មន្ត្រីសុខាភិបាលនឹងចុះទៅតាមពន្ធនាគារផ្តល់ការបណ្ដុះបណ្ដាល និងថ្នាំព្យាបាលដល់អ្នកជាប់ឃុំ
ឆ្លើយតបនឹងសំណើរបស់ក្រសួងមហាផ្ទៃ លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានបញ្ជាក់ប្រាប់វិទ្យុបារាំងថា មន្រ្តីសុខាភិបាលនឹងចុះទៅតាមពន្ធនាគារដើម្បីផ្ដល់ការបណ្ដុះបណ្ដាលដល់មន្ត្រីពន្ធនាគារពីរបៀបព្យាបាលនិងផ្ដល់ថ្នាំព្យាបាលដល់ជនជាប់ឃុំដែលមានផ្ទុកសារជាតិញៀន។ សូមបញ្ជាក់ថា ក្រសួងមហាផ្ទៃ កាលពីថ្ងៃទី០៩មីនា បានសុំកិច្ចសហការពីក្រសួងសុខាភិបាល ដើម្បីសម្រួលដល់ការព្យាបាលជនជាប់ឃុំដែលមានផ្ទុកសារជាតិញៀន នៅតាមពន្ធនាគាររាជធានី ខេត្ត និង មណ្ឌលអប់រំកែប្រែទាំងបួន ។ ក្រសួងមហាផ្ទៃយល់ថា ក្រសួងសុខាភិបាលមាននាយកដ្ឋានជំនាញនិងសម្ភារៈបច្ចេកទេសបន្សាបសារជាតិញៀន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៥
លោក ម៉ម ប៊ុនហេង បានស្វាគមរីករាយនឹងធ្វើកិច្ចការបណ្ដុះបណ្ដាល និងផ្ដល់ថ្នាំព្យាបាលដល់អ្នកជាប់ឃុំ ជាមួយក្រសួងមហាផ្ទៃ ដែលជាការងារមួយសម្រាប់លោករដ្ឋមន្ត្រីចាត់ទុកថា គឺជាការជួយគ្នា ព្រោះថា ការព្យាបាលអ្នកជំងឺនៅតាមពន្ធនាគារជាផ្នែកមួយដែលក្រសួងសុខាភិបាលធ្លាប់ធ្វើច្រើនដងរួចមកហើយ។
ដំណើរចុះទៅកាន់ពន្ធនាគារនឹងធ្វើឡើង តាមរយៈការចុះទៅដោយផ្ទាល់របស់ មន្ត្រីមន្ទីរសុខាភិបាលនៅគ្រប់បណ្ដាខេត្តដែលមានស្រាប់។ ជំហានដំបូងមន្ត្រីក្រសួងសុខាភិបាលនឹងផ្ដល់ការបណ្ដុះបណ្ដាលបន្ថែមដល់មន្ត្រីពន្ធនាគារ ផ្ដល់គ្រឿងបរិក្ខារ និង ថ្នាំសង្កូវ ជាដើម។ លោក ម៉ម ប៊ុនហេង ទទួលស្គាល់ថា ការព្យាបាលជនជាប់ឃុំដែលមានផ្ទុកសារជាតិញៀនជាបញ្ហាមួយដែលគេត្រូវរួមគ្នាដោះស្រាយ និងបង្ការកុំឲ្យមានការរាលដាលទៅដល់អ្នកដទៃទៀត។
ក្រសួងមហាផ្ទៃក៏បានទទួលស្គាល់ថា បច្ចុប្បន្ន នៅតាមពន្ធនាគាររាជធានី/ខេត្ត និងមណ្ឌលអប់រំកែប្រែ មានបាតុភាពលួចប្រើប្រាស់គ្រឿងញៀន ក្នុងចំណោមអ្នកទោសគួរឲ្យកត់សម្គាល់។ ជាក់ស្ដែងរបាយការណ៍ប្រចាំឆ្នាំ២០១៥របស់អាជ្ញាធរជាតិប្រយុទ្ធប្រឆាំងគ្រឿងញៀនបានបង្ហាញឲ្យដឹងថា ចំនួនជនជាប់ឃុំដែលមានផ្ទុកសារជាតិញៀន មានចំនួនដល់ទៅ៥,៦៥០នាក់ប្រហាក់ប្រហែលទៅនឹងមួយភាគបី នៃចំនួនជនជាប់ឃុំសរុបនៅទូទាំងប្រទេស។
ទន្ទឹមនឹងនេះ ដោយមើលឃើញពីភាពចាំបាច់ក្នុងការគ្រប់គ្រងជនជាប់ឃុំប្រកបដោយសន្តិសុខ សុវត្ថិភាព និង មនុស្សធម៌ លោកនាយករដ្ឋមន្ត្រី ហ៊ុន សែន បានសម្រេចឲ្យមានការផ្ដល់សេវាព្យាបាលជនជាប់ឃុំ ដែលមានសារធាតុញៀននៅក្នុងខ្លួន ដែលតម្រូវឲ្យមានកិច្ចសហការណ៍ពីសំណាក់ក្រសួង អង្គភាព និង អាជ្ញាធរមូលដ្ឋានពាក់ព័ន្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ