ក្រសួងមហាផ្ទៃ៖ រហូតមកទល់ពេលនេះមានជនភៀសខ្លួនអូស្ត្រាលីតែម្នាក់គត់យល់ព្រមមកកម្ពុជា
ជាថ្មីម្ដងទៀត សារព័ត៌មាន The Guardian នៅអូស្ត្រាលី បានរាយការណ៍ឲ្យដឹងនៅថ្ងៃចន្ទទី២៧នេះថា ជនភៀសខ្លួនយ៉ាងហោចណាស់៤នាក់ហើយ ដែលបានយល់ព្រមមករស់នៅលើទឹកដីកម្ពុជា។ ភ្លាមៗបន្ទាប់ពីការចុះផ្សាយនេះ ក្រសួងមហាផ្ទៃបានចេញមុខមកបញ្ជាក់ជាថ្មីថា រហូតមកទល់ចុងសប្ដាហ៍កន្លងទៅនេះ មានជនភៀសខ្លួននៅអូស្ត្រាលីតែម្នាក់គត់ ដែលយល់ព្រមមករស់នៅប្រទេសកម្ពុជា។ ហើយជនភៀសខ្លួនដែលស្ម័គ្រចិត្តមកកម្ពុជានោះទៀតសោត ត្រូវទទួលបានការអនុញ្ញាតពីក្រសួងមហាផ្ទៃកម្ពុជា ជាមុនសិន មុននឹងចាកចេញពីអូស្ត្រាលី មកតាំងទីលំនៅថ្មីនៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
យោងតាមកាសែត The Guardian ជនភៀសខ្លួន៤នាក់ ដែលស្ម័គ្រចិត្តមកតាំងទីលំនៅថ្មីនៅកម្ពុជានោះ រួមមាន បុរសជនជាតិភូមារ៉ូហ៊ីងយ៉ាម្នាក់ បុរសជនជាតិអ៊ីរ៉ង់ម្នាក់ និងគូស្វាមីភរិយាមួយគូ។
ក្រៅពីបានរាយការណ៍ថា ចំនួនជនភៀសខ្លួននៅអូស្ត្រាលីដែលយល់ព្រមមកតាំងទីលំនៅថ្មីនៅកម្ពុជា កើនឡើងដល់៤នាក់ហើយនោះ សារព័ត៌មាន The Guardian នៅអូស្ត្រាលី ក៏បានឲ្យដឹងបន្ថែមទៀតថា ជនភៀសខ្លួន៣នាក់ក្នុងចំណោមនោះ កំពុងស្ថិតនៅក្នុងមជ្ឈមណ្ឌលមួយ រង់ចាំថ្ងៃធ្វើដំណើរមកកម្ពុជា។ យ៉ាងណាក៏ដោយ បើតាមកាសែត The Guardian កាលបរិច្ឆេទនៃការចាកចេញពីអូស្ត្រាលីមកកាន់កម្ពុជា នៅមិនទាន់ច្បាស់លាស់នៅឡើយ។
ភ្លាមៗបន្ទាប់ពីការចុះផ្សាយដូច្នេះ ក្រសួងមហាផ្ទៃកម្ពុជា តាមរយៈលោកខៀវ សុភ័គ ដែលជាអ្នកនាំពាក្យ បានបញ្ជាក់ប្រាប់វិទ្យុបារាំងអន្ដរជាតិ នៅថ្ងៃចន្ទនេះថា មានជនភៀសខ្លួននៅអូស្ត្រាលីតែម្នាក់គត់ ដែលយល់ព្រមមករស់នៅប្រទេសកម្ពុជា គិតត្រឹមចុងសប្ដាហ៍កន្លងទៅនេះ។ បើតាមលោក ខៀវ សុភ័គ ជនភៀសខ្លួននៅអូស្ត្រាលី ដែលស្ម័គ្រចិត្តមកតាំងទីលំនៅថ្មីនៅកម្ពុជា ត្រូវធ្វើការចុះឈ្មោះជាលាយលក្ខណ៍អក្សរជាមុនសិន។ ក្រោយមក ក្រុមការងារដែលសម្រួបសម្រួលលើបញ្ហានេះ នឹងនាំយកបញ្ជីឈ្មោះផ្លូវការ មកសុំសេចក្ដីសម្រេចពីក្រសួងមហាផ្ទៃនៃរាជរដ្ឋាភិបាលកម្ពុជាជាមុនសិន មុននឹងចាត់ចែតនាំយកជនភៀសខ្លួនដែលស្ម័គ្រចិត្តផ្លាស់ទីលំនៅទាំងអស់ មកកាន់កម្ពុជា។
សូមរំលឹកថា កិច្ចព្រមព្រៀងទទួលយកជនភៀសខ្លួនពីអូស្ត្រាលីមកកម្ពុជា បានទទួលរងនូវការតវ៉ាជំទាស់យ៉ាងខ្លាំងពីសំណាក់សង្គមស៊ីវិល មន្ដ្រីគណបក្សប្រឆាំង និងសាធារណជន។ ការតវ៉ាជំទាស់ធ្វើឡើងដោយលើកហេតុផលថា ស្ថានភាពរបស់កម្ពុជានៅពេលនេះ មិនទាន់អាចទទួលយកជនភៀសខ្លួនបាននៅឡើយទេ។ យ៉ាងណាក៏ដោយ រដ្ឋាភិបាលកម្ពុជា ធ្លាប់បានអះអាងថា ការទទួលជនភៀសខ្លួនទាំងនោះ ធ្វើឡើងដោយផ្អែកទៅលើគោលការណ៍ស្ម័គ្រចិត្តតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ