សមាជិកសភាអាស៊ានបារម្ភពីជោគវាសនាលទ្ធិប្រជាធិបតេយ្យកម្ពុជាក្រោយមានការបិទNGOនិងប្រព័ន្ធផ្សព្វផ្សាយ
សមាជិកសភាមកពីទូទាំងប្រទេសអាស៊ាន បានសម្តែងនូវការព្រួយបារម្ភយ៉ាងខ្លាំងអំពីស្ថានភាពសិទ្ធិមនុស្សកាន់តែអាក្រក់ទៅៗនៅក្នុងប្រទេសកម្ពុជា បន្ទាប់ពីរដ្ឋាភិបាលខ្មែរបានបិទប្រព័ន្ធផ្សព្វផ្សាយឯករាជ្យ និងអង្គការសង្គមស៊ីវិល។ នេះបើតាមសេចក្តីថ្លែងការណ៍របស់ក្រុមសមាជិកសភាអាស៊ានសម្រាប់សិទ្ធិមនុស្សនៅថ្ងៃព្រហស្បតិ៍នេះ។ ក្រុមសមាជិកសភាអាស៊ានក៏បារម្ភខ្លាំងផងដែរពីជោគវាសនារបស់លទ្ធិប្រជាធិបតេយ្យនៅក្នុងប្រទេសកម្ពុជា ដោយសារតែបញ្ហានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
លោក Charles Santiago ប្រធានក្រុមសមាជិកសភាអាស៊ានសម្រាប់សិទ្ធិមនុស្សបានលើកឡើងនៅក្នុងសេចក្តីថ្លែងការណ៍ថា ការបិទប្រព័ន្ធផ្សព្វផ្សាយ និងអង្គការសង្គមស៊ីវិលពីសំណាក់រដ្ឋាភិបាលកម្ពុជា គឺជាចលនាប្រឆាំងនឹងសំឡេងរិះគន់ សំឡេងឯករាជ្យកាន់តែខ្លាំងឡើង និងធ្វើឲ្យមានព្រួយបារម្ភខ្លាំងផងដែរទៅលើជោគវាសនាអនាគតនៃលទ្ធិប្រជាធិបតេយ្យកម្ពុជា ជាពិសេសគឺការបោះឆ្នោតជាតិដែលនឹងធ្វើឡើងនៅសល់មិនដល់មួយឆ្នាំទៀតផងនោះ។ ប្រធានក្រុមសមាជិកសភាអាស៊ានសម្រាប់សិទ្ធិមនុស្ស ក៏បានកត់សម្គាល់ដែរថា ជាច្រើនឆ្នាំមកហើយ ប្រទេសកម្ពុជាបានស្ថិតក្នុងបរិយាកាសនៃការភ័យខ្លាចដែលបង្កឡើងដោយគណបក្សកាន់អំណាចធ្វើជាយុទ្ធសាស្ត្រក្នុងការរក្សាអំណាចរបស់ខ្លួនតទៅទៀត។ ក៏ប៉ុន្តែអ្វីដែលបានកើតឡើងក្នុងពេលថ្មីៗនេះ គឺជាការបំពានច្បាប់មួយដែលមិនដូចជាអ្វីដែលគេបានឃើញតាំងពីចុះព្រមព្រៀងសន្តិភាពទីក្រុងបារីសក្នុងឆ្នាំ១៩៩១មក។
ប្រតិកម្មពីសំណាក់ក្រុមសមាជិកសភាអាស៊ានសម្រាប់សិទ្ធិមនុស្សនាពេលនេះ បានធ្វើឡើងក្រោយពីរដ្ឋាភិបាលកម្ពុជា បានបិទវិទ្យាស្ថានជាតិប្រជាធិបតេយ្យNDI បិទវិទ្យុក្នុងស្រុកមួយចំនួនដែលផ្សាយបន្តនូវកម្មវិធីព័ត៌មានរបស់វិទ្យុអាស៊ីសេរី និងវិទ្យុសំឡេងសហរដ្ឋអាមេរិក ក៏ដូចជាការគំរាមបិទកាសែតCambodia Daily ប្រសិនបើមិនបង់ពន្ធចំនួន៦.៣លានដុល្លារអាមេរិកទៅតាមពេលកំណត់នៅថ្ងៃទី០៤ ខែកញ្ញាខាងមុនេះ។
ក្រៅពីបញ្ហាទាំងអស់នេះ ក្រុមសមាជិកសភាអាស៊ានសម្រាប់សិទ្ធិមនុស្សក៏បានសម្តែងការព្រួយបារម្ភផងដែរទាក់ទងទៅនឹងរបាយការណ៍ស្តីពីឧបាយកលសំខាន់ជាច្រើនដែលផ្សាយឡើងតាមអ៊ីនធើណីតរួមទាំងប្រព័ន្ទផ្សព្វផ្សាយដែលស្និតនឹងរដ្ឋាភិបាលមួយចំនួនដែលភ្ជាប់សមាជិកគណបក្សប្រឆាំងទៅនឹងអង្គការសង្គមស៊ីវិលក្នុងការរៀបចំផែនការផ្តួលរំលំរដ្ឋាភិបាលកម្ពុជា។ ជាមួយគ្នានេះ ក្រុមសមាជិកសភាអាស៊ានសម្រាប់សិទ្ធិមនុស្សបានសង្កត់ធ្ងន់ថា អាជ្ញាធរកម្ពុជាបានបរាជ័យ ដោយមិនបានថ្កោលទោសចំពោះការចោទប្រកាន់មិនពិតទាំងនេះ។
ប្រឈមនឹងបញ្ហាទាំងអស់នេះ ក្រុមសមាជិកសភាអាស៊ានសម្រាប់សិទ្ធិមនុស្សបានអំពាវនាវដល់បណ្តាប្រទេសសមាជិកអាស៊ានក៏ដូចជាសហគមន៍អន្តរជាតិឲ្យធ្វើការរួមគ្នាកាន់តែប្រសើរឡើងដើម្បីធ្វើការគាំទ្រនូវការប្តេជ្ញាចិត្តក្នុងការគាំទ្រដល់ការអភិវឌ្ឍលទ្ធិប្រជាធិបតេយ្យនិងសិទ្ធិមនុស្សនៅកម្ពុជា រួមបញ្ចូលទាំងខ្លឹមសារនៅក្នុងកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ផងដែរ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ