បារាំង៖ ជនជីហាដអ៊ីស្លាមម្នាក់ ឆ្មក់សំលាប់មន្ត្រីនគរបាលបារាំងពីរនាក់ប្តីប្រពន្ធ
មិនប៉ុន្មានថ្ងៃប៉ុណ្ណោះ បន្ទាប់ពីមានភេរវកម្មបាញ់រះ នៅក្រុងអ័រឡង់ដូ រដ្ឋហ្វ្លរីដា សហរដ្ឋអាមេរិក អំពើឃាតកម្មដ៏សាហាវមួយទៀត បានកើតឡើងនៅ ក្បែរក្រុងប៉ារីសប្រទេសបារាំង កាលពីយប់ថ្ងៃចន្ទម្សិលមិញ ដោយមន្ត្រីនគរបាលពីរនាក់ប្តីប្រពន្ធ ត្រូវបានជនជីហាដអ៊ីស្លាមម្នាក់ ចាក់សម្លាប់នឹងកាំបិត យ៉ាងសាហាវ។ ក្រសួងមហាផ្ទៃបារាំង បានបើកការស៊ើបអង្កេត និងបានប្រកាសចាត់ទុកឃាតកម្មនេះ ជាអំពើភេរវកម្ម ដែលរៀបចំនិងបញ្ជាដោយក្រុមជីហាដអង្គការរដ្ឋអ៊ីស្លាម។ នេះជាភេរវកម្មទ្រង់ទ្រាយថ្មីមួយទៀត បន្ទាប់ពីភេរវកម្មនៅកណ្តាលក្រុងប៉ារីស ពីរផ្ទួនៗកាលពីឆ្នាំ២០១៥ ហើយក៏បានកើតឡើង ស្របពេលដែលគេកំពុងព្រួយបារម្ភពីបញ្ហាសន្តិសុខ ក្នុងពេលប្រកួតបាល់ទាត់អឺរ៉ូ នៅប្រទេសបារាំង ផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៣៩
ប្តីប្រពន្ធជាមន្ត្រីនគរបាល ក្លាយជាជនរងគ្រោះនៃអំពើភេរវកម្ម៖
ហេតុការណ៏បានកើតឡើងនៅវេលាម៉ោងប្រហែលជា៩យប់ កាលពីថ្ងៃចន្ទទី១៣ មិថុនា នៅសង្កាត់Magnanville ភាគពាយព័្យក្រុងប៉ារីស។ បើតាមការឲ្យដឹងពីរដ្ឋអាជ្ញាបារាំង ដែលទទួលបន្ទុកស៊ើបអង្កេតលើសំណុំរឿងនេះ បានឲ្យដឹងថា ជនដៃដល់ បានលួចឆ្មក់សំលាប់ បុរសម្នាក់ដោយចាក់នឹងកំាំបិត ចំនួន៩កាំបិត នៅខាងមុខផ្ទះជនរងគ្រោះតែម្តង។ ជនរងគ្រោះ មានអាយុ៤២ឆ្នាំ ដែលមានតំណែងជាមេបញ្ជាការនគរបាល។ យោងតាមសាក្សី ជនរងគ្រោះដែលរងរបួសនឹងកាំបិត បានព្យាយាមស្រែកហៅឲ្យអ្នកជិតខាងជួយ មុននឹងដាច់ខ្យល់ស្លាប់។ បន្ទាប់មកអ្នកជិតខាង បានទូរស័ព្ទហៅនគរបាល ទើបនគរបាលបានមកព័ទ្ធទីកន្លែងកើតហេតុ។
ក្រោយមកជនដៃដល់ បានចូលទៅសំងំលាក់ខ្លួន នៅក្នុងផ្ទះជនរងគ្រោះ ដោយចាប់ប្រពន្ធនឹងកូនជនរងគ្រោះ ជាចំណាប់ខ្មាំង។ ក្រុមនគរបាលបារាំង បានព្យាយាមចរចាជាមួយជនដៃដល់រហូតដល់ម៉ោងប្រមាណជា១២យប់ ទើបសម្រេចចិត្តធ្វើការសម្រុកចូល នឹងបានបាញ់សម្លាប់ជនដៃដល់នៅនឹងកន្លែង។ ពេលដែលចូលទៅដល់ខាងក្នុងផ្ទះ ទើបនគរបាលបានឃើញសាកសពភរិយារបស់ជនរងគ្រោះ អាយុ៣៦ឆ្នាំ ហើយក៏ជាមន្ត្រីរដ្ឋបាលនៅស្នងការនគរបាលផងដែរ។ ជាសំណាងល្អ ក្មេងប្រុសអាយុ៣ឆ្នាំ ដែលជាកូនរបស់ប្តីប្រពន្ធជនរងគ្រោះទាំងពីរ មិនបានមានរបួសអ្វីទេ ក៏ប៉ុន្តែបានស្ថិតក្នុងភាពតក់ស្លុតជាទីបំផុត។
ភ្លាមៗនោះដែរ លោករដ្ឋមន្ត្រីក្រសួងមហាផ្ទៃបារាំង បានប្រកាសថានេះ គឺជាអំពើភេរវកម្ម ហើយបានជូនដំណឹងទៅលោកប្រធានាធិបតីបារាំង។ ហើយនៅព្រឹកថ្ងៃអង្គារនេះ លោកប្រធានាធិបតី ហូឡង់ បានកោះប្រជុំបន្ទាន់មួយ ជាមួយមន្ត្រីពាក់ព័ន្ធ ដើម្បីដាក់ចុះនូវវិធានការដោះស្រាយ។ ចំណែកនៅស្នងការនគរបាលសង្កាត់ Mureaux ដែលជាកន្លែងធ្វើការរបស់ជនរងគ្រោះជាប្តី គឺមន្ត្រីនគរបាលទាំងអស់មានការតក់ស្លុតយ៉ាងខ្លាំង ហើយក៏មានការព្រួយបារម្ភពីសុវត្ថិភាពផងដែរ។
ជនដៃដល់ ធ្លាប់ជាប់គុក ពីបទពាក់ព័ន្ធនឹងបណ្តាញជីហាដអ៊ីស្លាម៖
យោងតាមព័ត៌មានបឋមដែលទទួលបាន បានឲ្យដឹងថាជនដៃដល់ ឈ្មោះLarossi Abballa ភេទប្រុស មានអាយុ២៥ឆ្នាំ។ ជននេះមានភូមិកំណើត នៅសង្កាត់ Mantes La Jolie ក្បែរនឹងផ្ទះរបស់ជនរងគ្រោះដែរ។ តាមការឲ្យដឹង ជននេះធ្លាប់ត្រូវបានចាប់ខ្លួនម្តងនៅឆ្នាំ២០១១ ហើយត្រូវបានកាត់ទោសឲ្យជាប់គុក៣ឆ្នាំកាលពីឆ្នាំ២០១៣ ពីបទពាក់ព័ន្ធនឹងបណ្តាញបញ្ជូនមនុស្ស ឲ្យទៅធ្វើក្រុមជីហាដអ៊ីស្លាមនៅប៉ាគីស្ថាន។ ជននេះក៏ត្រូវបានប៉ូលីសតាមដានដឹង ថាមានជាប់ទំនាក់ទំនងជាមួយនឹងមនុស្សម្នាក់ ដែលធ្លាប់ចេញចូលទៅស៊ីរី។
តែយ៉ាងណាក៏ដោយ ប្រភពពីអ្នកស៊ើបការណ៍បានបញ្ជាក់ថា កន្លងមកខាងនគរបាលសម្ងាត់បារាំង បានតាមដានជនដៃដល់ឈ្មោះ Larossi Abballa នេះដែរ តែ មិនបានចាត់ទុកថាជននេះ ជាមនុស្សគ្រោះថ្នាក់ទេ។ រហូតដល់កើតហេតុការណ៍នេះ ទើបអាជ្ញាធរបារាំងដឹងថាជននេះ ជាបណ្តាញបក្សពួករបស់ពួកជីហាដអង្គការរដ្ឋអ៊ីស្លាម។ ដោយឡែកសាក្សីនៅក្បែរកន្លែងកើតហេតុ បានឮជនដៃដល់ស្រែកថា « Allah Akba » ដែលជាភាសាអារ៉ាប់ប្រែថាព្រះអាឡាជាធំ។ ជាទូទៅឲ្យតែពួកជីហាដអ៊ីស្លាមរៀបសំលាប់មនុស្សម្តងៗ គឺពួកវាតែងតែស្រែកពាក្យនេះ។ មិនត្រឹមតែប៉ុណ្ណោះទៀត យោងតាមប្រភពពីមន្ត្រីប៉ូលីស ដែលធ្វើប្រតិបត្តិការព័ទ្ធចាប់ជននេះ បានបញ្ជាក់ថាក្នុងពេលចរចាគ្នា ជននេះបាននិយាយអះអាងថា វាធ្វើសកម្មភាពនេះ ដើម្បីព្រះអាឡារបស់វា។
បើតាម អ្នកយកព័ត៌មានRFI បានបញ្ជាក់ថា ជននេះ បានសរសេរសារនៅលើទំព័រហ្វេសប៊ុករបស់ខ្លួន ថាបានសំលាប់មន្ត្រីនរគបាលពីរនាក់ប្តីប្រពន្ធ ដើម្បីឧទ្ទិសដល់ព្រះអាឡា។ ហើយមិនប៉ុន្មានម៉ោងក្រោយមកទៀត នៅលើទំព័រអ៊ីនធឺនែត Amaq ដែលជាទំព័រផ្សាយព័ត៌មានរបស់ពួកជីហាដអង្គការរដ្ឋអ៊ីស្លាម បានផ្សាយថា កូនចៅពួកវាម្នាក់ បានធ្វើសកម្មភាពសម្លាប់មន្ត្រីនគរបាលបារាំងពីរនាក់ប្តីប្រពន្ធបានសម្រេច នៅក្បែរក្រុងប៉ារីស។ ដូច្នេះ យោងតាមធាតុផ្សំទាំងអស់នេះ ទើបលោកប្រធានាធិបតីបារាំង បានប្រកាសនៅក្នុងសន្ទរកថា នៅព្រឹកមិញថ្ងៃអង្គារ ថាវាជាអំពើភេរវកម្ម ដែលបញ្ជា និងរៀបចំដោយក្រុមជីហាដអង្គការរដ្ឋអ៊ីស្លាម។
រូបភាពថ្មីនៃប្រតិបត្តិការភេរវកម្ម របស់ពួកជីហាដ៖
នេះជារូបភាពថ្មី នៃរបៀបសំលាប់មនុស្សរបស់ពួកជីហាដអ៊ីស្លាម។ តាមការសន្និដ្ឋានជាបឋមពីក្រុមស៊ើបអង្កេត គឺជននេះអាចស្គាល់ប្តីប្រពន្ធជនរងគ្រោះទាំងពីរនាក់នេះ ព្រោះថាស្ត្រីជាភរិយា គាត់ធ្វើការជាមន្ត្រីរដ្ឋបាលនៅស្នងការនគរបាលសង្កាត់ Mantes La Jolie ដែលជាសង្កាត់រស់នៅរបស់ជនដៃដល់នេះ។
លោក នាយករដ្ឋមន្ត្រីបារាំង បានមានប្រសាសន៍ថា នេះជារបៀបធ្វើប្រតិបត្តិការថ្មី ដោយសំដៅសម្លាប់មន្ត្រីនគរបាលតែម្តង។ របៀបសំលាប់ក៏ប្លែក ខុសពីសព្វដងដែរ ដែលពីមុនប្រើកាំភ្លើងAK រឺក៏គ្រាប់បែកច្នៃ តែករណីនេះ គឺជននេះប្រើកាំបិតជាអាវុធ។ លោកនាយករដ្ឋមន្ត្រីបារាំង បានបញ្ជាក់ថា ចាប់ពីពេលនេះទៅ គ្រប់មន្ត្រីនគរបាលទាំងអស់ត្រូវតែមានការប្រុងប្រយ័ត្នខ្ពស់។ ដោយឡែក នៅព្រឹកថ្ងៃអង្គារនេះ នគរបាលស៊ើបអង្កេត បានចុះឆែកឆេរនៅផ្ទះជនដៃដល់។ ហើយនៅមួយម៉ោងមុននេះ មនុស្សពីរនាក់ត្រូវបានឃាត់ខ្លួន ដោយគេកំពុងសង្ស័យថា អាចជាបក្សពួកជាមួយនឹងជនដៃដល់នេះ។
អ្វីដែលសំខាន់នាពេលនេះ គឺការគំរាមកំហែងភេរវកម្ម មានពីគ្រប់ច្រកល្ហក និងគ្រប់រូបភាពតែម្តង ហើយមិនមែនមានតែបារាំងទេ ដែលរងគ្រោះ។ ជាក់ស្តែងយើងឃើញហើយ នៅសហរដ្ឋអាមេរិក ប៉ុន្មានថ្ងៃមុននេះ ដែលមានអ្នកស្លាប់៥០នាក់ ក្នុងហេតុការណ៍បាញ់រះ នៅក្នុងក្លឹបរាត្រីមួយ នៅរដ្ឋហ្វ្លរីដា។ ព្រឹត្តិការណ៍ប្រកួតបាល់ទាត់អឺរ៉ូ ដែលកំពុងធ្វើឡើងនៅក្នុងប្រទេសបារាំង កំពុងតែធ្វើឲ្យគេ មានការព្រួយបារម្ភជាខ្លាំង ផងដែរ ពីបញ្ហាសន្តិសុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ