ភូមា៖ អ្នកស្រុករាប់ពាន់នាក់នាំគ្នាភៀសខ្លួនពីហិង្សា នៅរដ្ឋរ៉ាក់ឃីន
ហិង្សាលើប៉ុស្តិ៍ប៉ូលិស ច្រើនកន្លែង នៅរដ្ឋរ៉ាក់ឃីនភូមា សប្តាហ៍មុន បានបន្តធ្វើអោយប្រជាជនរដ្ឋរ៉ាក់ឃីនភ័យខ្លាច។ ថ្ងៃសុក្រនេះ ប្រជាជនរាប់ពាន់នាក់ នៅតាមក្រុង និងតាមភូមិ ក្នុងរដ្ឋរ៉ាក់ឃីន បាននាំគ្នាភៀសខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
ថ្ងៃសុក្រនេះ ប្រជាជនរាប់ពាន់នាក់ នៅតំបន់ដាច់ស្រយាលក្នុងរដ្ឋរ៉ាក់ឃីន បាននាំគ្នាភៀសខ្លួន ចេញពីក្រុង និងភូមិនានា។ មនុស្សជាង១០គ្រួសារបានគេចចេញពីក្រុងម៉ោងដាវ។ មនុស្ស១៨០នាក់ ក្នុងក្រុង មានគ្រូបង្រៀនច្រើននាក់ដែរ ត្រូវបានគេជម្លៀសតាមឧទ្ធម្ភាគចក្រ។
រដ្ឋរ៉ាក់ឃីនភាគខាងលិចភូមា សំបូរប្រជាជនភាគតិចរ៉ូហ៊ីងយ៉ា កាន់សាសនាអ៊ីស្លាមរស់នៅ។ តែក៏មានអ្នកកាន់ពុទ្ធសាសនាដែលបានភៀសខ្លួន ថ្ងៃសុក្រនេះដែរ។ ហិង្សាសប្តាហ៍មុន ទៅលើប៉ុស្តិ៍ប៉ូលិស ធ្វើអោយគេបារម្ភខ្លាចមានហិង្សាសហគមន៍ រវាងក្រុមអ្នកកាន់ពុទ្ធសាសនា និងជនជាតិរ៉ូហ៊ីងយ៉ាស កើតឡើង ដូចឆ្នាំ២០១២ម្តងទៀត។ កាលពីថ្ងៃព្រហស្បតិ៍ អ្នកសារព័ត៌មានAFP ឃើញផ្ទះច្រើនកន្លែងសល់តែកំទេចផេះ ដោយសាររងអគ្គិភ័យ។ ព្រឹកថ្ងៃសុក្រម្សិលមិញ សារព័ត៌មានផ្លូវការជាច្រើនបានចុះផ្សាយថា កងទ័ពបានវាយរុញច្រានក្រុមបង្កហិង្សា មានគ្នា៥០នាក់ ដែលបានវាយលុកអគារសន្តិសុខមួយខ្នង។
គួររំលឹកថា កាលពីថ្ងៃសៅរ៍-អាទិត្យ សប្តាហ៍មុន ប៉ុស្តិ៍ប៉ូលិសច្រើនកន្លែងនៅរដ្ឋរ៉ាក់ឃីន ជាប់ព្រំដែនបង់ក្លាដែស បានរងការវាយប្រហារពីក្រុមប្រដាប់អាវុធ ធ្វើអោយស្លាប់ប៉ូលិស៩នាក់។ កងកម្លាំងយោធាបានវាយបកទៅវិញ ធ្វើអោយស្លាប់ជនស៊ីវិល ២៦នាក់។ ទាហាន៤នាក់ក៏ស្លាប់ក្នុងប្រតិបត្តិការនេះដែរ។ មន្ត្រីភូមាមួយចំនួនបានចោទឆៅៗតែម្តងថា ហិង្សាលើប៉ុស្តិ៍ប៉ូលិស ជាស្នាដៃរបស់ជនជាតិរ៉ូហ៊ីងយ៉ា។
ថ្ងៃព្រហស្បតិ៍កន្លងទៅ កងទ័ពបានប្រកាសថា ចាប់ខ្លួនជនសង្ស័យទី៥ ពាក់ព័ន្ធការវាយប្រហារប៉ុស្តិ៍ប៉ូលិស។ ជនរូបនេះ មានអាវុធ និងគ្រាប់រំសេវ ព្រមទាំងទង់ជាតិបិទផ្លាកRSO ជាឈ្មោះចលនាមួយ របស់ជនជាតិរ៉ូហ៊ីងយ៉ា បង្កើតឡើងនៅឆ្នាំ ១៩៨០។ ប៉ុន្តែ ក្រុមRSOនេះ បានបដិសេធថា មិនបានបង្កហិង្សាលើប៉ុស្តិ៍ប៉ូលិសភូមាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ