បន្ទាប់ពីកាត់បន្ថយការចំណាយ អឺរ៉ុបចង់ងាកមកផ្តោតលើការជំរុញកំណើនសេដ្ឋកិច្ចវិញ
មេដឹកនាំសហភាពអឺរ៉ុបនឹងជួបប្រជុំគ្នា នៅរសៀលថ្ងៃចន្ទនេះ នៅទីក្រុងព្រុចសែល ប្រទេសប៊ែលហ្ស៊ិក។ នៅក្នុងជំនួបកំពូលនេះ អឺរ៉ុបចង់ងាកមកផ្តោតលើយុទ្ធសាស្រ្ត ដើម្បីជំរុញកំណើនសេដ្ឋកិច្ចវិញ ក្រោយពីបានចំណាយពេលមួយឆ្នាំកន្លងទៅ តែទៅលើការកាត់បន្ថយឧនភាពថវិកាជាតិ។
ចុះផ្សាយនៅថ្ងៃ៖
ស្តាប់ - ០២:០៤
ពេញមួយឆ្នាំ២០១១កន្លងទៅ ដោយប្រឈមមុខនឹងវិបត្តិប្រាក់បំណុល ប្រទេសក្នុងសហភាពអឺរ៉ុបបាននាំគ្នាគិតតែពីរឿងកាត់បន្ថយការចំណាយរបស់រដ្ឋ ដើម្បីកាត់បន្ថយបំណុល។ ក៏ប៉ុន្តែ អ្នកសេដ្ឋកិច្ចជាច្រើន រួមទាំង មូលនិធិរូបិយវត្ថុអន្តរជាតិផង បាននាំគ្នាសម្តែងនូវការព្រួយបារម្ភថា ការផ្តោតទៅលើការកាត់បន្ថយការចំណាយខ្លាំងពេក វានឹងធ្វើឲ្យប៉ះពាល់ដល់កំណើនសេដ្ឋកិច្ច។
ការព្យាករជាច្រើនបង្ហាញថា នៅក្នុងឆ្នាំ២០១២នេះ សហភាពអឺរ៉ុបនឹងត្រូវប្រឈមមុខនឹងបញ្ហាកំណើនសេដ្ឋកិច្ច។ បើគិតជាមធ្យម ប្រទេសនៅក្នុងតំបន់ចាយលុយអឺរ៉ូ (១៧ប្រទេស) មានកំណើនសេដ្ឋកិច្ចត្រឹមតែ ០,៥% ប៉ុណ្ណោះ នៅឆ្នាំ២០១២នេះ។ ចំណែកឯងអត្រាអ្នកអត់ការងារធ្វើវិញ អាចនឹងមានរហូតដល់ទៅជាង ១០%។ នៅក្នុងសហភាពអឺរ៉ុបទាំងមូល អ្នកអត់ការងារធ្វើ នៅពេលបច្ចុប្បន្ននេះ មានរហូតដល់ទៅជាង ២៣លាននាក់។
ដោយបារម្ភអំពីបញ្ហានេះ មេដឹកនាំសហភាពអឺរ៉ុបចង់នាំគ្នាងាកមកគិតគូររកមធ្យោបាយជំរុញកំណើនសេដ្ឋកិច្ច និងកាត់បន្ថយអត្រាអ្នកអត់ការងារធ្វើវិញម្តង នៅឆ្នាំ២០១២នេះ។ នេះគឺជាប្រធានបទដ៏ចម្បងមួយ នៅក្នុងជំនួបកំពូល នៅថ្ងៃចន្ទនេះ។
ក្នុងពេលជាមួយគ្នា សំណុំរឿងជុំវិញសន្ធិសញ្ញាថ្មី ស្តីពីវិធានសារពើពន្ធអឺរ៉ុប និងការបង្កើតមូលនិធិអចិន្រ្តៃយ៍ ដើម្បីទុកជួយប្រទេសជាសមាជិក ក៏នឹងជាប្រធានបទដ៏សំខាន់ដែរ ក្នុងជំនួបកំពូលនេះ។ ក៏ប៉ុន្តែ បញ្ហាក្រិកអាចនឹងក្លាយជាសំណុំរឿងក្តៅ លុបលើប្រធានបទផ្សេងៗទៀត។
ក្រិកកំពុងត្រូវការលុយជាបន្ទាន់ យ៉ាងតិច ១៤ពាន់ ៥រយលានអឺរ៉ូ ដើម្បីសងបំណុលគេ នៅពាក់កណ្តាលខែមីនាខាងមុខ។ ចំណែកកញ្ចប់ថវិកាចំនួន ១៣០ពាន់លានអឺរ៉ូ ដែលអឺរ៉ុបបានព្រមព្រៀងគ្នាថានឹងយកមកជួយក្រិក នៅមិនទាន់បានបញ្ចេញទៅឲ្យរដ្ឋាភិបាលក្រិកនៅឡើយទេ នៅពេលនេះ។
អាល្លឺម៉ង់បានទាមទារឲ្យក្រិកប្រគល់អំណាចចាត់ចែងថវិកាជាតិទៅឲ្យគណៈកម្មការអឺរ៉ុបជាអ្នកគ្រប់គ្រងវិញ ដើម្បីជាថ្នូរនឹងការផ្តល់ជំនួយ។ ក៏ប៉ុន្តែ រដ្ឋាភិបាលក្រិកបានបដិសេធយ៉ាងដាច់អហង្ការនឹងសំណើនេះ ក្នុងហេតុផលថា ការចាត់ចែងថវិកាជាតិ គឺជាអធិបតេយ្យរបស់ប្រទេសក្រិក ដែលមិនអាចប្រគល់ទៅឲ្យអ្នកផ្សេងគ្រប់គ្រងបានទេ។ ការចរចារវាងក្រិក និងអឺរ៉ុបនឹងត្រូវបន្តធ្វើ នៅក្នុងជំនួបកំពូល នៅថ្ងៃចន្ទនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ