បូអ៊ីងម៉ាឡេស៊ី៖ អ៊ុយក្រែននិងម៉ាឡេស៊ីចោទក្រុមបះបោរអ៊ុយក្រែនថា បំបាត់ភស្តុតាង ក្បត់ជនរងគ្រោះ
នៅថ្ងៃសៅរ៍នេះ អាជ្ញាធរអ៊ុយក្រែន និងម៉ាឡេស៊ី បានចោទក្រុមផ្តាច់ទឹកដីនិយមនៅអ៊ុយក្រែន ថាក្បត់ជនរងគ្រោះ ដោយសារតែក្រុមផ្តាច់ទឹកដីនិយមបានបំបាត់ភស្តុតាងសំខាន់ៗ នៅទីកន្លែងកើតហេតុធ្លាក់យន្តហោះម៉ាឡេស៊ី។ សម្រាប់ម៉ាឡេស៊ី នេះជាការក្បត់ដល់ជនរងគ្រោះដែលស្លាប់ក្នុងគ្រោះថ្នាក់។ ប្រធានាធិបតីបារាំងទាមទារអោយការស៊ើបអង្កេតផ្តល់លទ្ធផលច្បាស់លាស់ មិនមែនត្រឹមតែជាការសន្និដ្ឋាននោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
នៅថ្ងៃសៅរ៍នេះ រដ្ឋមន្ត្រីក្រសួងដឹកជញ្ជូនម៉ាឡេស៊ី លោក Liow Tiong Lai បានចោទក្រុមផ្តាច់ទឹកដីនិយមអ៊ុយក្រែនថា ថាបានបំបាត់ភស្តុតាងសំខាន់ៗ សម្រាប់ការស៊ើបអង្កេតលើហេតុការណ៍គ្រោះថ្នាក់យន្តហោះបូអ៊ីងម៉ាឡេស៊ី ដែលបានធ្លាក់ឆេះក្នុងដែនដីជម្លោះភាគខាងកើតអ៊ុយក្រែន កាលពីថ្ងៃព្រហស្បតិ៍។ ម៉ាឡេស៊ី ចាត់ទុកការបំបាត់ភស្តុតាងថា ជាអំពើក្បត់ចំពោះជនរងគ្រោះទាំង២៩៨នាក់ ដែលស្លាប់ក្នុងហេតុការណ៍គ្រោះថ្នាក់នេះ។
រដ្ឋាភិបាលអ៊ុយក្រែន ក៏បានចោទប្រកាន់ក្រុមផ្តាច់ទឹកដីនិយមដូចគ្នាដែរថា ព្យាយាមបំបិទភស្តុតាង ធ្វើអោយពិបាកដល់ការស៊ើបអង្កេត។ គួររំលឹកថា ដែនដីដែលកើតហេតុការណ៍ធ្លាក់យន្តហោះ ស្ថិតនៅជិតក្រុងឆាក់តាស្ក ក្នុងតំបន់ដូណេត ស្ថិតក្រោមការកាន់កាប់របស់ក្រុមផ្តាច់ទឹកដីនិយម។ រដ្ឋាភិបាលអ៊ុយក្រែនលើកឡើងទៀតថា ក្រុមផ្តាច់ទឹកដីនិយម បានដឹកសាកសពមនុស្ស៣៨នាក់ ទៅកន្លែងដាក់សពនៅដូណេត។ យោងតាមអ៊ុយក្រែន នៅទីនោះមានអ្នកជំនាញរុស្ស៊ី រង់ចាំធ្វើកោសល្យវិច័យសាកសព។ អាជ្ញាធរអ៊ុយក្រែនចោទទៀតថា ក្រុមបះបោរបានព្យាយាមរកមធ្យោបាយដឹកយកបំណែកសំណល់យន្តហោះ យកទៅរុស្ស៊ី។ ដោយឡែក មេក្រុមផ្តាច់ទឹកដីនិយមបានបញ្ជាក់ដែរថា បានដឹកសាកសពមនុស្ស២៧នាក់ ទៅកន្លែងដាក់សពនៅដូណេត។
សម្រាប់ការស៊ើបអង្កេតលើគ្រោះថ្នាក់យន្តហោះបូអ៊ីងម៉ាឡេស៊ី ប្រធានាធិបតីរុស្ស៊ីពូទីន និងប្រមុខដឹកនាំអាល្លឺម៉ង់ មែរគែល បានព្រមព្រៀងគ្នាអោយការស៊ើបអង្កេតស្ថិតក្រោមបន្ទុកខុសត្រូវរបស់អង្គការអាកាសចរណ៍ស៊ីវិលអន្តរជាជាតិ។ អ្នកស៊ើបអង្កេតត្រូវរកអោយឃើញថា មីស៊ីលប្រភេទអ្វីដែលបាញ់យន្តហោះម៉ាឡេស៊ី ដើម្បីរកមុខម្ចាស់មីស៊ីលនិងជនដៃដល់បង្កការឆេះយន្តហោះ។ នៅថ្ងៃសៅរ៍នេះ រុស្ស៊ីបានទាមទារអោយរដ្ឋាភិបាលអ៊ុយក្រែនបង្ហាញលំអិតពីមីស៊ីលប្រភេទប៊ុកBouk ដែលកងទ័ពអ៊ុយក្រែន ប្រើប្រាស់ នៅភាគខាងកើតអ៊ុយក្រែន។
មីស៊ីលប្រភេទប៊ុកនេះហើយ ដែលអាមេរិកលើកឡើងថា ប្រើដោយក្រុមបះបោរអ៊ុយក្រែន ដើម្បីវាយប្រហារយន្តហោះម៉ាឡេស៊ីនោះ។ កាលពីថ្ងៃសុក្រ រុស្ស៊ីបានលើកឡើងថា ប្រព័ន្ធមីស៊ីលប៊ុករបស់កងទ័ពអ៊ុយក្រែន មានសកម្មភាពដំណើរការ នៅថ្ងៃព្រហស្បតិ៍ ថ្ងៃយន្តហោះម៉ាឡេស៊ីជួបគ្រោះថ្នាក់នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ