CPPបង្ហើបពីលទ្ធភាពជួបជាមួយCNRPក្រោយថ្ងៃ១១មករា
នៅទីបំផុតគណបក្សប្រជាជនកម្ពុជាបានបង្ហាញគម្រោងជួបជាមួយគណបក្សសង្គ្រោះជាតិក្រោយថ្ងៃទី១១មករា។ ការផ្ដល់សញ្ញាវិជ្ជមានយ៉ាងដូច្នេះបន្ទាប់ពីលោក កឹម សុខា ប្រធានថ្នាក់ដឹកនាំគណបក្សសង្គ្រោះជាតិបានផ្ញើលិខិតទៅកាន់លោក ស ខេង ប្រធានថ្នាក់ដឹកនាំគណបក្សប្រជាជនកាលពីថ្ងៃទី៥មករា ដើម្បីរកពេលវេលាសមស្របណាមួយជួបគ្នាដោះស្រាយបញ្ហាដែលសេសសល់ឲ្យបានក្នុងខែមករានៃឆ្នាំថ្មីនេះ។
ចុះផ្សាយនៅថ្ងៃ៖
ស្តាប់ - ០២:១៥
តាមរយៈលិខិតឆ្លើយឆ្លងគ្នារវាងលោក ស ខេង ប្រធានថ្នាក់ដឹកនាំគណបក្សប្រជាជនកម្ពុជានិងលោក កឹម សុខា ប្រធានថ្នាក់ដឹកនាំគណបក្សសង្គ្រោះជាតិគឺលោក ស ខេង បានសូមការយោគយល់ពីលោក កឹម សុខា ចំពោះការខកខានមិនបានជួបប្រជុំជាមួយគ្នាក្នុងរយៈពេលកន្លងមកដោយសារតែរូបលោកមានភាពមមាញឹកខ្លាំងនឹងការងារ។ ប៉ុន្តែយ៉ាងណាក៏ដោយលោក ស ខេង បានគូសបញ្ជាក់ថា ជំនួបពិភាក្សាការងាររវាងគណបក្សទាំងពីរអាចនឹងជួបគ្នាក្រោយថ្ងៃទី១១មករា តែចំពោះពេលវេលាជាក់លាក់ណាមួយលោកនឹងជូនព័ត៌មានតាមក្រោយ។
សូមបញ្ជាក់ថា ការផ្ដល់ចម្លើយវិជ្ជមានរបស់ លោក ស ខេង ធ្វើឡើងភ្លាមៗក្នុងថ្ងៃតែមួយពោលគឺថ្ងៃទី៥មករាបន្ទាប់ពីលោក កឹម សុខា បានសសេរលិខិតទៅកាន់លោក ស ខេង ។ លោក កឹម សុខា បានលើកឡើងនៅក្នុងលិខិតនោះថា ចាប់ពីតាំងពីសមាសភាពថ្នាក់ដឹកនាំតំណាងរាស្ត្រនៃគណបក្សសង្គ្រោះជាតិត្រូវបានកែសម្រួលរួចមកថ្នាក់ដឹកនាំតំណាងរាស្ត្រនៃគណបក្សទាំងពីរដែលមានអាសនៈនៅក្នុងរដ្ឋសភានៅមិនទាន់មានការជួបគ្នានៅឡើយ។ ដូច្នេះតំណាងរាស្ត្រនៃគណបក្សសង្គ្រោះជាតិចង់ឲ្យមានការជួបប្រជុំគ្នារវាងថ្នាក់ដឹកនាំតំណាងរាស្ត្រនៃគណបក្សទាំងពីរដើម្បីដោះស្រាយបញ្ហាប្រទេសជាតិនិងប្រជាពលរដ្ឋខ្មែរដោយសន្តិវិធី។
ដ្បិតតែគណបក្សទាំងពីរមិនបានបង្ហាញឲ្យចំៗថាបញ្ហាដែលនៅសេសសល់នោះជាបញ្ហាអ្វីតែទំនងជាជជែកទៅលើលទ្ធភាពដែលអាចឈានទៅដល់ការដោះលែងមន្ត្រីអង្គការសិទ្ធិមនុស្សអាដហុកបួនរូបនិងមន្រ្តីអគ្គលេខាធិការរងគជប ឬ តំណាងរាស្ត្រ និងសកម្មជន របស់បក្សសង្គ្រោះជាតិទាំង ១៥នាក់។ ហើយទាក់ទងលទ្ធភាពដែលអាចឈានទៅដល់ការដោះលែងមន្ត្រីអង្គការសិទ្ធិមនុស្សអាដហុកបួនរូបនិងមន្រ្តីអគ្គលេខាធិការរងគជប កន្លងមកលោក ស ខេង ថាអាចនឹងមានការដោះលែង។
គេនៅចាំបានថា ក្រោយជំនួបបិទទ្វារ នៅរដ្ឋសភា រវាងលោកនាយករដ្ឋមន្ត្រី ហ៊ុន សែន និង លោក កឹម សុខា ប្រធានស្តីទីគណបក្សសង្គ្រោះជាតិ កាលពីថ្ងៃទី៧ ខែធ្នូ ឆ្នាំ២០១៦ហើយលោក កឹម សុខា ក៏ បានជួបលោក ស ខេង ក្នុងថ្ងៃដដែលនោះគឺ លោក ស៊ាង ចែត មេឃុំស្រកមកពីគណបក្សសម រង្ស៊ី នៃស្រុកកំពង់សៀម ខេត្តកំពង់ចាម ដែលតុលាការ ផ្តន្ទាទោស ដាក់ពន្ធនាគាររយៈពេល ៥ឆ្នាំ ពីបទសូកប៉ាន់សាក្សី ត្រូវបាន ព្រះមហាក្សត្រ ចេញព្រះរាជក្រឹត្យលើកលែងទោសតាមសំណើលោកនាយករដ្ឋមន្ត្រី ហ៊ុន សែន ក្នុងថ្ងៃដដែល និងដោះលែងចេញពីពន្ធនាគារ នៅថ្ងៃបន្ទាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ