អាមេរិក ៖ ការទម្លាក់អតីតប្រធានាធិបតីអេហ្ស៊ីប ជាការស្តារលទ្ធិប្រជាធិបតេយ្យ
ប្រទេសអេហ្ស៊ីបកំពុងប្រឈមនឹងគ្រោះថ្នាក់ថ្មី នៅថ្ងៃសុក្រនេះ ! ក្រុមអ្នកគាំទ្រលោក មរស៊ី អតីតប្រធានាធិបតីជាប់ឆ្នោតលើកដំបូង បន្តជំនះដាច់ខាតធ្វើបាតុកម្មទៀត ទោះបីជាក្រសួងមហាផ្ទៃបានព្រមាន ជាថ្មីម្តងទៀតឱ្យក្រុមសកម្មជនអ៊ីស្លាមជ្រុលនិយម បំបែកហ្វូងពីទីលានកាន់កាប់ធ្វើបាតុកម្ម មុននឹងអាជ្ញាធរគាស់រំលើង។ ជាអំពាវនាវខ្យល់មែន ប៉ុន្តែក្រុមយោធាកំពុងបានទទួលការគាំទ្រពីអាមេរិក ព្រោះបានចាត់ទុកការទម្លាក់លោកមរស៊ី ថាជាស្តារលទ្ធិប្រជាធិបតេយ្យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
សេចក្តីថ្លែងការណ៍ព័ត៌មានរបស់លោកប្រមុខការទូតអាមេរិក កំពុងបង្កើនសម្ពាធមួយកំរិតបន្ថែមទៀត នៅកន្លែងប្រមូលផ្តុំធ្វើបាតុកម្មរបស់ក្រុមអ៊ីស្លាមជ្រុលនិយម Frère Musulman អ្នកគាំទ្រលោកអតីតប្រធានាធិបតី។
តាំងពីថ្ងៃទី ៣កក្កដាមក ថ្ងៃដែលក្រុមយោធាឃាត់លោកមរស៊ី ស្របតាមសម្រែករបស់បាតុករអេហ្ស៊ីបរាប់លាននាក់ បន្ទោសរដ្ឋាភិបាលអ៊ីស្លាមជ្រុលនិយមរបស់លោកមរស៊ីអសមត្ថភាព និងបំផ្លាញសេដ្ឋកិច្ចជាតិ ក្រុងវ៉ាស៊ីនតោន ដែលផ្តល់ថវិកាដល់អេហ្ស៊ីប ក្នុងមួយឆ្នាំ ប្រមាណ ១៣០០លានដុល្លារ តែងរក្សាសិទ្ធិ មិនប្រើពាក្យថា “រដ្ឋប្រហារ” នៅក្នុងអន្តរាគមន៍យោធានេះទេ។ ប៉ុន្តែម្សិលមិញ អាមេរិកបានប្តូរជំហរ !សម្រាប់លោកប្រមុខការទូត ក្រុមយោធាដែលបានរួមកម្លាំងជួយរុញច្រានលោកមរស៊ី ប្រធានាធិបតីជាប់ឆ្នោតលើកដំបូងរបស់អេហ្ស៊ីប ឱ្យខ្ទាតចេញពីតំណែង គឺជាការស្តារលទ្ធិប្រជាធិបតេយ្យ។
នេះអាចចាត់ទុកថាជារបត់ថ្មី ដ៏សំខាន់មួយរបស់រដ្ឋាភិបាលបណ្តោះអាសន្ន ប៉ុន្តែតើអំពើហិង្សាបង្ហូរឈាមអាចនឹងត្រូវបញ្ជៀសបានដែរឬទេ ? បើម្ខាងមិនព្រមប្រគល់អំណាចឱ្យលោកមរស៊ីវិញ ហើយម្ខាងទៀតមិនព្រមរំសាយការកាន់កាប់។ អាជ្ញាធរកាន់តែគំរាម ក្រុមបាតុករកាន់តែផ្គើន នោះ ?!
ប្រសាសន៍របស់ប្រមុខការទូតអាមេរិក បានត្រឹមតែធ្វើឱ្យក្រុមអ៊ីស្លាមជ្រុលនិយម ខឹងសម្បារ និងរិះគន់ ព្រមទាំងរាលដាលចោទប្រកាន់សហគមន៍អន្តរជាតិ ថាបានដាក់សម្ពាធមកលើតែក្រុមអ្នកប្រឆាំងនឹងរដ្ឋប្រហារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ