កិច្ចពិភាក្សាសំណុំរឿងនុយក្លេអ៊ែរអ៊ីរ៉ង់ដំណាក់កាលចុងក្រោយ នៅហ្សឺណែវ នៅតែស្មុគស្មាញ
នៅថ្ងៃសៅរ៍នេះ រដ្ឋមន្ត្រីប្រទេសមហាអំណាច៥+១ ជួបគ្នាបន្តការពិភាក្សាសំណុំរឿងនុយក្លេអ៊ែរអ៊ីរ៉ង់ នៅក្រុងហ្សឺណែវ ប្រទេសស្វ៊ីស។ នេះជាការចរចាដំណាក់កាលចុងក្រោយ ក្នុងទិសដៅសំរេចបានកិច្ចព្រមព្រៀងមួយ ស្តីពីកម្មវិធីនុយក្លេអ៊ែរអ៊ីរ៉ង់។ កិច្ចចរចាថ្ងៃនេះ ហាក់នៅតែលំបាកស្មុគស្មាញ។ គិតចាប់ពីមានការចរចារឿងនុយក្លេអ៊ែរអ៊ីរ៉ង់ ១០ឆ្នាំ មកនេះ នៅមិនទាន់សំរេចចេញកិច្ចព្រមព្រៀងអ្វីនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៧
នៅថ្ងៃសៅរ៍នេះ រដ្ឋមន្ត្រីប្រទេសមហាអំណាច៥+១ បានបន្តការចរចាសំណុំរឿងនុយក្លេអ៊ែរអ៊ីរ៉ង់ នៅក្រុងហ្សឺណែវ ប្រទេសស្វ៊ីស។ នេះជាការចរចាដំណាក់កាលចុងក្រោយ ដើម្បីសំរេចបានកិច្ចព្រមព្រៀងជាដំណាក់កាលមួយ ស្តីពីកម្មវិធីនុយក្លេអ៊ែរអ៊ីរ៉ង់។ ថ្វីបើនៅព្រឹកមិញនេះ រុស្ស៊ីបានបង្ហាញពីសុទិដ្ឋិនិយមនៃការចរចា តែការចរចានេះប្រហែលជានៅតែពិបាកដដែល ព្រោះថា នៅថ្ងៃសៅរ៍នេះ អ៊ីរ៉ង់ប្រាប់ថា ខ្លួនជំទាស់រាល់សំណើហួសហេតុ ដែលនាំទៅដល់ការបិទសិទ្ធិរបស់ខ្លួន។
គួររំលឹកថា តាំងពីថ្ងៃពុធមក អ្នកការទូតប្រទេស៥+១ គឺអាមេរិក អង់គ្លេស បារាំង រុស្ស៊ី ចិន និងអាល្លឺម៉ង់ បានចរចារគ្នាពីកិច្ចព្រមព្រៀងសំណុំរឿងនុយក្លេអ៊ែរអ៊ីរ៉ង់ដំណាក់កាលពិសោធន៍៦ខែ ក្នុងទិសដៅបន្ធូរបន្ថយទណ្ឌកម្មមួយចំនួនដល់អ៊ីរ៉ង់។ ជាការផ្តោះប្តូរ អ៊ីរ៉ង់ត្រូវព្យួរចោលនូវការចម្រើនធាតុអ៊ុយរ៉ានីញ៉ូមរបស់ខ្លួន។ ប៉ុន្តែការចរចានៅថ្ងៃ៩វិច្ឆិកាកន្លងមក បានជួបបរាជ័យ ដោយសារតែបារាំងបានជំទាស់ នឹងដាក់លក្ខខណ្ឌកំណត់ខ្ពស់ដល់អ៊ីរ៉ង់ ដូចជាតម្រូវអោយអ៊ីរ៉ង់អនុញ្ញាតអោយគ្រប់ទីតាំងនុយក្លេអ៊ែរខ្លួនស្ថិតក្រោមការត្រួតពិនិត្យរបស់អន្តរជាតិ អោយអ៊ីរ៉ង់បំភ្លឺពីបញ្ហាស្តុកទុកធាតុអ៊ុយរ៉ាញ៉ូមមានកម្រិតធាតុអ៊ីសូតូប២០ភាគរយ រឺក៏បំភ្លឺពីម៉ាស៊ីនប្រតិករទឹកធ្ងន់នៅអារ៉ាក់ ដែលអាចអាចធ្វើធាតុភ្លុយតូនីញ៉ូម ក្នុងទិសដៅផលិតគ្រាប់បែកបរមាណូបាន។
ដោយឡែក កន្លងមក សារព័ត៌មានអ៊ីរ៉ង់នានា ធ្លាប់បានចុះផ្សាយថា ក្រុមប្រទេស៥+១ បានយល់ព្រមតាមការទាមទាររបស់អ៊ីរ៉ង់ ថាអ៊ីរ៉ង់មានសិទ្ធិចម្រើនធាតុអ៊ុយរ៉ានីញ៉ូមលើទឹកដីខ្លួន។ ប៉ុន្តែ លោកអារ៉ាក់ឈី អ្នកទទួលបន្ទុកចរចាភាគីអ៊ីរ៉ង់ មិនបានបដិសេធហើយក៏មិនបានបញ្ជាក់ថា តើព័ត៌មាននេះជាការពិតរឺយ៉ាងណានោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ