អាមេរិកព្រមានប្រើកម្លាំងយោធាប្រឆាំងនឹងកូរ៉េខាងជើង
នៅថ្ងៃសៅរ៍នេះ នៅចំពោះមុខពលទាហានអាមេរិកប្រចាំការក្នុងមូលដ្ឋានយ៉ុងសាន (កូរ៉េខាងត្បូង) លោកប្រធានាធិបតីអាមេរិក បានចាត់ទុក កូរ៉េខាងជើង ជាប្រទេសបាតសង្គម និងបានប្រកាសព្រមានកូរ៉េខាងជើងដែលចង់សាកល្បងនុយក្លេអ៊ែរជាលើកទីបួន ថានឹងអាមេរិកមិនរអានឹងប្រើអំណាចយោធាដ៏ខ្លាំងក្លារបស់ខ្លួនដើម្បីការពារកូរ៉េខាងត្បូង ប្រឆាំងទប់នឹងការគំរាមកំហែងឈ្លានពានរបស់បច្ចាមិត្រឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
កូរ៉េខាងជើងជារដ្ឋបាតសង្គម ដ៏ទន់ខ្សោយ ដែលប្រើកម្លាំងយោធាយាមទប់តាមព្រំប្រទល់ខ័ណ្ឌចែកជាមួយនឹងកូរ៉េខាងត្បូង និងជាមួយសេរីភាព។ សម្រាប់លោកប្រធានាធិបតីអាមេរិក ការគំរាមកំហែងរបស់ព្យុងយ៉ាងចង់សាកល្បងនុយក្លេអ៊ែរ គ្មានចំណេញអ្វីបន្តិចសោះ ក្រៅពីបានទទួលទណ្ឌកម្មថ្មី និងភាពឯកា។
ទណ្ឌកម្មថ្មីដែលអាចនឹងធ្ងន់ធ្ងរខ្លាំង ព្រោះថ្វីបើអាមេរិកមិនបើកម្លាំងជាមហាអំណាចយោធាបង្ខំដោយអ្នកផ្សេងធ្វើអ្វីមួយមែន ប៉ុន្តែអាមេរិកនឹងអាចជ្រើសរើសប្រើកម្លាំងយោធាដ៏មានមហិទ្ធិរិទ្ធិរបស់ខ្លួនប្រឆាំងនឹងកូរ៉េខាងជើង ដើម្បីការពារកូរ៉េខាងត្បូង និងការពារសេរីភាពនៃការរស់នៅរបស់ពិភពលោក។ នេះជាការអះអាងរបស់លោកអូបាម៉ា នៅចំពោះមុខកងពលអាមេរិកនៅយ៉ុងសាន។
សូមបញ្ជាក់ថា ទស្សនកិច្ចរបស់លោកប្រធានាធិបតីអាមេរិកនៅកូរ៉េខាងត្បូងនេះ ប្រព្រឹត្តទៅក្នុងបរិបទគំរាមកំហែងនុយក្លេអ៊ែរយ៉ាងខ្លាំងពីសំណាក់កូរ៉េខាងជើង។ នៅថ្ងៃនេះទៀត វិទ្យាស្ថានអន្តរជាតិផ្នែកវិទ្យាសាស្ត្រនិងសន្តិសុខអាមេរិក បានបញ្ជាក់បន្ថែមថាកូរ៉េខាងជើងអាចនឹងធ្វើការសាកល្បងនុយក្លេអ៊ែរជាលើកទីបួន នៅរវាងបីបួនថ្ងៃទៀតខាងមុខ។ រូបភាពសាតឺលីតថតបានថ្មីនៅថ្ងៃសុក្រម្សិលមិញបង្ហាញពី សកម្មភាពយ៉ាងប្រញឹកនៅមាត់ច្រកចូលរូងក្រោមដី នៃមជ្ឈមណ្ឌលនុយក្លេអ៊ែរ Punggye-ri។
ម្សិលមិញ ជាមួយលោកស្រីប្រធានាធិបតីកូរ៉េខាងត្បូង លោក អូបាម៉ា បានអំពាវនាវឱ្យចិនជាសម្ព័ន្ធមិត្តប្រើឥទ្ធិពលទៅបញ្ចុះបញ្ចូលកូរ៉េខាងជើងឱ្យបោះឆ្នោតចោលមហិច្ឆតានុយក្លេអ៊ែរ ដើម្បីបញ្ជៀសការប្រឈមមុខយោធា។ ប៉ុន្តែព្យុងយ៉ាងមិនបាន បោះបង់និស្ស័យជាអ្នកបង្កហេតុឡើយ នៅថ្ងៃនេះឱ្យពលរដ្ឋកូរ៉េខាងជើងត្រៀមធ្វើសង្គ្រាមជាមួយអាមេរិក ហើយកាលពីម្សិលមិញព្យុងយ៉ាងបានប្រកាសថាកំពុងឃុំឃាំងជនជាតិអាមេរិកម្នាក់ ចាប់ខ្លួនបានកាលពីថ្ងៃទី ១០មេសា ព្រោះមានអាកប្បកិរិយាកាចនៅចំពោះមុខភ្នាក់ងារអន្តោប្រវេសន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ