ប៉ូលិសបារាំងចាប់ខ្លួនប្តីប្រពន្ធ២គូ ក្រោយរកឃើញរថយន្តផ្ទុកដបឧស្ម័ន កណ្តាលក្រុងប៉ារីស
ប៉ូលិសបារាំងកំពុងឃុំខ្លួន ប្តីប្រពន្ធ២គូ នៅថ្ងៃព្រហស្បតិ៍នេះ ទាក់ទងនឹងរថយន្តមួយគ្រឿងផ្ទុកដបឧស្ម័នច្រើនដប ដែលគេរកឃើញ នៅកណ្តាលក្រុងប៉ារីស កាលពីអាធ្រាត្រថ្ងៃអាទិត្យកន្លងទៅ។ ប៉ូលិសកំពុងតាមរកស្ត្រីម្នាក់ ជាកូនស្រីរបស់ម្ចាស់រថយន្តនេះ។ ថ្លែងក្នុងសន្ទរកថា នៅថ្ងៃព្រហស្បត្តិ៍នេះ ប្រធានាធិបតីបារាំង បានគូសបញ្ជាក់ថា ប៉ុន្មានថ្ងៃចុងក្រោយនេះ អាជ្ញាធរបានទប់ស្កាត់ការប៉ុនប៉ងភេរវកម្មជាច្រើនក្នុងស្រុក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៧
កាលពីយប់ថ្ងៃអាទិត្យឈានចូលព្រឹកថ្ងៃចន្ទកន្លងទៅ បុគ្គលិកនៅក្លឹបមួយកន្លែង នៅក្រុងប៉ារីស បានកត់សម្គាល់រថយន្តPeugeot មួយគ្រឿង គ្មានស្លាកលេខ ចតចោលនៅជិតវិហារ Notre Dame ដែលជាទីកន្លែងទេសចរដ៏ល្បីរបស់បារាំង។
ក្នុងរថយន្តនោះ មានដបឧស្ម័នទទេ មួយដប។ តែនៅគូទរថយន្តវិញ ប៉ូលិសបានរកឃើញដបមានផ្ទុកឧស្ម័ន៥ដប។ ដោយឡែក ក្នុងរថយន្តនោះ គ្មានទុកភ្លើងរឺគ្រឿងដុតអ្វី ដើម្បីបំផ្ទុះដបឧស្ម័នទាំងនេះទេ។ ក្នុងរថយន្តក៏មានឯកសារជាភាសាអារ៉ាប់ផងដែរ។
ប៉ូលិសបារាំងបានបើកការស៊ើបអង្កេត និងបានចាប់ខ្លួនប្តីប្រពន្ធ២គូ នៅតំបន់ភាគខាងត្បូង។ ក្នុងចំណោមប្តីប្រពន្ធទាំងនេះ ប្តីប្រពន្ធមួយគូធ្លាប់ត្រូវប៉ូលិសសម្គាល់អត្តសញ្ញាណ ថាជាសមាជិកចលនាអ៊ីស្លាមជ្រុលនិយម។
កាលពីថ្ងៃអង្គារ ប៉ូលិសបានចាប់ខ្លួនបុរសម្ចាស់រថយន្ត Peugeot និងមនុស្សម្នាក់ទៀត ជាអ្នកជិតដិតនឹងម្ចាស់រថយន្ត។ ជនទាំង២រូបនេះ ធ្លាប់ត្រូវប៉ូលិសកត់ត្រាដែរថា ជាជនជ្រុលនិយម។ តែប៉ូលិសបានដោះលែងម្ចាស់រថយន្តវិញ និងកំពុងតាមចាប់ខ្លួនកូនស្រីម្ចាស់រថយន្តវិញ ព្រោះម្ចាស់រថយន្តប្រាប់ថា កូនស្រីគាត់បានចាក់រឹសក្នុងចលនាអ៊ីស្លាមជ្រុលនិយម។
បារាំងកំពុងស្ថិតការគំរាមកំហែងភេរវកម្មខ្ពស់ ក្រោយរងការវាយប្រហាររបស់ក្រុមជីហាតរដ្ឋអ៊ីស្លាម មួយរយៈមុននេះ។ យោងតាមការប្រកាសរបស់អាជ្ញាធរសន្តិសុខជាតិ កាលពីខែឧសភា បារាំងអាចប្រឈមនឹងការវាយប្រហារដោយគ្រឿងផ្ទុះផ្សេងៗ នៅតាមទីប្រជុំជនធំៗ។ ក្នុងសន្ទរកថា ថ្ងៃព្រហស្បតិ៍នេះ ប្រធានាធិបតីបារាំង ហ្វ្រង់ស៊័រ ហូឡង់ បានលើកឡើងថា អាជ្ញាធរបានទប់ស្កាត់ការប៉ុនប៉ងភេរវកម្មក្នុងស្រុកជាច្រើន ក្នុងប៉ុន្មានថ្ងៃចុងក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ