កូរ៉េខាងជើងព្រមានលុបចោលការរៀបចំជំនួបរវាងក្រុមគ្រួសារដែលព្រាត់ប្រាសគ្នានៅក្រោយសង្រ្គាម
កូរ៉េខាងជើងបាន និងកំពុងបន្តលេងល្បែងឆ្មាចាប់កណ្តុរជាមួយកូរ៉េខាងត្បូង។ ២៤ ម៉ោង ក្រោយពីបានយល់ព្រមឲ្យមានការរៀបចំជំនួបរវាងក្រុមគ្រួសារដែលបានព្រាត់ប្រាសគ្នានៅក្រោយសង្រ្គាមមក ស្រាប់តែនៅថ្ងៃព្រហស្បតិ៍ ទី៦ កុម្ភៈនេះ កូរ៉េខាងជើងបែរជាបានព្រមានលុបចោលគម្រោងរៀបចំជំនួបនោះវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
វាពិតជាដំណឹងមួយដែលមិនបានធ្វើឲ្យក្រុមគ្រួសារកូរ៉េសប្បាយចិត្តឡើយ ពិសេសក្រុមគ្រួសារដែលនឹងត្រូវអនុញ្ញាតឲ្យជួបសាច់ញាតិរបស់ខ្លួនជាលើកទីមួយតំាងពីក្រោយបញ្ចប់សង្រ្គាមជាង ៦០ឆ្នំាកន្លងទៅ។ សូមជម្រាបជូនថា នៅថ្ងៃពុធ ទី៥ កុម្ភៈ កូរ៉េខាងជើង និងកូរ៉េខាងត្បូងបានព្រមព្រៀងគ្នារៀបចំឲ្យមានជំនួបរវាងក្រុមគ្រួសារកូរ៉េដែលព្រាត់ប្រាសគ្នានៅក្រោយសង្រ្គាមរយៈពេល ៦ថ្ងៃ គឺពីថ្ងៃទី១៥ ដល់ថ្ងៃទី២០ ខែកុម្ភៈនេះនៅភ្នំគុំហ្កាំង Kumgang ក្នុងទឹកដីកូរ៉េខាងជើងជាប់ព្រំដែនជាមួយកូរ៉េខាងត្បូង។ តែនៅទីបំផុតថ្ងៃព្រហស្បតិ៍ ទី៦ កុម្ភៈនេះ របបក្រុងព្យុងយ៉ាងបានប្រកាសព្រមានលុបចោលគម្រោងរៀបចំជំនួបនោះវិញ។
ការព្រមានលុបចោលនេះត្រូវបានធ្វើឡើងតាមរយៈគណៈកម្មការការពារជាតិដែលជាស្ថាប័នយោធាជាន់ខ្ពស់របស់កូរ៉េខាងជើង។ ស្ថានប័នមួយនេះបានកត់សម្គាល់ឃើញថា វាគួរឲ្យសោកស្តាយដែលកូរ៉េខាងត្បូង និងអាមេរិកនៅតែចចេសបន្តធ្វើសមយុទ្ធរួមគ្នា ចំពេលដែលកូរ៉េទំាងពីរទើបបានសម្រេចនូវកិច្ចព្រមព្រៀងមួយក្នុងការផ្សះផ្សាជាតិ និងកិច្ចសហប្រតិបត្តិការរួមគ្នា។ ស្ថានប័នយោធាកូរ៉េខាងជើងដដែលបានយល់ឃើញថា គម្រោងសមយុទ្ធរវាងកូរ៉េខាងត្បូង និងអាមេរិកមិនមែនជាទង្វើឆ្លើយតបនឹងឆន្ទៈផ្សះផ្សារបស់កូរ៉េទេ។
ដោយឡែកនៅថ្ងៃនេះដែរ ក្រុងព្យុងយ៉ាងក៏បានចោទអាមេរិកពីបទបានបង្ហោះយន្តហោះប្រភេទ B៥២ ជាច្រើនគ្រឿងនៅឆ្នេរសមុទ្រប៉ែកខាងលិចឧបទ្វីបកូរ៉េកាលពីថ្ងៃម្សិលមិញ។ ទាហានអាមេរិកមិនបានបញ្ជាក់ព័ត៌មាននេះទេ តែប្រភពយោធាកូរ៉េខាងត្បូងឲ្យដឹងថា មានការហោះហើរប្រភេទយន្តហោះ B៥២ នោះមែន តែមានតែមួយគ្រឿងគត់ និងធ្វើឡើងនៅក្នុងក្របខ័ណ្ឌហ្វឹកហ្វឺន។
គួររម្លឹកជូនថា មកដល់ពេលនេះ កូរ៉េខាងជើងនៅតែបន្តទាមទារយ៉ាងទទូចឲ្យកូរ៉េខាត្បូងលុបចោលជាបន្ទាន់នូវសមយុទ្ធប្រចំាឆ្នំាដែលក្រុងសេអ៊ូលត្រៀមធ្វើជាមួយសម្ព័ន្ធមិត្តអាមេរិកនៅដំណាច់ខែកុម្ភៈនេះ។ សមយុទ្ធដែលក្រុងព្យុងយ៉ាងបានចាត់ទុកជាទង្វើត្រៀមរៀបចំជើងព្រួលក្នុងការវាយលុកចូលក្នុងទឹកដីកូរ៉េខាងជើង។ ក៏ប៉ុន្តែ ទំាងទីក្រុងសេអ៊ូល ក៏ដូចជាទីក្រុងវ៉ាស៊ីនតោនបានបញ្ជាក់ម្តងជាពីរដងថា ខ្លួនមិនទទួលយកលក្ខខណ្ឌដាក់ដោយទីក្រុងព្យុងយ៉ាងនោះបានទេ។ នៅថ្ងៃនេះទៀត ក្រសួងការពារជាតិកូរ៉េខាងត្បូងបានបញ្ជាក់ជាថ្មីថា សមយុទ្ធនឹងត្រូវរៀបចំធ្វើដូចការគ្រោងទុក និងព្រមានថា គេមិនគួរយកគម្រោងរៀបចំជំនួបរវាងក្រុមគ្រួសារកូរ៉េដែលព្រាត់ប្រាសគ្នានៅក្រោយសង្រ្គាមមកធ្វើជាចំណាប់ខ្មំាងដើម្បីកេងចំណេញខាងនយោបាយឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ