លោក ហ៊ុន សែន៖ វប្បធម៌សន្ទនាជាមូលដ្ឋានក្នុងការដោះស្រាយបញ្ហាដោយសន្តិវិធី
ថ្ងៃទី២១កញ្ញានេះ គឺជាទិវាសន្តិភាពអន្ដរជាតិលើកទី១៣។ នៅក្នុងសារលិខិតអបអរទិវាសន្តិភាពអន្ដរជាតិនេះ លោកនាយករដ្ឋមន្ដ្រី ហ៊ុន សែន បានអួតពីស្នាដៃកសាងសន្តិភាពរបស់រដ្ឋាភិបាលលោកសម្រាប់ប្រទេសកម្ពុជា និងការរួមចំណែកការពារ និងថែរក្សាសន្តិភាពនៅលើសាកលលោកផងដែរ។ ក្រៅពីនេះ លោក ហ៊ុន សែន នាយករដ្ឋមន្ដ្រី បានអំពាវនាវឲ្យគ្រប់ភាគីពាក់ព័ន្ធទាំងអស់ បន្តអនុវត្តវប្បធម៌សន្ទនាឲ្យបានខ្ជាប់ខ្ជួន។ ព្រោះបើតាមលោកនាយករដ្ឋមន្ដ្រី វប្បធម៌សន្ទនា ជាមូលដ្ឋានក្នុងការពិភាក្សាដោះស្រាយបញ្ហាជាតិនិងសង្គម ដោយសន្តិវិធី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
លោកនាយករដ្ឋមន្ដ្រីហ៊ុន សែន ចាប់ផ្ដើមសារលិខិតអបអរទិវាសន្តិភាពអន្ដរជាតិលើកទី១៣ ដោយលើកឡើងពីតម្លៃនៃសន្តិភាពសម្រាប់ប្រជាជនកម្ពុជា។ បើតាមលោកនាយករដ្ឋមន្ដ្រី សន្តិភាព ជាបំណងប្រាថ្នាដ៏ពិសិដ្ឋរបស់ប្រជាជនទាំងអស់នៅក្នុងសកលលោក ជាពិសេសប្រជាពលរដ្ឋកម្ពុជា ដែលបានឆ្លងកាត់សង្គ្រាមយ៉ាងវេទនាខ្លោចផ្សារអស់ជិត៣ទស្សវត្សរ៍។ ការឈឺចាប់ ការរងទុក្ខវេទនា និងភាពខ្លោចផ្សារទាំងនេះ នៅតែដិតក្នុងអារម្មណ៍របស់ពលរដ្ឋកម្ពុជាគ្រប់រូប ដែលនាំឲ្យយល់ច្បាស់ណាស់ពីតម្លៃនៃសន្តិភាព។ នេះបើតាមប្រមុខរដ្ឋាភិបាលកម្ពុជា។
នៅក្នុងសារលិខិតអបអរទិវាសន្តិភាពអន្ដរជាតិនេះ លោកនាយករដ្ឋមន្ដ្រី ហ៊ុន សែន បានអួតពីស្នាដៃកសាងសន្តិភាពរបស់រដ្ឋាភិបាលលោកសម្រាប់ប្រទេស កម្ពុជា និងការរួមចំណែកការពារ និងថែរក្សាសន្តិភាពនៅលើសាកលលោកផងដែរ។ លោកថា សង្គ្រាមដ៏រ៉ាំរ៉ៃជិតបីទស្សវត្សរ៍នៅកម្ពុជា ត្រូវបានបញ្ចប់ទាំងស្រុងនៅឆ្នាំ១៩៩៨ តាមរយៈនយោបាយឈ្នះឈ្នះ នាំមកវិញនូវសន្តិភាព ការឯកភាពជាតិ ព្រមទាំងការរីកចម្រើនក្នុងវិស័យសេដ្ឋកិច្ចនិង
សង្គម។
ប្រមុខរដ្ឋាភិបាលកម្ពុជា បានអះអាងទៀតថា ការលើកស្ទួយនីតិរដ្ឋ ការអនុវត្តលទ្ធិប្រជាធិបតេយ្យ និងការការពារសិទ្ធិមនុស្ស ក៏កំពុងមានដំណើរការល្អនៅក្នុងក្របខណ្ឌរដ្ឋធម្មនុញ្ញ ច្បាប់ជាតិ និងសេចក្ដីប្រកាសជាសកលស្ដីពីសិទ្ធិមនុស្ស ដើម្បីធានានូវសិទ្ធិសេរីភាពជាមូលដ្ឋានរបស់ប្រជាពលរដ្ឋ។ ជាមួយគ្នានេះ បើតាមលោក ហ៊ុន សែន នាយករដ្ឋមន្ដ្រី រដ្ឋាភិបាលក៏មានការប្ដេជ្ញាខ្ពស់ផងដែរ ក្នុងការវាយបំបាក់ និងទប់ស្កាត់រាល់សកម្មភាពនិងល្បិចកលក្រោមផ្លាក លទ្ធិប្រជាធិបតេយ្យនិងសិទ្ធិមនុស្ស បំរើផលប្រយោជន៍នយោបាយបុគ្គល ឬក្រុមមនុស្សមួយក្ដាប់តូច។
ប្រមុខរដ្ឋាភិបាលកម្ពុជា បានអំពាវនាវដល់គ្រប់ភាគីពាក់ព័ន្ធទាំងអស់ ទាំងអង្គការអន្ដរជាតិ និងសង្គមស៊ីវិលទាំងអស់នៅកម្ពុជា ឲ្យបន្តអនុវត្ត ថែបំប៉ន និងពង្រឹងវប្បធម៌សន្ទនាឲ្យបានខ្ជាប់ខ្ជួន។ ព្រោះបើតាមលោកនាយករដ្ឋមន្ដ្រី វប្បធម៌សន្ទនា ជាមូលដ្ឋានក្នុងការពិភាក្សាដោះស្រាយដោយសន្តិវិធីនូវបញ្ហាជាតិ និងសង្គម ដោយភាពស្មោះត្រង់ ជាមួយនឹងការគោរព និងឲ្យតម្លៃគ្នាទៅវិញទៅមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ