កម្ពុជាត្រូវការប្រាក់២៦,៥៨ពាន់លានដុល្លារអាមេរិកសម្រាប់អាណត្តិទី៥នេះ
រដ្ឋាភិបាលកម្ពុជាត្រូវការទឹកប្រាក់ប្រហែល៥,៣ពាន់លានដុល្លារអាមេរិក ក្នុងមួយឆ្នាំ សម្រាប់ចំណាយលើការវិនិយោគក្នុងគ្រប់វិស័យ។ យោងតាមផែនការយុទ្ធសាស្ត្រអភិវឌ្ឍន៍ជាតិ ពីឆ្នាំ ២០១៤ ដល់ឆ្នាំ២០១៨ ដែលត្រូវបានគណៈរដ្ឋមន្ត្រីអនុម័ត កាលពីថ្ងៃសុក្រ ថវិកាប៉ាន់ស្មានសរុប ២៦,៥៨ពាន់លានដុល្លារ សម្រាប់រយៈពេល៥ឆ្នាំទៅមុខ គឺ«ចាំបាច់ដើម្បីធ្វើឱ្យសម្រេចគោលដៅទាំងឡាយ» ដែលមានចែងក្នុងផែនការជាតិថ្មីនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
គណៈរដ្ឋមន្ត្រីកម្ពុជា បានអនុម័តសេចក្តីព្រាងផែនការយុទ្ធសាស្ត្រអភិវឌ្ឍន៍ជាតិ ពីឆ្នាំ២០១៤ ដល់ឆ្នាំ២០១៨រួចហើយ កាលពីម្សិលមិញ ក្រោមអធិបតីភាពរបស់នាយករដ្ឋមន្ត្រី ហ៊ុន សែន។ នេះជាឯកសារ «សំខាន់» ដែលកំណត់ក្របខណ្ឌសកម្មភាពនៃការអនុវត្តន៍គោលនយោបាយអាទិភាពនានារបស់រាជរដ្ឋាភិបាលអាណត្តិថ្មី បន្ទាប់ពីផែនការពីឆ្នាំ២០០៩ដល់ឆ្នាំ២០១៣ អស់សុពលភាព។
ក្រសួងផែនការកម្ពុជាបានរៀបចំផែនការយុទ្ធសាស្ត្រអភិវឌ្ឍន៍ជាតិនេះ ដោយសម្របសម្រួល និងពិភាក្សាជាមួយអ្នកពាក់ព័ន្ធទាំងឡាយ ក្នុងនោះមានក្រសួងសេដ្ឋកិច្ច និងហិរញ្ញវត្ថុ ឧត្តមក្រុមប្រឹក្សាសេដ្ឋកិច្ចជាតិ និងគណៈកម្មាធិការនីតិសម្បទា និងអភិវឌ្ឍន៍កម្ពុជា ព្រមទាំងក្រសួង ស្ថាប័នទាំងអស់។ ដើម្បីអនុវត្តផែនការយុទ្ធសាស្ត្រអភិវឌ្ឍន៍ជាតិពីឆ្នាំ២០១៤ ដល់ឆ្នាំ២០១៨នេះ រដ្ឋាភិបាលកម្ពុជាត្រូវការប្រភពហិរញ្ញប្បទានធនធានក្នុងស្រុក និងធនធានក្រៅប្រទេស ក៏ដូចជាការវិនិយោគមូលធនពីវិស័យសារធារណៈ និងឯកជន ក្នុងតម្លៃទឹកប្រាក់សរុបចំនួន ២៦,៥៨ពាន់លានដុល្លារ ឬប្រហែល៥,៣ពាន់លានដុល្លារក្នុងមួយឆ្នាំ។
ទឹកប្រាក់ទាំងនេះគឺចាំបាច់សម្រាប់ចំណាយលើការវិនិយោគ ដើម្បីសម្រេចគោលដៅទាំងឡាយ ដែលមានចែងក្នុងឯកសារនេះ។ផែនការយុទ្ធសាស្ត្រអភិវឌ្ឍន៍ជាតិឆ្នាំ២០១៤-២០១៨នេះបានឱ្យដឹងថា ក្នុងការអនុវត្តន៍ផែនការឆ្នាំ២០០៩ដល់ឆ្នាំ២០១៣ ផលិតផលក្នុងស្រុកសរុបសម្រាប់ប្រជាជនកម្ពុជាម្នាក់ នៅដំណាច់ឆ្នាំ២០១៣ គឺលើសពី១០០០ដុល្លារ ហើយភាពក្រីក្ររបស់ប្រជាជនកម្ពុជាបានធ្លាក់ចុះមកនៅក្រោម២០% នៅឆ្នាំ២០១។ លើសពីនេះទៀត ឯកសារថ្មីរបស់ក្រសួងផែនការនេះ ក៏បង្ហាញឱ្យឃើញផងដែរថា កម្ពុជាទទួលបានជោគជ័យ ភាគច្រើន ក្នុងការអនុវត្តន៍តាមគោលដៅអភិវឌ្ឍន៍សហសវត្សរ៍កម្ពុជា។
ក្រៅពីដើម្បីបូកសរុបលទ្ធផលនៃសកម្មភាពក្នុងអាណត្តិចាស់ ផែនការយុទ្ធសាស្ត្រអភិវឌ្ឍន៍ជាតិពីឆ្នាំ២០១៤ ដល់ឆ្នាំ២០១៨ ក៏ត្រូវបានចងក្រងឡើង ជាសំខាន់ ដើម្បីកំណត់នូវបណ្តាវិធានការគោលនយោបាយនានាឱ្យក្រសួង និងស្ថាប័នពាក់ព័ន្ធទាំងអស់ យកទៅអនុវត្ត ឱ្យបានសមស្របតាមវិស័យអាទិភាពនានា របស់រដ្ឋាភិបាលកម្ពុជា ដើម្បីធានាស្ថិរភាព កំណើនសេដ្ឋកិច្ច ការកាត់បន្ថយភាពក្រីក្រ និងការលើកកម្ពស់កម្រិតជីវភាពរស់នៅរបស់ប្រជាជន ដូចមានចែងក្នុងយុទ្ធសាស្ត្រចតុកោណ ដំណាក់កាលទី៣ដែរ។ ទន្ទឹមនឹងនេះដែរ ប្រព័ន្ធតាមដានត្រួតពិនិត្យ និងវាយតម្លៃការអនុវត្តប្រចាំឆ្នាំក៏ត្រូវបានដាក់បញ្ចូលទៅក្នុងផែនការយុទ្ធសាស្ត្រអភិវឌ្ឍន៍ជាតិនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ