កិច្ចប្រជុំក្រុមការងារគណៈកម្មាធិការចម្រុះព្រំដែនកម្ពុជា-វៀតណាមលើកមកធ្វើនៅភ្នំពេញ
បើគ្មានការប្រែប្រួលនោះទេ ក្រុមការងារគណៈកម្មាធិការចម្រុះកិច្ចការព្រំដែនកម្ពុជា-វៀតណាម នឹងជួបប្រជុំគ្នានៅថ្ងៃទី៦កក្កដាស្អែកនេះនៅក្នុងទីក្រុងភ្នំពេញ។ ដើមឡើយកិច្ចប្រជុំនេះ គ្រោងធ្វើនៅខេត្តសៀមរាប ប៉ុន្តែបានផ្លាស់ប្តូរមកធ្វើនៅទីក្រុងភ្នំពេញវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ដើមឡើយកិច្ចប្រជុំនេះ គ្រោងនឹងធ្វើនៅខេត្តសៀមរាបឯណោះទេ ក៍ប៉ុន្តែ ក្រុមអ្នករៀបចំកិច្ចប្រជុំ បានផ្លាស់ប្តូរ មកធ្វើនៅទីក្រុងភ្នំពេញវិញ។ មូលហេតុ គឺដោយសារថា ខេត្តសៀមរាបនៅឆ្ងាយដែលពិបាកដល់ការធ្វើដំណើររបស់ថ្នាក់ដឹកនាំនៃប្រទេសទាំងពីរ។ នេះបើតាមការបញ្ជាក់ពី លោកស្រី កុយ ពិសី អនុប្រធានគណៈកម្មាធិការចម្រុះកិច្ចការព្រំដែនកម្ពុជា។
ប៉ុន្តែការផ្លាស់ប្តូរភ្លាមៗនេះ បានបង្ករជាការលំបាកសម្រាប់ក្រុមការងាររៀបចំកិច្ចប្រជុំក្នុងការស្វែងរកទីកន្លែងប្រជុំផងដែរ។
តាមគម្រោងក្រុមការងារគណៈកម្មាធិការចម្រុះកិច្ចការព្រំដែនកម្ពុជា-វៀតណាម នឹងជួបប្រជុំគ្នារយៈពេល៣ថ្ងៃនៅកម្ពុជា ចាប់ពីថ្ងៃទី៦ដល់ថ្ងៃទី៩ កក្កដា ដើម្បីដោះស្រាយពីបញ្ហាព្រំដែនកម្ពុជា-វៀតណាមដែលនៅសេសល់មួយចំនួន ជាពិសេសគឺដោះស្រាយបាតុភាពចុងក្រោយ ដែលកំពុងកើតឡើងនៅតាមព្រំដែននៃប្រទេសទាំងពីរ។
លោក វ៉ា គឹមហុង ប្រធានគណៈកម្មាធិការចម្រុះកិច្ចការព្រំដែនកម្ពុជា បានថ្លែងនៅល្ងាចថ្ងៃទី៥កក្កដានេះថា «កិច្ចប្រជុំនឹងដំណើរការជាធម្មតា»។
សូមបញ្ជាក់ជូនថា បញ្ហាព្រំដែនកម្ពុជា-វៀតណាម កំពុងឡើងកំដៅជាខ្លាំង ពិសេសនៅព្រំដែនកម្ពុជា-វៀតណាម ស្ថិតនៅខេត្តស្វាយរៀងត្រង់បង្គោលព្រំដែនលេខ២០២ និង២០៣។ នៅត្រង់បង្គោលព្រំដែនទាំងពីរនេះ ក្រុមប្រជាពលរដ្ឋកម្ពុជា និងវៀតណាម ទើបតែបានប៉ះទង្គិចគ្នាកាលពីថ្ងៃទី២៨មិថុនាកន្លងទៅដែលនាំឲ្យមានការរងរបួសប្រជាពលរដ្ឋខ្មែរ១០នាក់ និងភាគីវៀតណាមរបួស៨នាក់។ ហើយកាលពីថ្ងៃទី៤កក្កដានេះទៀត ប្រធានអង្គការ C-Right ម្នាក់ គឺលោក ផែន ប៊ុនធឿន ត្រូវបានអាជ្ញាធរវៀតណាមឃាត់ខ្លួនមួយយប់ បន្ទាប់ពីលោកបានដឹកនាំកុមានៃអង្គការខាងកុមារប្រចាំនៅខេត្តស្វាយរៀងនេះ ចុះទៅមើលបង្គោលព្រំដែនលេខ២០២។
ជុំវិញបញ្ហាព្រំដែនកម្ពុជា-វៀតណាមនេះ ក្រុមអ្នកតំណាងរាស្រ្តគណបក្សសង្រ្គោះជាតិកាលពីថ្ងៃទី៣០មិថុនា បានសរសេរលិខិតមួយច្បាប់ ជូនលោកនាយករដ្ឋមន្រ្តី ហ៊ុន សែន ដោយបានស្នើសុំឲ្យរដ្ឋាភិបាលដាក់ពាក្យបណ្តឹងទៅកាន់តុលាការយុត្តិធម៌អន្តរជាតិទីក្រុងឡាអេ (ICJ) ចំពោះការរំលោភដែនអធិបតេយ្យភាពកម្ពុជាពីសំណាក់ភាគីវៀតណាម។
ចំពោះបញ្ហាព្រំដែនកម្ពុជា-វៀតណាមនេះ ក៍កំពុងទទួលបានការចាប់អារម្មណ៍ពីសំណាក់ប្រមុខអង្គការសហប្រជាជាតិលោក បាន គីមូន ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ