កូរ៉េខាងជើងបាញ់សាកមីស៊ីលរយៈចំងាយខ្លី ៣០ដើម ឆ្ពោះទៅសមុទ្រជប៉ុន
អាជ្ញាធរកូរ៉េខាងត្បូងបានប្រាប់ថា នៅព្រឹកថ្ងៃសៅរ៍នេះ កូរ៉េខាងជើងបានបាញ់សាកមីស៊ីលរយៈចំងាយខ្លី ចំនួន៣០ដើម សំដៅទៅសមុទ្រ។ ក្រុងព្យុងយ៉ាងទើបបានបាញ់សាកមីស៊ីល២៥ដើម កាលពីថ្ងៃអាទិត្យ១៦មីនា កន្លងទៅប៉ុណ្ណោះ។ ការសាកល្បងនេះ ធ្វើឡើងក្រោយមានការប្រកាសថា ប្រធានាធិបតីកូរ៉េខាងត្បូង នាយករដ្ឋមន្ត្រីជប៉ុន និងប្រធានាធិបតីអាមេរិក ត្រូវជួបគ្នានៅសប្តាហ៍ក្រោយ ដើម្បីពិភាក្សាពីបញ្ហានុយក្លេអ៊ែររបស់កូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
យោងតាមអគ្គសេនាធិការដ្ឋានកូរ៉េខាងត្បូង តាំងតែពីម៉ោង៤ទាបភ្លឺ ថ្ងៃសៅរ៍នេះ ក្រុងព្យុងយ៉ាង បានបាញ់សាកមីស៊ីលចំនួន៣០ដើម ជាមីស៊ីលបាញ់បានរយៈចំងាយខ្លី បាញ់ចេញពីឆ្នេរខាងកើតកូរ៉េខាងជើង សំដៅទៅសមុទ្រជប៉ុន។ មីស៊ីលទាំងនេះប្រហែលជាហោះបានចំងាយ៦០គីឡូម៉ែត្រ។ កូរ៉េខាងជើងទើបតែបានសាកបាញ់មីស៊ីល២៥ដើម កាលពីថ្ងៃអាទិត្យទី១៦មីនា សប្តាហ៍មុនប៉ុណ្ណោះ។
យោងតាមអ្នកជំនាញនានា ទង្វើរបស់ក្រុងព្យុងយ៉ាងប្រហែលជាគ្មានទិសដៅបង្កភាពតានតឹងនៅឧបទ្វីបកូរ៉េនោះទេ តែគឺដើម្បីបង្ហាញពីភាពក្រេវក្រោធរបស់ខ្លួនចំពោះសមយុទ្ធយោធា ដែលកូរ៉េខាងត្បូងកំពុងធ្វើជាមួយអាមេរិកនៅពេលនេះ។ សមយុទ្ធយោធាប្រចាំឆ្នាំនេះ បានចាប់ធ្វើតាំងពីថ្ងៃ២៥កុម្ភៈម្ល៉េះ ហើយត្រូវបន្តធ្វើរហូតដល់ថ្ងៃ៧មេសាខាងមុខ។ កូរ៉េខាងជើងតែងរិះគន់សមយុទ្ធយោធារួមរវាងអាមេរិកនិងកូរ៉េខាងត្បូង ថាជាការរៀបចំជើងព្រួលដើម្បីវាយលុកទឹកដីកូរ៉េខាងជើង។
កាលពីថ្ងៃចន្ទ ក្រសួងការពារជាតិកូរ៉េខាងត្បូងបានទាមទារអោយកូរ៉េខាងជើងបញ្ឈប់សកម្មភាពដែលអាចបង្កអោយមានភាពតានតឹងផ្នែកយោធាជាមួយប្រទេសជិតខាងខ្លួន និងបន្ថែមថា សកម្មភាពផ្គើនរបស់ក្រុងព្យុងយ៉ាងអាចបង្កគ្រោះថ្នាក់ដល់កប៉ាល់រឺក៏យន្តហោះនានា ដែលធ្វើដំណើរក្នុងតំបន់។ គួរបញ្ជាក់ដែរថា កាលពីដើមខែមីនានេះ ចិនបានសំដែងការព្រួយបារម្ភចំពោះទង្វើរបស់កូរ៉េខាងជើងដែលបានបាញ់មីស៊ីល១ដើម ទៅក្នុងច្រកដែនអាកាសរបស់យន្តហោះចិនមួយគ្រឿង។
ការបាញ់សាកមីស៊ីល៣០ដើមរបស់ក្រុងព្យុងយ៉ាង នៅថ្ងៃសៅរ៍នេះ ធ្វើឡើងក្រោយមានការប្រកាសថា នៅសប្តាហ៍ក្រោយនេះ ប្រធានាធិបតីកូរ៉េខាងត្បូង ប៉ាក់គុនហឺ នាយករដ្ឋមន្ត្រីជប៉ុន ស្ហ៊ីនសូ អាបេ និងប្រធានាធិបតីអាមេរិក បារ៉ាក់ អូបាម៉ា ត្រូវជួបពិភាក្សាគ្នាពីកម្មវិធីនុយក្លេអ៊ែររបស់កូរ៉េខាងជើង និងបញ្ហាទាក់ទងនឹងការមិនរីកសាយភាយនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ