ប្រតិកម្មជុំវិញកិច្ចព្រមព្រៀងស្តីពីសំណុំរឿងនុយក្លេអ៊ែរអ៊ីរ៉ង់
លោកប្រធានាធិបតីបារំាង François Hollande បានអញ្ជើញទៅបំពេញទស្សនកិច្ចផ្លូវរដ្ឋរយៈពេល ២៤ម៉ោងនៅក្នុងប្រទេសកាតារ ដោយចាប់ផ្តើមពីរសៀលថ្ងៃសៅរ៍ ទី២២ ដល់ថ្ងៃអាទិត្យ ទី២៣ មិថុនា។ គោលដៅនៃទស្សនកិច្ច គឺដើម្បីពង្រឹងបន្ថែមទៀតនូវទំនាក់ទំនងមិត្តភាព និងពាណិជ្ជកម្មរវាងទីក្រុងប៉ារីស និងទីក្រុងដូហា។ ទំនាក់ទំនងដែលលោកប្រមុខរដ្ឋបារំាងបានបញ្ជាក់ថា មានតំាងពីយូរលង់មកហើយ។
ចុះផ្សាយនៅថ្ងៃ៖
ស្តាប់ - ០២:០៩
សម្រាប់លោកប្រធានាធិបតីអាមេរិកអូបាម៉ា កិច្ចព្រមព្រៀងនេះ គឺជាការឈានមួយជំហានទៅមុខយ៉ាងសំខាន់ ពិសេស វាបានរារំាងផ្លូវអ៊ីរ៉ង់ឆ្ពោះទៅរកការបង្កើតអាវុធបរមាណូ។ ជាមួយគ្នានេះ និងប្រឈមមុខនឹងប្រតិកម្មក្តៅក្រហាយរបស់ប្រទេសអ៊ីស្រាអែលដែលជាសម្ព័ន្ធមិត្តចាក់ទឹកមិនលេចរបស់អាមេរិក លោកអូបាម៉ាក៏បានទូរស័ព្ទនិយាយធានាលោកនាយករដ្ឋមន្រ្តីអ៊ីស្រាអែល Benyamin Netanyahu អំពីកិច្ចព្រមព្រៀងដែលអាមេរិកបានចុះហត្ថលេខាជាមួយអ៊ីរ៉ង់នោះ។ តែយ៉ាងណាក៏ដោយ អ៊ីស្រាអែលហាក់ដូចជាពិបាកនឹងទទួលយក និងបានចាត់ទុកកិច្ចព្រមព្រៀងនោះថា ជាកំហុសប្រវត្តិសាស្រ្តមួយ ព្រោះវាបានផ្តល់ឲ្យអ៊ីរ៉ង់នូវអ្វីដែលអ៊ីរ៉ង់ចង់បាន។ ចំណែកលោករដ្ឋមន្រ្តីការបរទេសអ៊ីស្រាអែលវិញមិនញញើតនឹងបញ្ជាក់ថា ការប្រណំាងប្រជែងខាងសព្វាវុធបានចាប់ផ្តើមហើយ។
ប្រតិកម្មក៏មានដែរពីប្រទេសរុស្ស៊ី លោកប្រធានាធិបតីរុស្ស៊ីពូទីនក៏បានចាត់ទុកកិច្ចព្រមព្រៀងស្តីពីនុយក្លេអ៊ែរអ៊ីរ៉ង់ថា គ្រាន់តែជាជំហានទីមួយប៉ុណ្ណោះ ព្រោះផ្លូវដែលត្រូវដើរនៅវែងឆ្ងាយ និងលំបាក។ សម្រាប់លោកប្រធានាធិបតីបារំាង លោក François Hollande បានចាត់ទុកកិច្ចព្រមព្រៀងនោះថា ជាការបោះមួយជំហានទៅមុខឆ្ពោះទៅរកភាពប្រក្រតីឡើងវិញនៅក្នុងទំនាក់ទំនងជាមួយប្រទេសអ៊ីរ៉ង។ នៅប្រទេសអង់គ្លេស លោកប្រមុខការទូត William Hague បានចាត់ទុកអត្ថបទនៃកិច្ចព្រមព្រៀងថា ល្អសម្រាប់ទំាងអស់គ្នា និងថា នៅមានការងារជាច្រើនទៀតដែលត្រូវធ្វើដើម្បីស្វែងកិច្ចព្រមព្រៀងចុងបញ្ចប់មួយ។
ងាកទៅប្រទេសចិនឯណោះ ក្នុងនាមជាប្រទេសដែលត្រូវការប្រេងច្រើនជាងគេ ទីក្រុងប៉េកំាងបានយល់ឃើញថា កិច្ចព្រមព្រៀងស្តីពីនុយក្លេអ៊ែរអ៊ីរ៉ង់នឹងជួយរក្សាសន្តិភាព និងស្ថិរភាពនៅមជ្ឈិមបូព៌ា ព្រមទំាងជួយឲ្យមានការដោះដូរពាណិជ្ជកម្មជាមួយអ៊ីរ៉ង់ឡើងវិញ។
ចុងក្រោយ និងអ្នកដែលសប្បាយចិត្តជាងគេនោះ គឺអ៊ីរ៉ង់ខ្លួនឯងតែម្តង។ លោកប្រធានាធិបតីអ៊ីរ៉ង់ហាសសាន រ៉ូហានីបានអបអរសាទរ និងបានចាត់ទុកកិច្ចព្រមព្រៀងនោះថា ជាការទទួលស្គាល់សិទ្ធិរបស់អ៊ីរ៉ង់ក្នុងការចម្រើនធាតុអ៊ុយរ៉ាញ៉ូម។ រីឯលោកប្រមុខដឹកនំាសាសនាអ៊ីរ៉ង់អាលី ខាមេនីដែលមានឥទ្ធិពលខ្លំាងនៅអ៊ីរ៉ង់ក៏បានថ្លែងអបអរសាទរដែរ។ ជាមួយនឹងកិច្ចព្រមព្រៀងនេះ អ៊ីរ៉ង់សង្ឃឹមនឹងទទួលបានការកាត់បន្ថយទ័ណ្ឌកម្មសេដ្ឋកិច្ចពីសហគមន៍អន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ