អាជ្ញាធរកម្ពុជាប្រកាសជោគជ័យ លើការការពារសន្តិសុខក្នុងរយៈពេល៣ថ្ងៃនៃពិធីបុណ្យអុំទូក
បុណ្យអុំទូករយៈពេលបីថ្ងៃ គ្រោះថ្នាក់ចរាចរណ៍បានបណ្តាលឲ្យមនុស្ស១៤នាក់ស្លាប់ និង៩៩នាក់រងរបួសខណៈដែលបទល្មើសទូទៅបានថយចុះបើធៀបនឹងរយៈពេលដូចគ្នាកាលពីឆ្នាំ២០១៤។ ចំពោះបញ្ហាសន្តិសុខសណ្តាប់ធ្នាប់វិញ ត្រូវបានអាជ្ញាធរកម្ពុជាវាយតម្លៃថា បានប្រព្រឹត្តទៅប្រកបដោយភាពជោគជ័យបំផុត។
ចុះផ្សាយនៅថ្ងៃ៖
ស្តាប់ - ០២:៤០
ដោយបានប្រៀបធៀបទៅនឹងពិធីបុណ្យអុំទូកចុងក្រោយរបស់កម្ពុជាកាលពីឆ្នាំ២០១៤ អាជ្ញាធរកម្ពុជានៅថ្ងៃនេះបានវាយតម្លៃថា ពិធីបុណ្យអុំទូកឆ្នាំនេះ បានប្រព្រឹត្តទៅប្រកបដោយជោគជ័យដ៏ធំធេងបំផុត និងទទួលបានការចូលរួមពីមហាជនខ្មែរជាច្រើន។ នៅក្នុងសន្និសីទកាសែតនៅថ្ងៃនេះ លោកនាយឧត្តមសេនីយ៍ គៀត ច័ន្ទថារិទ្ធ អគ្គស្នងការរងនិងជាអ្នកនាំពាក្យអគ្គស្នងការដ្ឋាននគរបាលជាតិបានមានប្រសាសន៍ថា អ្វីៗទាំងអស់បានប្រព្រឹត្តទៅក្នុងលក្ខណៈល្អប្រសើរ ប្រកបដោយកិត្តិយស និងសេចក្តីថ្លៃថ្នូ សម្រាប់ជាតិទាំងមូល។ ព្រោះថា ក្នុងរយៈពេលបីថ្ងៃនេះ សភាពការណ៏សន្តិសុខទូទៅមានភាពល្អប្រសើរ ពោលគឺពុំមានអ្វីធំដុំកើតឡើង ដែលជាការគំរាមកំហែងដល់ពិធីបុណ្យ ឬ អាយុជីវិតរបស់ប្រជាពលរដ្ឋអ្នកចូលរួមនោះទេ។
ផ្អែកតាមរបាយការណ៍នេះ បទល្មើសនៅទូទាំងប្រទេស ក្នុងរយៈពេល៣ថ្ងៃនៃពិធីបុណ្យអុំទូក ចាប់ពីថ្ងៃទី១៣ដល់ថ្ងៃទី១៥វិច្ឆិកាឆ្នាំ២០១៦នេះ បានកើតឡើងចំនួន២៨លើកក្នុងនោះបទឧក្រិដ្ឋមានចំនួន៧ករណី និងបានឃាត់ខ្លួនមនុស្សបានចំនួន៤០នាក់។ ដោយឡែកសម្រាប់ តែរាជធានីភ្នំពេញក្នុងរយៈពេល៣ថ្ងៃនេះ ករណីខ្វេះហោប៉ៅបានកើតឡើងចំនួន១៨លើក ក្នុងនោះសមត្ថកិច្ចឃាត់ខ្លួនមនុស្ស១៦នាក់, ករណីខ្យល់គរ ថប់ដង្ហើមចំនួន១៤ករណី, ករណីកីឡាករធ្លាក់ទឹកចំនួន១៨នាក់, លិចទូកចំនួន៤គ្រឿង និងករណីក្មេងវង្វែងបាត់ឳពុកម្តាយចំនួន៥៧ករណី។ ដោយឡែកលើគ្រោះថ្នាក់ចរាចរណ៍នៅទូទាំងប្រទេសក្នុងរយៈពេល៣ថ្ងៃនេះវិញមានចំនួន៣៤លើក បានបណ្តាលឲ្យមនុស្សចំនួន១៤នាក់ស្លាប់និង៩៩នាក់រងរបួស។
គួរជំរាបជូនថា នៅក្នុងពិធីបុណ្យអុំទូករយៈពេល៣ថ្ងៃនេះនៅភ្នំពេញ អាជ្ញាធរកម្ពុជាបានដាក់ពង្រាយកងកម្លាំងគ្រប់ប្រភេទជាង១ម៉ឺននាក់ ព្រោះថា បញ្ហាសន្តិសុខគឺជាអាទិភាពរបស់អាជ្ញាធរកម្ពុជា ក្រោយពីព្រឹត្តិការណ៍រត់ជាន់គ្នាស្លាប់នៅកោះពេជ្រជាង៣០០នាក់កាលពីឆ្នាំ២០១០ និងរលកបាតុកម្មរបស់គណបក្សប្រឆាំងក្រោយការបោះឆ្នោតជាតិនៅឆ្នាំ២០១៣។ ទោះជាយ៉ាងនេះក្តី អាជ្ញាធរកម្ពុជាបានបង្ហាញការសោកស្តាយផងដែរចំពោះឧបទ្ទវហេតុស្លាប់មនុស្ស៤នាក់ ដោយសារតែលិចទូកទេសចរណ៍នៅខេត្តកំពត នឹងបានចាត់ទុកករណីនេះថា ជាបទពិសោធន៍ថ្មីរបស់ខ្លួន។
សូមបញ្ជាក់ថា ព្រះរាជពិធីបុណ្យអុំទូក បណ្តែតប្រទីប និងអកអំបុក សំពះព្រះខែ ត្រូវបានរដ្ឋាភិបាលកម្ពុជាប្រារព្ធឡើងវិញ បន្ទាប់ពីខកខានចំនួន៤លើកក្រោមហេតុផលផ្សេងៗគ្នា។ នៅឆ្នាំនេះ មានទូកចំនួន២៥៧ចូលរួម ហើយក្នុងនោះទូកដែលមានឈ្មោះថា “សារាយតេជោសែនជ័យ” មកពីខេត្តកំពង់ស្ពឺ ត្រូវបានវាយតម្លៃថា ជាទូកដែលមានល្បឿនលឿនជាងគេប្រចាំឆ្នាំនេះ។ ពិធីបុណ្យអុំទូកនៅឆ្នាំនេះ បានបិទបញ្ចប់ទៅ ជាមួយនឹងការរិះគន់ពីការគ្រប់គ្រងសម្រាមមិនបានល្អផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ