ការតស៊ូមតិរវាងលោក Mitt Romney និង លោក Barack Obama នឹងចាប់ផ្តើមនៅថ្ងៃពុធ ទី៣ តុលា
នៅថ្ងៃពុធ ទី៣ តុលា បេក្ខជនប្រធានាធិបតីអាមេរិកទំាងពីររូប គឺលោក Barack Obama មកពីគណបក្សប្រជាធិបតេយ្យ និងលោក Mitt Romney គណបក្សសាធារណរដ្ឋនឹងឡើងជជែកដេញដោលគ្នាតាមកញ្ជក់ទូរទស្សន៍នៅក្នុងទីក្រុង Denver នៃរដ្ឋ Colorado។ នេះជាការតស៊ូមតិលើកទីមួយក្នុងចំណោមការតស៊ូមតិទំាងអស់ចំនួន ៣លើក មុននឹងការបោះឆ្នោតឈានមកដល់នៅថ្ងៃទី ៦ វិច្ឆិកា។ កម្មវិធីនៃការតស៊ូមតិនេះពិតជាមានសារៈសំខាន់ណាស់សម្រាប់បេក្ខជនទំាងពីររូប ពិសេសគឺលោក Mitt Romney ដែលកំពុងបាត់បង់ប្រជាប្រិយភាពយ៉ាងខ្លំាង។
ចុះផ្សាយនៅថ្ងៃ៖
ស្តាប់ - ០២:០០
លទ្ធផលនៃការស្ទង់មតិចុងក្រោយឲ្យដឹងថា បេក្ខជន Mitt Romney មកពីគណបក្សសាធារណរដ្ឋកំពុងមានប្រជាប្រិយភាពធ្លាក់ចុះយ៉ាងខ្លំាង បើធៀបនឹងគូប្រជែងរបស់គាត់គឺលោក Barack Obama មកពីគណបក្សប្រជាធិបតេយ្យ។ ប្រជាប្រិយភាពរបស់លោក Mitt Romney បានធ្លាក់ចុះខ្លំាង បន្ទាប់ពីមានការផ្សព្វផ្សាយខ្សែអាត់វីដេអូមួយឈុតដែលបេក្ខជន គណបក្សសាធារណរដ្ឋរូបនេះបានវាយតម្លៃថា មានប្រជាពលរដ្ឋអាមេរិកំាងរហូតដល់ទៅ ៤៧% មិនបង់ពន្ធ និងរស់នៅដោយពឹងតែជំនួយពីរដ្ឋ។
តែនៅថ្ងៃអាទិត្យ ទី៣០ កញ្ញាម្សិលមិញ លោក Paul Ryan បេក្ខជនអនុប្រធានាធិបតីមកពីគណបក្សសាធារណរដ្ឋបានចេញមុខការពារលោក Mitt Romney។ អន្តរាគមន៍តាមកញ្ជក់ទូរទស្សន៍ Fox News លោក Paul Ryan បានទទួលស្គាល់នូវកំហុសឆ្គងមួយចំនួនដែលបង្កឡើងដោយគណបក្សសាធារណរដ្ឋ និងបានព្យាយាមបញ្ចូលប្រធានបទសេដ្ឋកិច្ចទៅក្នុងកម្មវិធីនៃការជជែកដេញដោលគ្នារវាងលោក Mitt Romney និងលោក Barack Obama នៅថ្ងៃពុធ ទី៣ តុលា។
យោងតាមលោក Paul Ryan គណបក្សសាធារណរដ្ឋពិតជាបានប្រព្រឹត្តនូវកំហុសឆ្គងមួយចំនួនមែន តែយ៉ាងណាក៏ដោយ គណបក្សសាធារណរដ្ឋមានមធ្យោបាយជាច្រើនដើម្បីបង្កើតការងារ និងផ្តល់សន្ទុះសេចដ្ឋកិច្ចឡើងវិញ។ ទន្ទឹមគ្នានេះ លោក Paul Ryan បានទុកឲ្យពលរដ្ឋអាមេរិកំាងជាអ្នកជ្រើសរើសដោយខ្លួនឯង រវាងបេក្ខជន Mitt Romney ដែលមានសមត្ថភាពក្នុងការជួយស្រោចស្រង់សេដ្ឋកិច្ចអាមេរិកំាងឡើងវិញ និងបេក្ខជន Barack Obama ដែលចង់បានអំណាច ៤ឆ្នំាបន្ថែមទៀត ដោយបន្តទុកឲ្យសេដ្ឋកិច្ចអាមេរិកំាងគំាងស្តូកមួយកន្លែងដូចសព្វថ្ងៃ។
ឃើញថា ៣ថ្ងៃ មុនថ្ងៃផ្តើមកម្មវិធីតស៊ូមតិរវាងបេក្ខជន Mitt Romney និងបេក្ខជន Barack Obama គណបក្សសាធារណរដ្ឋបាននិងកំពុងព្យាយាមស្រោចស្រង់ប្រជាប្រិយភាពលោក Mitt Romney ឡើងវិញ។ តែលោក Paul Ryan បានទទួលស្គាល់ថា លោក Romney ពិតជាមិនមានវោហារដូចលោក Obama ទេ ព្រោះថា លោក Obama ធ្លាប់បានឆ្លងកាត់វេទិកាតស៊ូមតិរបៀបនេះម្តងហើយ ចំណែកលោក Romney វិញ គឺជាលើកទីមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ