ចិនគោរពតាមច្បាប់ដែលកំណត់ដោយ WTO ស្តីពីការនំាចេញរ៉ែកម្រ
នៅថ្ងៃអង្គារ ទី១៣ មីនានេះ ប្រទេសចិន តាមរយៈក្រសួងការបរទេសបានបញ្ជាក់ថា ការដែលចិនបានកំណត់កូតាស្តីពីការនំាចេញរ៉ែកម្ររបស់ខ្លួន គឺអនុលោមតាមច្បាប់របស់អង្គការពាណិជ្ជកម្មពិភពលោក។ ប្រតិកម្មរបស់ចិនពេលនេះ គឺដើម្បីឆ្លើយតបទៅនឹងពាក្យបណ្តឹងរបស់សហរដ្ឋអាមេរិក ដែលបានប្តឹងចិនពីបទបានកំណត់ការនំាចេញរ៉ែកម្រ។
ចុះផ្សាយនៅថ្ងៃ៖
ស្តាប់ - ០២:០១
ការដែលចិនបានកំណត់កូតានៃការនំាចេញរ៉ែកម្ររបស់ខ្លួន គឺដើម្បីចូលរួមការពារបរិស្ថាន និងអនុញ្ញាតឲ្យមានការអភិវឌ្ឍន៍យូរអង្វែង នេះជាការបញ្ជាក់របស់លោក Liu Weimin អ្នកនំាពាក្យក្រសួងការបរទេសចិន។ លោក Liu Weimin ក៏បានបន្ថែមទៀតថា វិធានការរបស់ចិននេះក៏បានអនុលោមតាមច្បាប់របស់អង្គការពាណិជ្ជកម្មពិភពលោកដែរ។ ប្រតិកម្មរបស់ទីក្រុងប៉េកំាងពេលនេះបានធ្វើឡើង បន្ទាប់ពីសហរដ្ឋអាមេរិកត្រៀមប្តឹងចិនពីបទបានកំណត់ការនំាចេញរ៉ែកម្ររបស់ខ្លួន។ យោងតាមប្រភពមួយចេញមកពីវិមានប្រធានាធិបតីអាមេរិកដែលសុំមិនបញ្ចេញឈ្មោះឲ្យដឹងថា ទីក្រុងវ៉ាស៊ីនតោនត្រូវប្រកាសដាក់ពាក្យបណ្តឹងប្រឆំាងចិនក្នុងថ្ងៃនេះ ទៅអង្គការពាណិជ្ជកម្មពិភពលោក សហភាពអឺរ៉ុប និងប្រទេសជប៉ុន។
គួរបញ្ជាក់ជូនថា ចិន ជាប្រទេសទីមួយក្នុងលោកដែលសម្បូររ៉ែកម្រជាងគេ ពិសេស ប្រភេទលោហធាតុចំនួន ១៧មុខ។ គឺជាលោហធាតុដែលពិភពលោកត្រូវការចំាបាច់ណាស់ក្នុងការផលិត ផលិតផលបច្ចេកវិទ្យាខ្ពស់ ដោយរាប់ចាប់តំាងពីកំាជ្រួចមីស្ស៊ីល រហូតដល់ទូរស័ព្ទដៃ និងរថយន្តដើរដោយចរន្តអគ្គិសនី។ គឺឆន្ទៈរបស់ទីក្រុងប៉េកំាងដែលបានកំណត់ការនំាចេញរ៉ែកម្ររបស់ខ្លួននេះហើយ ដែលបានបង្កឲ្យមានការប្រឆំាងពីគ្រប់ប្រទេសលើលោក។ សូមជម្រាបជូនថា បរិមាណលោហធាតុចំាបាច់ដែលពិភពលោកប្រើប្រាស់សព្វថ្ងៃ មានជាង ៩០% បាននំាចេញពីប្រទេសចិន។ ចិនដែលមានធនធានរ៉ែកម្រនេះតែ ១ ភាគ ៤ប៉ុណ្ណោះនៃធនធានរ៉ែកម្រនៅលើពិភពលោក។
សម្រាប់ឆ្នំា ២០១២ ចិនបានកំណត់កូតានំាចេញរ៉ែកម្ររបស់ខ្លួនចំនួន ៣ម៉ឺនតោន ពោលគឺស្មើនឹងបរិមាណក្នុងឆ្នំា ២០១១។ តែតាមពិតទៅ បរិមាណនំាចេញពិតប្រាកដក្នុងឆ្នំា ២០១១ មានមិនដល់ពាក់កណ្តាលផង។ យ៉ាងណាក៏ដោយ អ្នកនំាពាក្យក្រសួងការបរទេសចិនបានអះអាងថា ចិននឹងបន្តផ្គត់ផ្គង់រ៉ែកម្រឲ្យទីផ្សារអន្តរជាតិ។ តែទន្ទឹមគ្នានេះ ទីក្រុងប៉េកំាងក៏បានបញ្ជាក់ថា ការកំណត់បរិមាណនំាចេញរ៉ែកម្ររបស់ខ្លួនគឺចំាបាច់ដើម្បីរក្សាទុកធនធានដែលពិភពលោកត្រូវការខ្លំាងណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ