អង្គភាពប្រឆាំងអំពើពុករលួយចាប់ខ្លួនមេឃុំគណបក្ស សម រង្ស៊ី
មេឃុំដែលមានកូត្តាមកពីគណបក្ស សម រង្ស៊ី ត្រូវបានអង្គភាពប្រឆាំងអំពើពុករលួយ ដឹកនាំដោយលោក ឱម យ៉ិនទៀង ចាប់ខ្លួននៅព្រឹកថ្ងៃទី២៤ ខែមេសា។ ការចាប់ខ្លួននេះ ធ្វើឡើងដើម្បីសាកសួរពាក់ព័ន្ធនឹងលុយ៥០០ដុល្លារអាមេរិក ដែលឈ្មោះ ខុម ចាន់តារាទីឆ្លើយដាក់។ នេះបើតាមតំណាងរាស្ត្រគណបក្សសង្គ្រោះជាតិ លោក អេង ឆៃអ៊ាង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
លោក ស៊ាង ចែត មេឃុំស្រក ស្រុកកំពង់សៀម ខេត្តកំពង់ចាម ត្រូវបានចាប់ខ្លួននៅវេលាម៉ោង ១០ និង៣០នាទីព្រឹក យកមករាជធានីភ្នំពេញ ដើម្បីសាកសួរបន្ត។ នេះបើតាមហ្វេសប៊ុក របស់លោកអេង ឆៃអ៊ាងនៅព្រឹកនេះ។ ការចាប់ខ្លួនមេឃុំគណបក្សសម រង្ស៊ីនេះ បានធ្វើឡើងនៅសាលាស្រុកកំពង់សៀម។
ក្រោយពីការចាប់ខ្លួនមេឃុំ គណបក្សសង្គ្រោះជាតិក៏បានចេញសេចក្តីថ្លែងការណ៍មួយ ថ្កោលទោសយ៉ាងដាច់អហង្ការចំពោះការចាប់ខ្លួន លោក ស៊ាង ចែត។ តាមសេចក្តីថ្លែងការណ៍ ដដែលបានឲ្យដឹងថាការចាប់ខ្លួនមេឃុំស្រក ដោយគ្រាន់តែសំអាងលើការឆ្លើយដាក់ពីឈ្មោះ ខុម ចាន់តារានេះ គឺជាទង្វើខុសច្បាប់ ដែលមានចរិតដូចកាលរបបខ្មែរក្រហម។
សូមបញ្ជាក់ថាកាលពីថ្ងៃទី២២ ខែមេសា កញ្ញា ខុម ចាន់តារាទី ហៅស្រីមុំ តាមរយៈលិខិតចំហ៤ទំព័រចុះផ្សាយដោយសារព័ត៌មានក្នុងស្រុក បានឲ្យដឹងថា មេឃុំស្រក ឈ្មោះស៊ាង ចែត បានបង្គាប់ឲ្យឪពុកម្តាយរបស់នាងណែនាំដល់នាងមិនឲ្យនិយាយប៉ះពាល់ដល់លោកកឹម សុខា អនុប្រធានគណបក្សសង្គ្រោះជាតិ ដោយយកលុយចំនួន៥០០ដុល្លារអាមេរិកឲ្យម្តាយរបស់ស្រីមុំ។
គណបក្សសង្គ្រោះជាតិក៏បានស្នើឲ្យអាជ្ញាធរមានសមត្ថកិច្ចអនុវត្តតួនាទីភារកិច្ចរបស់ខ្លួនឲ្យបានត្រឹមត្រូវ ដោយផ្អែកលើមូលដ្ឋានច្បាប់ជាធរមាន ជៀសវាងការចាប់ពលរដ្ឋស្លូតត្រង់ ដោយគ្រាន់តែសំអាងលើការឆ្លើយដាក់ពីបុគ្គលណាមួយនោះ។ គណបក្សសង្គ្រោះជាតិក៏បានអំពាវនាវឲ្យមានការដោះលែងលោក ស៊ាង ចែត ជាបន្ទាន់ ដោយឥតលក្ខខណ្ឌ ដើម្បីបន្ធូរភាពតានតឹង ដែលកំពុងតែកើតឡើងនៅពេលនេះ។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានឲ្យវិទ្យុបារាំងអន្តរជាតិដឹងថា គណបក្សសង្គ្រោះជាតិនឹងរងចាំមើលស្ថានការណ៍តទៅទៀត ដោយពេលនេះលោកមិនអាចបញ្ជាក់បានថាធ្វើអ្វីបន្តនៅឡើយទេ។
នៅថ្ងៃទី២៤ ខែមេសា នេះវិទ្យុបារាំងអន្តរជាតិមិនអាចទាក់ទងអង្គភាពប្រឆាំងអំពើពុករលួយ ដើម្បីបំភ្លឺករណីចាប់ខ្លួនមេឃុំស្រកកូត្តាគណបក្សសមរង្ស៊ី បាននៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ