនណាស់ ត្រូវបានអាជ្ញាធររើសបាននៅតាមឆ្នេរក្រិក។ ក្រិកបានផ្តល់អាវពោងដល់ជនភៀសខ្លួនរាប់ពាន់នាក់ ដែលឆ្លងសមុទ្រចូលមកកាន់កោះក្រិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ