កូរ៉េខាងជើង បាញ់មីស៊ីល ២គ្រាប់ថែមទៀត ក្រោយចាត់ទុកប្រមុខការទូតអាមេរិកថាជាសារធាតុពុល
ថ្ងៃសៅរ៍ ទី២៤សីហា កូរ៉េខាងជើង បាញ់មីស៊ីលរយៈចម្ងាយខ្លី ចំនួន២គ្រាប់បន្ថែមទៀត បន្ទាប់បានចាត់ទុក រដ្ឋមន្ត្រីការបរទេសអាមេរិក Mike Pompeo ថាជា«សារធាតុពុល»។ ការបាញ់មីស៊ីលបាឡេស្ទីក និងមីស៊ីលរយៈចម្ងាយខ្លី ជាច្រើនលើកមកនេះ គឺត្រូវ អាមេរិក និងសម្ព័ន្ធមិត្ត ជប៉ុន និងកូរ៉េខាងត្បួង ចាត់ទុកជាការគំរាមកំហែងយ៉ាងខ្លាំងដល់សន្តិសុខជាតិ។ ការបាញ់មីស៊ីលគំរាមរបស់កូរ៉េខាងជើងនេះ គឺចំពេលដែលសម្ព័ន្ធមិត្តទាំងពីររបស់អាមេរិក កំពុងមើលមុខគ្នាមិនចំ។
ចុះផ្សាយនៅថ្ងៃ៖
ស្តាប់ - ០២:០០
បើតាមប្រភពព័ត៌មានពីកូរ៉េខាងត្បូង, មីស៊ីលពីរគ្រាប់ថ្មីរបស់កូរ៉េខាងជើងនេះ បាញ់បានចម្ងាយ៣៨០គីឡូម៉ែត្រ មុននឹងធ្លាក់ចូលទៅក្នុងសមុទ្រជប៉ុន ឬសមុទ្រខាងកើត។ ការបាញ់មីស៊ីលនេះ គឺការគំរាមកំញើញជាថ្មីបន្ថែមទៀត ក្រោយពីថ្ងៃសុក្រម្សិលមិញ លោករដ្ឋមន្ត្រីការបរទេសកូរ៉េខាងជើង រី យ៉ុង ហូ បានព្រមានអាមេរិកថា កូរ៉េខាងជើង គឺនៅតែប្រទេសដែលអាចគំរាមអាមេរិក និងអាចនៅអាចបន្តគ្រោះភ័យដល់អាមេរិកយូរពេលតទៅទៀត។ ថែមពីនេះ ប្រមុខការទូតកូរ៉េខាងជើង វាយប្រហារផ្ទាល់មាត់ចំពោះប្រមុខការទូតអាមេរិក Mike Pompeo ថាជាសារធាតុពុល។
គួរបញ្ជាក់ថា ជាងពីរខែមកនេះ កូរ៉េខាងជើង បានបាញ់មីស៊ីល ជាច្រើនលើក និងជាបន្តបន្ទាប់ ដើម្បីគំរាមអាមេរិកនិងប្រទេសសម្ព័ន្ធអាមេរិក គឺជប៉ុននិងកូរ៉េខាងត្បូង។ នៅក្នុងនោះ កូរ៉េខាងជើង បានហាមអាមេរិកនិងកូរ៉េខាងត្បួង កុំឲ្យធ្វើសមយុទ្ធយោធាជាមួយគ្នា ក៏ប៉ុន្តែ អាមេរិកនិងកូរ៉េខាងត្បួង មិនព្រមស្តាប់ឡើយ។
កូរ៉េខាងត្បូង ដែលនៅកៀកនឹងគ្រោះថ្នាក់ជាងគេ បានសម្តែងក្តីព្រួយបារម្ភជាខ្លាំង និងបានកោះប្រជុំសមាជិកក្រុមប្រឹក្សាសន្តិសុខជាតិរបស់ខ្លួន ជាបន្ទាន់ ដើម្បីរកវិធីសាស្ត្រទប់ទល់ស្ថានការណ៍។
ចំណែកជប៉ុន វិញ តាមរយៈរដ្ឋមន្ត្រីក្រសួងការពារជាតិ បានបញ្ជាក់ថា ការបាញ់មីស៊ីលរបស់កូរ៉េខាងជើង ជារំលោភលើសេចក្តីសម្រេចរបស់អង្គការសហប្រជាជាតិ។ ហើយនិថាជប៉ុននឹងមិនព្រងើយកន្តើយឡើង ដោយជប៉ុននឹងត្រូវពិភាក្សាឲ្យស៊ីជម្រៅជាមួយដៃគូសម្ពន្ធមិត្តរបស់ខ្លួន គឺកូរ៉េខាងត្បូង។ ក៏ប៉ុន្តែ ចំណោទនៅត្រង់ថា កូរ៉េខាងត្បូង និងជប៉ុន សម្ព័ន្ធមិត្តទាំងពីររបស់អាមេរិក កំពុងតែឈ្លោះគ្នាមិនចេះស្វាង ច្រើនសប្តាហ៍មកហើយ ហើយក្នុងសប្តាហ៍នេះ កូរ៉េខាងត្បូង បានប្រកាសលុបចោលកិច្ចព្រមព្រៀងដោះដូរព័ត៌មានសម្ងាត់ផ្នែកយោធា ជាមួយជប៉ុនបាត់ទៅហើយ។ កូរ៉េខាងត្បូង ថាមិនចង់និយាយរឿងនេះត្រង់ជាមួយជប៉ុនទេ បើជប៉ុនចង់បានព័ត៌មានសម្ងាត់ផ្នែកយោធានេះ ទាល់តែជប៉ុនទៅសួរអាមេរិកចុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ