ទឹកជំនន់៖ មនុស្ស៣នាក់ស្លាប់ ខណៈពលរដ្ឋជាច្រើនគ្រួសារបានជម្លៀសទៅ កន្លែងមានសុវត្ថិភាព
យ៉ាងហោចណាស់មានមនុស្ស៣នាក់បានស្លាប់ ដោយជំនន់ទឹកទន្លេមេគង្គ។ ទន្ទឹមនឹងនេះ គណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងថា ប្រជាពលរដ្ឋជាច្រើនគ្រួសារ ដែលរស់នៅបណ្ដាខេត្តជាប់ទន្លេមេគង្គ ក៏ត្រូវបានជម្លៀសទៅកាន់ទីទួលសុវត្ថិភាព ព្រោះតែកម្ពស់ទឹកឡើងដល់កម្រិតប្រកាសអាសន្ន។
ចុះផ្សាយនៅថ្ងៃ៖
ស្តាប់ - ០១:៥២
លោក កែវ វី អ្នកនាំពាក្យគណៈកម្មាការជាតិគ្រប់គ្រងគ្រោះមហន្តរាយបានអះអាងប្រាប់វិទ្យុបារាំងអន្តរជាតិនៅថ្ងៃពុធនេះថា ចាប់តាំងពីកម្ពុជាជួបប្រទះនឹងស្ថានភាពទឹកជំនន់ទន្លេមេគង្គមក គឺមានពលរដ្ឋប្រុសស្រីចំនួន៣នាក់ហើយ បានស្លាប់នៅក្នុងហេតុការណ៍នេះ។ ក្នុងចំណោមអ្នកទាំង៣នាក់ មានម្នាក់ជាបុរសរស់នៅខេត្តកំពង់ចាមបានស្លាប់ ដោយលង់ទឹក ខណៈ២នាក់ទៀតជាស្ត្រីនិងកុមាររស់នៅខេត្តស្ទឹងត្រែងបានស្លាប់ក្រោមរូបភាពប្រហាក់ប្រហែលគ្នានេះដែរ។
ទន្ទឹមនឹងមានការស្លាប់ដោយទឹកជំនន់នេះ ប្រជាជន និងសត្វពាហនៈនៅតាមខេត្តជាប់ទន្លេមេគង្គដូចជា ខេត្តស្ទឹងត្រែង ក្រចេះ ត្បូងឃ្មុំ និងកំពង់ចាម ជាដើមត្រូវបានជម្លៀសទៅកាន់ទីទួលមានសុវត្ថិភាព។ ជម្លៀសទៅរកទីទួលមានសុវត្ថិភាពក៏ព្រោះតែស្ថានភាពទឹកនៅក្នុងខេត្តទាំងនេះឈានដល់កម្រិតប្រកាសឲ្យពលរដ្ឋប្រុងប្រយ័ត្នហើយ។ តាមលោក កែវ វី ប្រឈមនឹងស្ថានភាពជំនន់ទឹកទន្លេមេគង្គបែបនេះ ប្រជាពលរដ្ឋរស់នៅតាមដងទន្លេមេគង្គ បានក្លាយជាទម្លាប់មួយរស់នៅជាមួយជំនន់ទន្លេ។ដូច្នេះពលរដ្ឋបានត្រៀមខ្លួនទប់ទល់ទុកជាមុនដូចជាស្បៀងនិងថ្នាំសង្កូវជាដើម។
គួរបញ្ជាក់ផងដែរថា គិតដល់ថ្ងៃទី ០១ ខែសីហា នេះ ទឹកទន្លេមេគង្គក្នុងខេត្តកំពង់ចាម បានបន្តកើនឡើងដល់កម្ពស់ ១៤,៨៩ ម៉ែត្រ ហើយ ខណៈកម្ពស់ប្រកាសឲ្យប្រុងប្រយ័ត្ន ១៥,២០ ម៉ែត្រ ។ ចំណែក ទឹកទន្លេមេគង្គក្នុងខេត្តស្ទឹងត្រែង កម្ពស់ប្រកាសឲ្យប្រុងប្រយ័ត្នត្រឹមតែ ១០,៧០ម៉ែត្រ។
ព្រមជាមួយគ្នានេះ ស្ថានភាពទឹកជំនន់នៅខេត្តស្ទឹងត្រែង ដែលមានការលិចលង់ខ្លាំងជាងគេ ត្រូវបានអ្នកនាំពាក្យសាលាខេត្តនេះ អះអាងថា មានពលរដ្ឋជាង៨០គ្រួសាររស់នៅក្រុងស្ទឹងត្រែងត្រូវបានជម្លៀសមករស់នៅកន្លែងទីទួលមានសុវត្ថិភាព។ ចំណែកពលរដ្ឋមួយចំនួនទៀតក្នុងចំណោមពលរដ្ឋជាង១ពាន់គ្រួសារដែលត្រូវបានជម្លៀសដោយសារការទំនប់វារីអគ្គិសនីនៅឡាវ ពួកគេក៏បានត្រឡប់ទៅរស់នៅលំនៅឋានដើម
វិញហើយដែរ ខណៈសាលារៀនមួយចំនួន នៅក្នុងខេត្តស្ទឹងត្រែងក៏ត្រូវបានបិទទ្វារបណ្ដោះអាសន្នដោយសារទឹកជំនន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ