ព្រះមហាក្សត្រត្រាស់បង្គាប់ក្រសួងវប្បធម៌គ្រប់គ្រងអាជ្ញាធរជាតិសំបូរព្រៃគុក
ព្រះមហាក្សត្រនៃព្រះរាជាណាចក្រកម្ពុជា សម្តេចព្រះបរមនាថ នរោត្តម សីហមុនី ទ្រង់បានចេញព្រះរាជក្រឹត្យត្រាស់បង្គាប់ឲ្យក្រសួងវប្បធម៌ និងវិចិត្រសិល្បៈ ជាអ្នកគ្រប់គ្រងលើអាជ្ញាធរជាតិសំបូរព្រៃគុក។ អាជ្ញាធរជាតិសំបូរព្រៃគុក ឬ អាជ្ញាធរជាតិដើម្បីការពារ និងអភិវឌ្ឍរមណីយដ្ឋានវប្បធម៌ប្រាសាទសំបូរព្រៃគុក ដែលត្រូវបានព្រះមហាក្សត្រ បង្កើតឡើង ដើម្បីថែរក្សា និងទប់ស្តាប់បទល្មើសព្រៃឈើ ក្នុងតំបន់រមណីយដ្ឋានបុរាណនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
នៅក្នុងព្រះរាជក្រឹត្យ ចុះថ្ងៃទី ៣១សីហា ឆ្នាំ ២០១៥ ព្រះមហាក្សត្រនៃព្រះរាជាណាចក្រកម្ពុជា ទ្រង់បានត្រាស់បង្គាប់ឲ្យក្រសួងវប្បធម៌ និងវិចិត្រសិល្បៈ គ្រប់គ្រងលើអាជ្ញាធរសំបូរព្រៃគុក។ អាជ្ញាធរសំបូរព្រៃគុក ដែលមានបេសកកម្មអភិរក្ស និងអភិវឌ្ឍតំបន់រមណីយដ្ឋានប្រសាទសំបូរព្រៃគុក។
តាមមាត្រា ៣នៃព្រះរាជក្រឹត្យ តម្រូវឲ្យអាជ្ញាធរនេះ ត្រូវការពារ ថែរក្សា អភិរក្ស និងលើកតំលៃឧទ្យានបុរាណវិទ្យានេះ។ ត្រូវគិតគូរ និងអនុវត្តឱ្យបានសម្រេចនូវផែនការសកម្មភាព និងកម្មវីធីរៀបចំអភិវឌ្ឍទេសចរណ៍ក្នុងតំបន់រមណីយដ្ឋានប្រាសាទសំបូរព្រៃគុក។ ហើយត្រូវគ្រប់គ្រង និងចាត់ចែងការប្រើប្រាស់ដីធ្លី ក្នុងតំបន់រមណីយដ្ឋាននេះ។ ក្នុងនោះ ក៏ត្រូវទប់ស្កាត់បទល្មើសព្រៃឈើ និងអំពើអនាធិបតេយ្យនៅក្នុងតំបន់រមណីយដ្ឋាននេះឲ្យខានតែបានផងដែរ។
លើសពីនេះ អាជ្ញាធរសំបូរព្រៃគុក ក៏តម្រូវឲ្យរួមចំនែកកាត់បន្ថយភាពក្រីក្ររបស់រដ្ឋាភិបាល និងត្រូវសហការជាមួយក្រុមប្រឹក្សាអភិវឌ្ឈន៍កម្ពុជា ដើម្បីផ្តល់ការអនុញ្ញាតឲ្យវិនិយោគនូវគម្រោងទាំងឡាយផងដែរ។
ក្នុងនោះតាមមាត្រា ៤ ក៏តម្រូវឲ្យបង្កើតនូវក្រុមប្រឹក្សាភិបាលមួយ ដោយមានសមាសភាព ក្រសួងពាក់ព័ន្ធនានា ដែលមានភារកិច្ចដឹកនាំអាជ្ញាធរសំបូរព្រៃគុក និងមានសិទ្ធិអនុម័តលើការតម្រង់ទិសរាល់សកម្មភាពរបស់អាជ្ញាធរសំបូរព្រៃគុក។ ប្រធានអាជ្ញាធរ ក៏អាចចុះហត្ថលេខាលើកិច្ចព្រមព្រៀង ពិធីសារ ឬកិច្ចសន្យាអន្តរជាតិទាំងឡាយ។ ជារួម គឺអាជ្ញាធរសំបូរព្រៃគុក មានសិទ្ធិផ្តាច់មុខ ក្នុងការចេញលិខិតអនុញ្ញាតសាងសង់ សម្រាប់ការស្ថាបនាទាំងឡាយ នៅតំបន់រមណីយដ្ឋានប្រាសាទសំបូរព្រៃគុក។
ក្រៅតែពីការអភិរក្សហើយ អាជ្ញាធរសំបូរព្រៃគុក ក៏តម្រូវឲ្យបង្កើតគណនីពិសេសមួយ មានឈ្មោះថា «មូលនិធិបុរាណវិទ្យាប្រាសាទសំបូរព្រៃគុក» ដើម្បីប្រមូល និងទទួលយកមូលនិធិ ព្រមទាំងវិភាគទាន ពីសហគមន៍ជាតិ និងអន្តរជាតិ ដើម្បីប្រយោជន៍ក្នុងកម្មវិធីទ្រទ្រង់ប្រាសាទសំបូរព្រៃគុកផងដែរ។
សូមបញ្ជាក់ថា រមណីយដ្ឋានប្រវត្តិសាស្ត្រប្រាសាទសំបូរព្រៃគុក ស្ថិតនៅឃុំសំបូរ ស្រុកប្រាសាទសំបូរ ខេត្តកំពង់ធំ ដែលមានចម្ងាយប្រមាណ ៤០គីឡូម៉ែត្រពីទីរួមខេត្តកំពង់ធំ។ ប្រាសាទនេះ ត្រូវបានកសាងឡើង នៅពាក់កណ្តាលសតវត្សរ៍ទី៧ ដើម្បីឧទ្ទិសចំពោះព្រហ្មញ្ញសាសនា។ ហើយប្រាសាទនេះ មានរចនាបថសំបូរព្រៃគុក ដែលជារចនាបថស្ថាបត្យកម្មដំបូងបំផុត ដែលមានលក្ខណៈជាខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ