តុលាការកោះហៅប្រមុខបក្សប្រឆាំងចូលបំភ្លឺលើបណ្តឹងថ្មី តែលោកសម រង្ស៊ីថា “អត់ខ្វល់"
លោកសម រង្ស៊ី ប្រធានគណបក្សសង្រ្គោះជាតិដែលកំពុងតែនិរទេសខ្លួននៅក្រៅប្រទេស ត្រូវបានព្រះរាជអាជ្ញារងនៃសាលាដំបូងរាជធានីភ្នំពេញ បានចេញដីកាកោះអញ្ជើញឲ្យចូលខ្លួនមកបំភ្លឺពាក់ព័ន្ធបណ្តឹងរបស់លោក សោម សឿន រដ្ឋមន្ត្រីប្រតិភូអមនាយករដ្ឋមន្ត្រី ពីបទផ្សាយព័ត៌មាននៅលើទំព័រហ្វេសបុក។ យ៉ាងណាក៏ដោយ លោកសម រង្ស៊ី បានបញ្ជាក់ប្រាប់វិទ្យុបារាំងអន្តរជាតិពីក្រៅប្រទេសថា លោកមិនខ្វល់នឹងបណ្តឹងថ្មីនេះនោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
តាមរយៈដីកាកោះមួយរបស់សាលាដំបូងរាជធានីភ្នំពេញចុះថ្ងៃទី១០ មីនា និងទើបបានមកដល់ដៃសារព័ត៌មាននៅថ្ងៃទី១៧ មីនា ម្សិលមិញនេះ ព្រះរាជអាជ្ញារងនៃតុលាការក្រុងភ្នំពេញលោកសៀង សុខ បានតម្រូវឲ្យលោក សម រង្ស៊ី ចូលខ្លួនមកកាន់តុលាការនៅវេលាម៉ោង ៩ព្រឹក នាថ្ងៃទី២០ ខែមេសា ឆ្នាំ២០១៦ខាងមុខ។ ការកោះហៅនេះ គឺដើម្បីមកបំភ្លឺជុំវិញបណ្តឹងរបស់លោក សោម សឿន រដ្ឋមន្ត្រីប្រតិភូអមនាយករដ្ឋមន្ត្រី មកលើលោកសម រង្ស៊ី ប្រធានគណបក្សសង្រ្គោះជាតិ។ ក្រៅពីកោះហៅលោកសម រង្ស៊ី លោកព្រះរាជអាជ្ញារងក៏បានកោះហៅលោកសោម សឿន ដែលជាដើមបណ្តឹងចូលមកបំភ្លឺនៅថ្ងៃទី២៣ មីនា សប្តាហ៍ក្រោយនេះដែរ។
សូមបញ្ជាក់ថា លោកសោម សឿន បានប្តឹងលោកសម រង្ស៊ី ទៅកាន់តុលាការសាលាដំបូងរាជធានីភ្នំពេញ បន្ទាប់ពីប្រធានគណបក្សសង្គ្រោះជាតិកាលពីថ្ងៃទី៩ មីនាកន្លងទៅបានបង្ហោះអត្ថបទនៅលើទំព័រហ្វេសប៊ុកផ្ទាល់ខ្លួនស្តីអំពីចំនួនអ្នកចុច (Like) នៅលើទំព័រហ្វេសប៊ុកផ្លូវការរបស់លោកនាយករដ្ឋមន្ត្រីហ៊ុន សែន។ នៅក្នុងពាក្យបណ្តឹង លោកសោម សឿនបានបញ្ជាក់ថា អ្វីដែលលោកសម រង្ស៊ីបង្ហោះនោះ គឺមានខ្លឹមសារមួលបង្កាច់ ខុសពីការពិត។ ហើយការបង្ហោះនោះទៀតសោត គឺបានធ្វើឲ្យប៉ះពាល់ដល់កិត្តិយសរបស់លោកយ៉ាងធ្ងន់ធ្ងរ។ ដូច្នេះ លោកបានប្តឹងទាមទារឲ្យផ្តន្ទាទោសដល់លោក សម រង្ស៊ីទៅតាមផ្លូវច្បាប់ និងទារសំណងជំងឺចិត្តចំនួន២០លានរៀល។
មែនទែនទៅ សម្រាប់ប្រមុខគណបក្សប្រឆាំងកម្ពុជា ទាំងបណ្តឹង និងដីការបស់តុលាការក្រុងភ្នំពេញនេះមិនមែនជារឿងថ្មីអ្វីនោះទេ។ មិនមែនជារឿងថ្មី ក៏ព្រោះថា ដីការបៀបនេះ លោកសម រង្ស៊ី ធ្លាប់ទទួលបានចំនួនពីរដងរួចមកហើយពីតុលាការក្រុងភ្នំពេញ។ គឺទីមួយ ដីកោះហៅលោកឲ្យចូលមកបំភ្លឺលើបណ្តឹងបរិហារកេរិ៍្តលើលោកហេង សំរិន ប្រធានរដ្ឋសភាខ្មែរ និងទីពីរ តុលាការបានកោះហៅលោកមកបំភ្លឺពីរឿងសមគំនិតជាមួយលោកហុង សុខហួរនៅក្នុងសំណុំរឿងពាក់ព័ន្ធនឹងសន្ធិសញ្ញាព្រំដែនកម្ពុជា និងវៀតណាម។ នេះមិនគិតទាំងដីកាដែលតុលាការបានបង្គាប់ឲ្យចាប់ខ្លួនលោកសម រង្ស៊ី មកអនុវត្តទោសនៅក្នុងពន្ធនាគារតាមបណ្តឹងរបស់លោកហោ ណាំហុង រដ្ឋមន្រ្តីការបរទេសកម្ពុជាផង។
ចំពោះបណ្តឹង និងដីកាកោះហៅថ្មីនេះ លោកសម រង្ស៊ី ប្រធានគណបក្សសង្រ្គោះជាតិ បានថ្លែងបញ្ជាក់ប្រាប់វិទ្យុបារាំងអន្តរជាតិពីប្រទេសហ្វីលីពីនកាលពីថ្ងៃទី១៦ មីនា ថាលោកអត់ខ្វល់ទាល់តែសោះចំពោះរឿងនេះ។ បើតាមលោកសម រង្ស៊ី កុំថាឡើយនៅពេលនេះ មានបណ្តឹង៤មកលើរូបលោក ក៏ប៉ុន្តែបើទោះបីជាមានបណ្តឹងដល់ទៅ១០០ក៏ដោយ ក៏លោកអត់ខ្វល់នោះដែរ។ អត់ខ្វល់ ដោយសារតែប្រមុខគណបក្សប្រឆាំងកម្ពុជា បានចាត់បណ្តឹងទាំងនេះ ថាជារឿងលេងសើចរបស់តុលាការដែលស្ថិតនៅក្រោមឥទ្ធិពលរបស់រដ្ឋាភិបាល តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ