ដល់វេនចៅហ្វាយក្រុងឡើងជ្រញ់នៅមុខគណៈកម្មការទី១នៃរដ្ឋសភាម្តង
បន្ទាប់ពីរដ្ឋមន្ត្រីរដ្ឋាភិបាលជាច្រើនរូបត្រូវបានគណៈកម្មការដឹកនាំដោយគណបក្សប្រឆាំងកោះហៅចូលបំភ្លឺជាបន្តបន្ទាប់នោះ នៅពេលនេះដល់វេនចៅហ្វាយក្រុងម្តង។ នោះគឺលោកប៉ា សុជាតិវង្ស អភិបាលរាជធានីភ្នំពេញនៅរសៀលថ្ងៃព្រហស្បតិ៍នេះបានចូលទៅបំភ្លឺរឿងជម្លោះដីធ្លីនៅមុខគណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា ដែលជាគណៈកម្មការទីមួយនៃរដ្ឋសភា។
ចុះផ្សាយនៅថ្ងៃ៖
ស្តាប់ - ០១:៥៥
រឿងជម្លោះដីធ្លីរ៉ាំរៃនៅតំបន់បឹងកក់ បុរីកីឡា និងថ្មគោលជាដើម គឺជាប្រធានបទដែលលោកអភិបាលរាជធានីភ្នំពេញត្រូវចូលឆ្លើយបំភ្លឺនៅពីមុខគណៈកម្មការទីមួយនៃរដ្ឋសភា។ នៅក្នុងជំនួបសួរឆ្លើយរយៈពេលបីម៉ោងនេះ ដំណោះស្រាយជាក់ស្តែងណាមួយមិនត្រូវបានរកឃើញនោះឡើយ។
លោកអេង ឆៃអៀង ប្រធានគណៈកម្មការទីមួយនៃរដ្ឋសភាបានថ្លែងប្រាប់អ្នកកាសែតថាក្រោយជំនួបនេះ គណៈកម្មការទីមួយរបស់លោកទទួលបានព័ត៌មានជាច្រើនពីសកម្មភាពរបស់អាជ្ញាធរក្រុងភ្នំពេញក្នុងការស្វែងរកដំណោះដីធ្លីទាំងនេះ។ ជាមួយគ្នានោះ ប្រធានគណៈកម្មការទីមួយរដ្ឋសភាបានសំណូមពរដល់លោកអភិបាលរាជធានីភ្នំពេញបីចំណុចក្នុងការដោះស្រាយបញ្ហាដីធ្លីរបស់ប្រជាពលរដ្ឋ។ ទីមួយ ស្នើឲ្យដោះស្រាយដោយការជជែកគ្នាកុំប្រើប្រាស់វិធានការរដ្ឋបាល ទីពីរស្នើពន្លឿនស្វែងរកដំណោះស្រាយ និងទីបីស្នើឲ្យសាលារាជធានីភ្នំពេញពិនិត្យលទ្ធភាពជួយឲ្យអ្នកជាប់កំពុងឃុំមានសេរីភាពឡើងវិញ។
ជាការឆ្លើយតប លោកប៉ា សុជាតិវង្ស បានលើកឡើងថា សាលារាជធានីភ្នំពេញបានដោះស្រាយ និងកំពុងធ្វើការដោះស្រាយបញ្ហាដីធ្លីទាំងអស់នេះហើយ។ បើតាមលោកអភិបាលក្រុងភ្នំពេញ ជម្លោះដីធ្លីនៅតំបន់បឹងកក់ និងបុរីកីឡានៅសេសសល់តែបន្តិចបន្តួចប៉ុណ្ណោះ។ ដោយឡែក ចំពោះរឿងអ្នកកំពុងជាប់ឃុំវិញនោះ លោកប៉ា សុជាតិវង្ស បានអះអាងថា នោះគឺជាការអនុវត្តច្បាប់របស់តុលាការ។
គួរបញ្ជាក់ថា នៅពេលលោកអភិបាលរាជធានីភ្នំពេញកំពុងឆ្លើយបំភ្លឺនៅក្នុងរដ្ឋសភានោះ នៅក្រៅរបងរដ្ឋសភាឯណោះវិញ អ្នកភូមិបឹងកក់ អតីតបឹងកក់ និង បុរីកីឡាជាច្រើននាក់បានមកប្រមូលផ្តុំគ្នាតវ៉ាសុំជួបលោកប៉ា សុជាតិវង្ស ដើម្បីស្នើឲ្យលោកពន្លឿនការដោះស្រាយឲ្យពួកគេ និង ដោះលែងអ្នកកំពុងជាប់ឃុំនៅក្នុងពន្ធនាគារព្រៃស។ ក៏ប៉ុន្តែលោកប៉ា សុជាតិវង្សបានបដិសេធជួបអ្នកតវ៉ាទាំងនោះ។ យ៉ាងណាក៏ដោយ លោកអេង ឆៃអៀង បានជួបជាមួយអ្នកតវ៉ាទាំងនោះ ដោយបានរៀបរាប់ប្រាប់ពួកគេអំពីលទ្ធផលនៃជំនួបជាមួយលោកអភិបាលក្រុងភ្នំពេញនៅថ្ងៃនេះ។ លោកអេង ឆៃអៀងបានបញ្ជាក់ថា គណៈកម្មការទីមួយនៃរដ្ឋសភានឹងបន្តតាមដានសកម្មភាពដោះស្រាយរបស់សាលារាជធានីភ្នំពេញជាមួយប្រជាពលរដ្ឋ ដោយមិនទុករឿងនេះចោលនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ