ប្រជាជនប្រមាណ៦០០នាក់បានរត់រួចចេញផុតពីក្រុងManbij
នៅស៊ីរី ក្រុង Manbij ក្នុងខេត្តអាឡិប តំបន់ដ៏សំខាន់បំផុតមួយដែលស្ថិតនៅក្រោមការកាន់កាប់របស់ពួកអ៊ីស្លាមជីហាត កំពុងត្រូវបានកងកម្លាំងអារ៉ាប់-គួដ រួមគ្នាជាមួយនឹងកម្លាំងអន្តរជាតិ បានធ្វើការឡោមព័ទ្ធក្រុងនេះ ដើម្បីត្រៀមរំដោះប្រជាជនស៊ីវីលជាច្រើនពាន់នាក់កំពុងជាប់កុននៅទីនោះ ។ កាលពីថ្ងៃអាទិត្យម្សិលមិញ ប្រជាជនស៊ីវីលស៊ីរី ប្រមាណជា ៦០០នាក់ បានរត់គេចខ្លួនរួចនិងចេញផុតពីក្រុង Manbij ។
ចុះផ្សាយនៅថ្ងៃ៖
ស្តាប់ - ០២:២១
កាលពីថ្ងៃអាទិត្យម្សិលមិញ ប្រជាជនស៊ីរីប្រមាណជា៦០០នាក់ បានសម្រេចជោគជ័យ ក្នុងការរត់ភៀសខ្លួនចេញផុតពីក្រញាំដៃរបស់ពួកជីហាតដែលកំពុងក្តោបក្តាប់នៅក្រុងManbij ។ ឆ្លៀតឱកាសនៅពេលដែលពួកអ៊ីស្លាមជីហាត មានភាពធូរលុងពុំសូវមានភាពប្រុងប្រយ័ត្ន ប្រជាជនទាំងអស់នោះ បាននាំគ្នារត់ភៀសខ្លួនចេញតាមច្រកនៅភាគខាងត្បូងក្រុង ពីព្រោះនៅទីនោះពុំមានការវាយប្រយុទ្ធគ្នាដ៏ខ្លាំងខ្លា ដូចជានៅភាគខាងជើងនិងខាងកើតក្រុងManbij ទេ-នេះជាការជូនដំណឹងរបស់អង្គការឃ្លាំមើលសិទ្ធមនុស្សនៅក្នុងប្រទេសស៊ីរី(OSDH)។
ក្រុមយុទ្ធជនអារ៉ាប់-គួដ នៃកងកម្លាំងប្រជាធិបតេយ្យស៊ីរី(FDS) ដែលគាំទ្រដោយទីក្រុងវ៉ាស៊ីតោន បានទទួលស្វាគមន៍ជួយដល់ប្រជាជនស៊ីរីទាំងនោះដែលបានភៀសខ្លួនរួចផុតពីក្រញាំដៃដែករបស់ពួកជីហាត។
ក៏ប៉ុន្តែ យោងតាមអង្គការឃ្លាំមើលសិទ្ធិមនុស្សដដែល “ចំនួនប្រជាជន ៦០០នាក់នេះ ក៏នៅតែជាចំនួនមួយដ៏ស្តួចស្តើងបំផុត បើប្រៀបធៀបទៅនឹងចំនួនប្រជាជនរាប់សិបពាន់នាក់ ដែលកំពុងជាប់ក្នុងសំណាញ់របស់ពួកទមិឡជីហាតនៅក្រុង Manbij ។ ម្យ៉ាងទៀត ពួកទមិឡទាំងនោះ ក៏មិនញញើតឡើយក្នុងការយកជីវិតប្រជាជនខ្សត់ខ្សោយមកធ្វើជាខែលសំរាប់ការពារពួកវាទៀតផង។ ហេតុនេះហើយបានជាយន្តហោះរបស់កងសម្ព័ន្ធមិត្តអន្តរជាតិ មានការស្ទាក់ស្ទើរ ក្នុងការទម្លាក់គ្រាប់បែកទៅលើក្រុងនោះ ដោយខា្លចមានប្រជាជនស្លាប់ច្រើន។
នៅខណៈនេះ យុទ្ធជនអារ៉ាប់-គួដ បានបែរទិសចៀសក្រុង Manbijដើម្បីសំដៅការវាយប្រហារទៅទិសខាងលិចវិញ ហើយពួកគេកំពុងតែស្ថិតនៅចម្ងាយមិនដល់១៨គីឡូម៉ែត្រផងពីក្រុង Al-Bab ដែលជាដែនជម្រកការពារដ៏ចំណាស់បំផុតរបស់អង្គការរដ្ឋអ៊ីស្លាមនៅស៊ីរី។ក្រុង Al-Bab ស្ថិតនៅចម្ងាយតែ៤០គីឡូម៉ែត្រ ភាគខាងលិចនៃក្រុង Manbij ដែលបានធ្លាក់ទៅក្នុងកណ្តាប់ដៃរបស់ពួកជីហាតនៅឆ្នាំ២០០៣។
នៅភាគខាងលិចដដែលក្នុងខេត្តអាឡិបដែលត្រួតត្រាដោយដោយក្រុមរណសិរ្ស-al-Nosra សាខាមួយរបស់ អៃ-កៃដានៅស៊ីរី ប្រជាជនស៊ីវិលយ៉ាងហោច២០នាក់ ត្រូវបានស្លាប់នៅក្នុងការវាយឆ្មក់តាមអាកាសរបស់កងសម្ព័ន្ធមិត្តប្រឆាំងទៅលើទីផ្សារមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ