កូរ៉េខាងត្បូងបានបញ្ជូនផ្កាយរណបដាក់ក្នុងតារាវិថីដោយជោគជ័យ
នៅថ្ងៃពុធ ទី៣០ មករានេះ កូរ៉េខាងត្បូងបានបញ្ជូនផ្កាយរណបរបស់ខ្លួនទៅដាក់នៅក្នុងតារាវិថីប្រកបដោយជោគជ័យ។ ជាជោគជ័យមួយដែលបានអនុញ្ញាតឲ្យកូរ៉េខាងត្បូងចូលជាសមាជិកនៃក្លិបមហាអំណាចអវកាសនៅអាស៊ី។ អ្វីជាការកត់សម្គាល់ ជោគជ័យរបស់កូរ៉េខាងត្បូងពេលនេះបានកើតមានឡើង ប៉ុន្មានសប្តាហ៍ក្រោយពីការបញ្ជូនផ្កាយរណបដោយជោគជ័យរបស់កូរ៉េខាងជើង។ តែជោគជ័យរបស់ទីក្រុងព្យុងយ៉ាងកាលណោះបានទទួលទ័ណ្ឌកម្មពីអង្គការសហប្រជាជាតិ។
ចុះផ្សាយនៅថ្ងៃ៖
ស្តាប់ - ០២:០០
គ្រាប់រ៉ូកែតដែលជាអ្នកនំាផ្កាយរណបទៅជាមួយមានទម្ងន់ ១៤០តោន និងសាងសង់ឡើងដោយរួមសហការណ៍គ្នារវាងក្រុមអ្នកវិទ្យាសាស្រ្តរុស្ស៊ី និងកូរ៉េខាងត្បូង។ គ្រាប់រ៉ូកែតនោះបានបាញ់ចេញពីមជ្ឈមណ្ឌលអវកាសណារ៉ូ ស្ថិតប៉ែកខាងត្បូងប្រទេស និងបានព្រលែងផ្កាយរណបទៅក្នុងតារាវិថី ក្រោយពីបានហោះតាមគន្លងផ្លូវរបស់ខ្លួនអស់រយៈពេល ៩នាទី។ យោងតាមរដ្ឋអំណាច ផ្កាយរណបនោះមានតួនាទីជាអ្នកប្រមែប្រមូលទិន្នន័យស្តីពីវិទ្យុសកម្មនៅទីអវកាស។ ជោគជ័យនៃការដាក់ផ្កាយរណបវិទ្យាសាស្រ្តទៅក្នុងតារាវិថីពេលនេះ ត្រូវបានលោករដ្ឋមន្រ្តីក្រសួងវិទ្យាសាស្រ្តចាត់ទុកថា ជាជោគជ័យរបស់ប្រជាពលរដ្ឋកូរ៉េខាងត្បូងទំាងអស់។ ចំណែកអ្នកឯកទេសម្នាក់បានកត់សម្គាល់ថា ជោគជ័យនេះបានជួយផ្តល់សន្ទុះបន្ថែមទៀតនូវកម្មវិធីអវកាសរបស់ប្រទេសកូរ៉េខាងត្បូង។
សូមជម្រាបជូនថា ការបាញ់បង្ហោះគ្រាប់រ៉ូកែតផ្ទុកផ្កាយរណបទៅមួយនេះធ្លាប់បានលើកពេលចំនួន ២លើករួមមកហើយ ម្តងក្នុងខែតុលា និងម្តងទៀតក្នុងខែវិច្ឆិកា ឆ្នំា ២០១២ ដោយសារបញ្ហាបច្ចេកទេស។ ម្យ៉ាងទៀត មុននឹងទទួលបានជោគជ័យនៅពេលនេះ កូរ៉េខាងត្បូងធ្លាប់បានទទួលបរាជ័យចំនួនពីរដងរួចមកហើយ។ ម្តងក្នុងឆ្នំា ២០០៩ ដោយសារតែគ្រាប់រ៉ូកែតបានទៅគោលដៅហើយ តែមិនអាចព្រលែងផ្កាយរណបដាក់ទៅក្នុងតារាវិថីបាន។ បន្ទាប់មកក្នុងឆ្នំា ២០១០ គឺការផ្ទុះគ្រាប់រ៉ូកែតនៅពេលកំពុងហោះតែម្តង។
គួររម្លឹកថា តាមពិតទៅ មហិច្ឆតាអវកាសរបស់កូរ៉េខាងត្បូងមានជាយូរយារណាស់មកហើយ តែទីក្រុងសេអ៊ូលរារែកក្នុងការចូលប្រឡូក ដោយមិនចង់ធ្វើឲ្យសម្ព័ន្ធមិត្តអាមេរិកទើសទាល់ចិត្តដែលថា ជាការប្រណំាងប្រជែងសព្វាវុធនៅក្នុងឧបទ្វីបកូរ៉េ។
អ្វីជាការកត់សម្គាល់ ជោគជ័យរបស់កូរ៉េខាងត្បូងពេលនេះបានកើតមានឡើង ប៉ុន្មានសប្តាហ៍ក្រោយពីការបញ្ជូនផ្កាយរណបដោយជោគជ័យរបស់កូរ៉េខាងជើង។ តែអ្វីដែលខុសគ្នារវាងជោគជ័យរបស់ទីក្រុងសេអ៊ូល និងព្យុងយ៉ាងនៅត្រង់ថា ទង្វើរបស់ព្យុងយ៉ាងបានទទួលទ័ណ្ឌកម្មពីអង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ