កូរ៉េខាងជើងកំណត់ថ្ងៃកាត់ទោសជនជាតិអាមេរិកនៅតុលាការ
Matthew Miller អ្នកទោសអាមេរិកម្នាក់ ក្នុងចំណោមអ្នកទោសបីនាក់នៅកូរ៉េខាងជើង នឹងត្រូវបញ្ជូនទៅឱ្យតុលាការកាត់ទោស នៅថ្ងៃអាទិត្យទី ១៤ កញ្ញា ឆ្នាំ២០១៤។ សេចក្តីជូនដំណឹង ផ្តល់ដោយភ្នាក់ងារសារព័ត៌មានផ្លូវការកូរ៉េខាងជើង KCNA ធ្លាក់មកតែប៉ុន្មានថ្ងៃក្រោយសេចក្តីអំពាវនាវរបស់ជនអាមេរិកទាំងបីរូប សុំជំនួយពីរដ្ឋាភិបាលអាមេរិក តាមរយៈបទសម្ភាសន៍ជាមួយទូរទស្សន៍CNN។
ចុះផ្សាយនៅថ្ងៃ៖
ស្តាប់ - ០១:៥១
មានអាយុ២៤ឆ្នាំ មានដើមកំណើតនិងរស់នៅរដ្ឋកាលីហ្វ័រញ៉ា Matthew Miller ត្រូវបានប៉ូលិសកូរ៉េខាងជើង ចាប់ខ្លួន នៅខែមេសា ពីបទបានហែកទិដ្ឋាការចោល ពេលបានចូលដល់ទឹកដីកូរ៉េខាងជើង និងបានសុំសិទ្ធិជ្រកកោនក្នុងប្រទេសកុម្មុយនិស្តមួយនេះ។ ប៉ុន្តែសារព័ត៌មានផ្លូវការកូរ៉េខាងជើង មិនបានបញ្ជាក់អំពីបទចោទប្រកាន់ ប្រឆាំងនឹងអ្នកទោសអាមេរិករូបនេះឡើយ។
កាលពីខែកក្កដា ព្យុងយ៉ាងបានគូសបញ្ជាក់ថាយុវជន Matthew Miller និង Jeffrey Fowle អ្នកទោសអាមេរិកម្នាក់ទៀត នឹងត្រូវបញ្ជូនទៅតុលាការកាត់ទោសពីបទមានសកម្មភាពមិនច្បាស់លាស់ តែមានលក្ខណៈជាសកម្មភាពស្អប់ខ្ពើមប្រឆាំងនឹងរបបកុម្មុយនិស្តកូរ៉េខាងជើង។
Jeffrey Fowle អាយុ៥៦ឆ្នាំ ចាប់ខ្លួនបាននៅខែឧសភា បន្ទាប់ពីបានភ្លេចសៀវភៅគុម្ពីគ្រិស្តសាសនា ក្នុងបង្គន់ ក្នុងក្រុងកំពង់ផែចុងជីន។ ចំណែកបេសកជន Kenneth Bae, ដែលជាប់ជាអ្នកទោសក្នុងប្រទេសកុម្មុយនិស្តមួយនេះ តាំងពីខែធ្នូ ឆ្នាំ២០១២មក ត្រូវទទួលទោសជាប់ពន្ធនាគារ១៥ឆ្នាំ ព្រោះមានទោសជាប់ចោទពីបទបានសាកល្បងចង់ផ្តួលរំលំរបបព្យុងយ៉ាង។
កូរ៉េខាងជើង ដែលជាប់ទណ្ឌកម្មយ៉ាងធ្ងន់ធ្ងរពីអង្គការសហប្រជាជាតិ ក្នុងសំណុំរឿងនុយក្លេអ៊ែរនិងមីស៊ីល តែងតែឆ្លៀតប្រើប្រាស់ជនជាតិអាមេរិកជាប់ទោសនៅក្នុងប្រទេសខ្លួន ដើម្បីទាក់ទាញថ្នាក់ដឹកនាំជាន់ខ្ពស់អាមេរិកឱ្យមកទស្សនាកូរ៉េខាងជើង ដែលគ្មានទំនាក់ទំនងការទូតជាមួយអាមេរិកសោះ។
អន្តរការីអាមេរិកពិសេស ទទួលបន្ទុកសិទ្ធិមនុស្ស លោក Robert King បានសាកល្បងធ្វើដំណើរទៅកូរ៉េខាងជើងពីដងដើម្បីដោះស្រាយបញ្ហាអ្នកទោសអាមេរិកបីនាក់នេះ ចំនួនពីរលើក ប៉ុន្តែត្រូវបានព្យុងយ៉ាងលុបចោលរាល់លើកនៅនាទីចុងក្រោយ។
កាលពីថ្ងៃទី ២ កញ្ញា ជនអាមេរិកទាំងបី បានអំពាវនាវសុំវ៉ាស៊ីនតោនឱ្យបញ្ជូនមនុស្សមកចរចារកសេរីភាពឱ្យពួកគេ។ ជាចម្លើយតប រដ្ឋាភិបាលអាមេរិកបានចេញសេចក្តីថ្លែងការណ៍បញ្ជាក់អំពីការខិតខំប្រឹងប្រែងយ៉ាងសកម្ម ជួយពលរដ្ឋឱ្យត្រលប់មកមាតុប្រទេសវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ