រញ្ជួយដីកម្រិត៧,៣រីស្ទែរ នៅឥណ្ឌូណេស៊ី ខណៈអ្នកជំនាញព្រមានពីរលកយក្សស៊ូណាមី
គ្រោះរញ្ជួយដីកម្រិត៧,៣រីស្ទែរ បានវាយប្រហារកោះ Maluku ភាគខាងកើតប្រទេសឥណ្ឌូណេស៊ី នៅថ្ងៃសៅរ៍នេះ។ គ្រោះរញ្ជួយដីប្រកបដោយអានុភាពខ្លាំងក្លានេះ បានធ្វើឲ្យអ្នកជំនាញព្រមានពីលទ្ធភាពនៃការកកើតរលកយក្សស៊ូណាមីនៅក្នុងរយៈចម្ងាយ៣០០គីឡូម៉ែត្រ ដែលធ្វើឲ្យមនុស្សម្នាភ័យខ្លាច និងជម្លៀសខ្លួនចេញពីផ្ទះសម្បែងរបស់ពួកគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ពុំមានសេចក្ដីរាយការណ៍បន្ទាន់ណាមួយ ស្ដីពីការស្លាប់ របួស និងការខូចខាតឡើយ បន្ទាប់ពីគ្រោះរញ្ជួយដីដ៏ធំមួយ បានកើតឡើងនៅជម្រៅ៤៦គីឡូម៉ែត្រពីដី នៅទីប្រជុំជន Kota Ternate ក្នុងប្រជុំកោះ Maluku។ នេះបើតាមការឲ្យដឹងពីស្ថាប័នវាស់ស្ទង់ភូមិសាស្ត្រអាមេរិក។
ភ្លាមៗក្រោយពីគ្រោះរញ្ជួយដីនោះ មជ្ឈមណ្ឌលព្រមានពីរលកយក្សស៊ូណាមិនៅតំបន់ប៉ាស៊ីហ្វិក បានលើកឡើងថា រលករយក្សស៊ូណាមីអាចនឹងកើតមានឡើងនៅតាមឆ្នេរសមុទ្រដែលមានចម្ងាយប្រមាណ៣០០គីឡូម៉ែត្រពីកន្លែងរញ្ជួយដី។ និងថា ប្រសិនបើកើតឡើងមែននោះ រលកយក្សនេះ នឹងអាចប៉ះពាល់ដល់ផ្នែកខ្លះនៃប្រទេសឥណ្ឌូណេស៊ី ហ្វីលីពីន ជប៉ុន កោះតៃវ៉ាន់ និងកោះមួយចំនួនទៀតនៅភាគខាងត្បូងមហាសមុទ្រប៉ាស៊ីហ្វិក។
រលកស៊ូណាមិដែលមានកំពស់ប្រមាណ៣០សង់ទីម៉ែត្រ ទៅ១ម៉ែត្រ អាចកើតឡើងនៅតាមតំបន់ឆ្នេរមួយចំនួនរបស់ឥណ្ឌូណេស៊ី ខណៈរលកដែលមានកំពស់ទាបជាង៣០សង់ទីម៉ែត្រ ត្រូវបានគេព្រមានថា អាចនឹងកើតឡើងនៅតាមតំបន់ឆ្នេរនៃប្រទេសហ្វីលីពីន។
មន្ដ្រីទីភ្នាក់ងារឧតុនិយមរបស់ឥណ្ឌូណេស៊ីម្នាក់ ប្រាប់ទីភ្នាក់ងារព័ត៌មានបារាំង AFP ថា ខ្លួនបានចេញផ្សាយការព្រមានពីរលកយក្សស៊ូណាមី រួចហើយ។ ហើយប្រជាជនដែលរស់នៅភាគខាងជើងកោះ Maluku និងភាគខាងជើងកោះ Sulawesi តម្រូវឲ្យនៅឆ្ងាយពីតំបន់ឆ្នេរសមុទ្រ រហូតទាល់តែការព្រមានពីលទ្ធភាពនៃរលកយក្សស៊ូណាមីត្រូវបានគេដកចេញ។
គួរជម្រាបជូនថា ប្រទេសឥណ្ឌូណេស៊ី ស្ថិតនៅលើខ្សែក្រវ៉ាត់ភ្លើងនៃតំបន់ប៉ាស៊ីហ្វិក។ ជាកន្លែងដែលស្រទាប់ផែនដីជួបគ្នា បង្កឲ្យមានគ្រោះរញ្ជួយដី និងបន្ទុះភ្នំភ្លើងជាញឹកញាប់។
គ្រោះរញ្ជួយដីនៅក្រោមបាតសមុទ្រនៅឆ្នាំ២០០៤កន្លងទៅ បង្កឲ្យមានរលកយក្សស៊ូណាមីដែលបានសម្លាប់មនុស្សច្រើនជាង១សែន៧ម៉ឺននាក់ នៅភាគខាងលិចកោះស៊ូម៉ាត្រា និងរាប់ម៉ឺននាក់ទៀតនៅបណ្ដាប្រទេសដែលស្ថិតតាមបណ្ដោយឆ្នេរនៃមហាសមុទ្រឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ